2SAMWELI 16 - Bibilia Kui Mdedie fo Kimochi

Mangi Dawidi na Siba

¹ Kyasia, Dawidi ahenda imarisa iida kitutu okoyo lo kitoṟomoso kya ifumvu lilya, kakoyana na Siba mṟundi o Mofiboshethi acheiye imwambilia. Siba nawerianyi na nzoi tsiwi tsikudikie mhanda fo mkate mahana hawi, na shisangu ihana limu sha msabibu injihadutse, na ipipa limu litutu lya mvinyo.

² Kyasia, Mangi Dawidi kawesa Siba, “Nyi shakiki shindo shi orie?” Siba kamhaluo kambia, “Nzoi tsi nyi tsa wandu wa mba yapfo tserendesha, na ndunda tsa msabibu na mkate nyi tsa wanake wapfo tselya, na mvinyo fo nyi fonyoyo nyi walya wawechumia wakalehela ipfo patenyi.”

³ Kyasia Mangi kawesa Siba, “Nku Mefiboshethi akeri?” Siba kamhaluo kambia, “Nadeo kulya Yerusalemu, kechihia ke wandu wa Israeli wechimmbihiṟia wumangi wulya wo ndeye o Sauli.”

⁴ Kyasia, Mangi kawia Siba, “Ngakuinenga orio kindo kikeri kya Mefiboseti.” Siba kambia, “Haika Mndumii.”

Shimei asesa Mangi Dawidi

⁵ Kiheri Mangi Dawidi na wandu wake waleshika mṟi fo Bahurimu, kaosho nyi mndu umu kechimsesa elaho nyi Shimei, mana o Gera; O oshari lo Sauli.

⁶ Shimei kakumbia Dawidi maho na wandu walya wake wose wawerianyi na waskari wake wa shida wawemṟingichie kulyo na kumoso.

⁷ Shimei kawia Dawidi, “Kure iya iyo mbahi, na mndu alawode kiira!”

⁸ Mndumii nakutaa kiṟache kipfa kya ili ulewaha Sauli na walya wa kanyi koke; noleiwa wumangi woke; na wulalu Ruwa nakusoka kawuinengia mana opfo “Absalomu. Ambuya nolekuendie ngataṟa tsi iyo kumonyi, kipfa iyo nyi mbahi.”

⁹ Kyasia, Abishai mana o Seruya, kadeda na Mangi kambia, “Nkili kite ki kilai na moo kikeri isesa Mangi yako? Njiinenga momu njidumbuo mdo fo foke.”

¹⁰ Kyaindi, Mangi kambia, “Ngesa nkiki luwode kiidi kyako inyi nanyo wana wa Seruya? Kokoya Mndumii-Ruwa nambia, ‘Sesa Dawidi,’ nyiu wulalu echiidima iwesa nkili owuta kudo?”

¹¹ Dawidi kawia Abishai na waṟundi walya wake, “Kokoya mana oko Absalomu, nakeri injiwingia nanjiwahe, nkili mṟihiyo iki Mbenyameni chu aiwuta? Mlekenyi namdume nyi Ruwa nanjisese.”

¹² Kofia Mndumii-Ruwa, nechiwona mawina hako, nanjitae ko injisesa, na injitaa wucha ko oseso.

¹³ Kyasia, Dawidi na wandu wake wakaengeṟa ihenda na njia yawo, kyaindi Shimei na wandu wake wakahenda nawo wakeri ora lokawi lo kifumvu wechiwaruma, iwasesa, iwakumbia maho na iwadutsia kiluli.

¹⁴ Kyasia, Mangi Dawidi na walya wose warianyi nao wakashika Yordani, wakalemo na iṟengeṟa wakasia moo.

Absalomu awada oruka

¹⁵ Kyasia, Absalomu na wasoṟo wake wa Israeli warianyi na Ahithofeli wakashika Yerusalemu.

¹⁶ Hushai mndu o Arki ai mbuya ya Daudi kaosha Absalomu kambia, “Wada moo mleshe Mangi. Wada moo mleshe Mangi!”.

¹⁷ Absalomu kamhaluo kambia, “Nyi wudo okeindia Dawidi mbuya yapfo? Nkili ulakeri nao?”

¹⁸ Hushai kamhaluo kambia, “Ni kipfa kya ili njekeṟunda na mndu amsambuṟe nyi Ruwa o wandu wa Israeli.

¹⁹ Njiletarama ndeyo na wulalu njikutarama iyo.”

²⁰ Kyasia, Absalomu kadeda na Ahithofeli kammbesa, “Luwute kikise ulalu?”

²¹ Ahithofeli kamhaluo kambia, “Henda laa na waka walya wa ndeo, alewada waringe mba. Wandu wa Israeli wose wakamanya ke noruma na imina ndeo o Dawidi owicho mnu; wechikulunga na iyo.”

²² Kyasia, wakasungusia ihema huye ya kai lya mba ya Dawidi, na Absalomu kalaa na waka walya wa ndeye oshangunyi lo wandu wose Waisraeli.

²³ Kyasia Absalomu kaindia madedo ha Ahithofeli, chandu ndeye o Dawidi awekewuta; kipfa kiheri kilya orio madedo hose ha wulaanyi ha Ahithofeli hawekeindio cha madedo hawukie ko Ruwa na iinengo kiṟumi nyi Dawidi na Absalomu.