2SAMWELI 2 - Bibilia Kui Mdedie fo Kimochi

Dawidi ainengo wumangi wo Yuda

¹ Kyasia, Dawidi kawesa Ruwa namnenge momu fo henda ikapa na iwada mṟi fumu fo Yuda. Na Ruwa kamnenga momu kambia, “Kuhendie, ‘Dawidi kawesa Ruwa, Njiwade mṟi fuhya?’ Ruwa kambia, ‘Hebroni.’”

² Nahong'u Dawidi kahenda Hebroni na waka wake wawi welaho nyi Ahinoamu awukie Yezreeli, na Abigaili ampfie nyi mii oke elaho Nabali awukie mṟi fo Karmeli.

³ Dawidi kaduo wandu wake hamu na walya wa mba tsawo wakasamia mṟi fo Hebroni.

⁴ Kyasia wandu walya wa Yuda wakacha na kulya Hebroni, wakashimbuo Dawidi nawe Mangi o Yuda.

⁵ Kiheri Dawidi aleicho ke nyi wandu wa Yabesh-gileadi waleṟika Sauli; kawadumia kawawia, “Mndumii namwinenge mboṟa kipfa muleloṟa wuhendeli ko Mangi yanu Sauli ili mandi mulemṟika.

⁶ Mndumii namwinenge ngaya yake na shisumbo sha ikunda lyake. Na kipfa kya kindo ki mowuta, inyi njechimuambuya necha.

⁷ Na wulalu kyamba Sauli Mangi yanu ampfa, muwe watumuhari na wakari, kipfa Wayuda walenjishimbuo inyi njiwe Mangi yawo.”

Ishboshethi ainengo wumangi

⁸ Kyasia Abneri mana o Neri; ai mnene o waskari walya wa shida wa Sauli, kadicha na Ishboshethi mana o Sauli na iambada nao meda fo Yordani na ishika mṟi fo Mahanaimu.

⁹ Na alya Abneri kammbika nawe Mangi o Gileadi, Ashuru, Yezreeli, Efraimu na Benyamini na oruka lose lo Israeli.

¹⁰ Ishboshethi nawewode maka makumi hana (40), kiheri alewoka iwa Mangi o Israeli, nao kawa Mangi yawo ko maka iwi.

¹¹ Kyaindi Dawidi nawei Mangi ya oruka lose lo Yuda, ko maka mfungade na meri iṟandaṟu na kidi kyake kya wumangi kiwei kulya Hebroni.

Shida sha wandu wa Israeli na walya wa Yuda

¹² Kyasia Abneri mana o Neri, na waṟundi wa Ishboshethi mana o Sauli wakawuka Manahaimu, wakahenda, Gibeoni.

¹³ Yoabu mana o Seruya na wanene wengi wa Dawidi wakahenda ikoyana nawo handu ha nduwenyi, wengi wakadamia ora lumu lo nduwa na wengi ora lungi.

¹⁴ Kyasia Abneri kawia Yoabu, “Luinenge momu wanake wawuka njoṟa tsi tsadu tsose wakapane oshangunyi lopfo.” Yoabu kaidikia kiwe kido.

¹⁵ Wakasambuṟa wanake ikumi na wawi wa oruka lo Ishboshethi wa kishari kya Benyamini wakakapana na wanake ikumi na wawi wa oruka lo Dawidi.

¹⁶ Orio umu o wanake walya wakawadana mdo mndu na mkituwa oke wakatochana na njoshu tsawo, na wose makumi hawi na waana (24) wakapfa handu hamu. Handu halya hakalaho Helkath-hazurimu . Handu ho kukeri kulya Gibeoni.

¹⁷ Wakakapana shida shing'anyi na Abneri na wandu walya wa Israeli wakakapo nyi Yoabu na waskari wa Dawidi.

¹⁸ Wana waṟaṟu wa Seruya: Yoabu, Abishai na Asaheli wawekeri shidenyi shilya. Asaheli nawei muangu ko idicha cha Sariha;

¹⁹ Asaheli kawoka iwingia Abneri ma alatirime handu hose maiambuya kumoso ang'u kulyo.

²⁰ Abneri ahende ambuya nduma na kawona kechimuosha, kammbesa, “Asaheli nyi iyo.” Nao kamhaluo, “Ee nyi inyi.”

²¹ Kyasia, Abneri kambawasa kambia, “Wingia mndu ungi noduo shindo shake.” Kyaindi Asaheli kaleha kaengeṟa ihendia Abneri.

²² Abneri kambawawasa lya kawi kambia, “Leka ulanjioshe, nkili okundi njikuwahe?” Ngakuwaha njeidima kuda iwonana na wawayo Yoabu? Kyaindi Asaheli kaleha kilya awio.

²³ Kyasia, Abneri kamtocha ndewunyi na ora lulya lo kawi lo ipfumu lyake. Ipfumu lilya lyikatochikia mhongonyi na Asaheli kaomboka na ipfia alya alya. Wandu wose walya walecha na handu halya Asaheli alepfia wakahoṟoka na itsia sau.

²⁴ Kyaindi Yoabu na Abishai wakalatia Abneri kiheri mnengeṟi fuwekeri iolokia ifumvunyi lya Ama, kufui na Gia, kiidi kya njia ihendie nuka ya Gibeoni.

²⁵ Maaskari walya wa Abneri wawukie oshari lo Benyamini, wakakuumbia kitonyohu kya ifumvu lilya.

²⁶ Kyasia, Abneri kalaha Yoabu kambia, “Nyi lochiengeṟa iwahana mṟasa indi? Uichi matsitsio hayo nyi hai mawicho? Nyi indi ochiwia wandu wapfo wade ikapana na wana wa wama wawo?”

²⁷ Kyasia, Yoabu kahaluo kahamba, “Ngakulia nyamu, koka ulahamba kindo kyo, wandu wako waweengeṟa ikapana na wana wa wamawayo mṟasa ngamenyi.”

²⁸ Nahong'u Yoabu kakapa ombe loke, na waskari wake wakada iwingiana na ikapana na waskari wa Israeli.

²⁹ Kyasia Abneri na wandu wake wakachumia kio kyose wechiida Araba. Wakaambada meda fo Yordani, wakachumia ngamenyi yose, wakashika mṟi fo Mahanaimu.

³⁰ Yoabu kawuya na kanyi, na iitala wandu wake, kakoya iwuta Asaheli, kuwewode wandu wengi walewoho ikumi na kenda.

³¹ Kyaindi wandu wa Dawidi wawewaahiye wandu mahana haṟaṟu na makumi haṟandaṟu (360) ha wandu wa Abneri wa oshari lo Benyamini.

³² Kyasia, Yoabu na wandu wake wakakudika mnying'a fulya fo Asaheli mṟasa Bethlehemu na imṟika handu hamu na ndeye. Kiheri walemarisa wakachumia kio taṟaṟaa na ngamenyi wakashika Hebroni.