2SAMWELI 12 - Bibilia Kui Mdedie fo Kimochi

Nathani atochia Dawidi ideko lyake

¹ Kyasia Ruwa kaduma mwikimbi Nathani ko Dawidi. Nathani kahendia Dawidi kambia, “Kuweipfo wandu wawi wawekekaa mṟi fumu, umuho nawei msuṟi na ulya ungi mkiwa.

² Msuṟi ulya nawewode mmbe tsifoi na machondi hafoi,

³ Kyaindi mkiwa ulya nawewode kidahina kimu tupu kya ichondi kya huṟuwi sa awehuṟie. Mkiwa ulya naweombeṟa kidahina kilya na wana wake na ikiinenga marua kikombenyi kyake, na ikiwada nndenyi cha mana mtutu.

⁴ Mkonu fumu msuṟi ulya nalecheo nyi mhenu awuka kuleshe. Msuṟi ulya alakunde ishinja ichondi lyake nasungusie mhenu ulya kelya, kyaindi kahenda iduo kidahina kilya kimu tupu kya mkiwa ulya, kakishinjia mhenu oke.”

⁵ Dawidi kasuo mnu kipfa kya mawuto ha mnene ulya, kawia Nathani, “Ngalya nyamu njechisenda rina lya Ruwa menyi mo, ke mndu chu awuta mawuto ha mawicho hadi nyi kiwaṟi napfe.”

⁶ Na kipfa kya ulang'a woke na ituṟa mrima fo isaṟia na ikunda, nechitaa machondi hana.

⁷ Kyasia, Nathani kahaluo Dawidi kambia, “Iyo nyio mndu cho,” ulalu icho ikyo Mndumii-Ruwa o Israeli ahamba, “Njilekuwika nowe mangi o Israeli na ikukiṟa mawokonyi ha Sauli.

⁸ Ngakuinenga oruka loke na waka wake wose; ngakuwika nowe mwitoṟi o Israeli yose na Yuda. Kokoya ishi shose shiwei shitutu mnu kopfo njiweidima ikuongeṟia se shifoi mnu.

⁹ Nkili omina mawawaso hako na itane owuta kindo kiwicho kido? Nowahiye Uria Mhiti shidenyi ko mapfumu ha Waamori na iduo mka oke kawa mka opfo?

¹⁰ Koikyo wokia mkonu fu foinu, ipfo osharini lopfo kiheri kyose, luwa lyapfo maata wechipfa opfu luwicho kipfa kya ili onjimina na iduo mka o Uria.

¹¹ Kipfa kya ili onjimina, njechihoṟotsa mndu oipfo kanyi kopfo nakuturunje. Njechiinenga msoṟo ungi waka wapfo; nao nechilaa nawo handu ha patehu kiheri kuwode ngela.

¹² Iyo nulenjimina kiṟika, kyaindi inyi njechikuutia ishi handu ha patehu, kiheri kuwode saa kundu wandu wa oruka lose lo Israeli wawone.”

¹³ Nahong'u Dawidi kahaluo Nathani kambia, “Ngadekio Ruwa ko wunyamaṟi wu woko.” Kyasia, Nathani kamhaluo kambia, “Ee nyi udo, na Mndumii amekuhoṟia, na ochipfa kipfa kya wunyamaṟi wu pfo.

¹⁴ Kyaindi kipfa kya ili omina kudo Ruwa, mana opfo nechipfa.”

¹⁵ Nahong'u Nathani kawuya na kanyi koke. Kyasia, Mndumii-Ruwa kaluṟa mnu mana ulya o Bathsheba mka o Uria awefee na Dawidi.

Mana o Dawidi na Bathsheba apfa

¹⁶ Dawidi katerewa Ruwa mana ulya nawone nanga. Kahenda kiṟihenyi kyake kalaa wanda taṟaṟaa mṟasa kukakya alalye kelya, kechiterewa Ruwa.

¹⁷ Wameku wasongoru wakamhendia waimterewa nakure nalye kelya nawo nao kaleha.

¹⁸ Mfungade fumu fuhende isia, mana ulya kapfa na wameku walya wasongoru wa Dawidi wakaowuo ihenda itochia Dawidi mbonyi tsi, wakahamba, “Kiheri kilya manachu aweluo Dawidi nalesokio mnu nyi fowa, kaleha ideda naso! Ngesa nyi kiki ekuwutia o amonyi lukahenda immbia mana ulya amepfa?”

¹⁹ Kyasia, Dawidi kawona wasongoru walya wechiwewediana. Kamanya mana ulya amepfa. Kawawesa kahamba, “Mana ulya napfie?” Nawo wakamhaluo wechihamba, “Ee amepfa.”

²⁰ Kyasia, Dawidi kahoṟoka, kasamba, kasungusia njui tsake, na iṟaa nguo tsingi, kahenda kulya mbenyi ya Ruwa iadapfuma Ruwa. Dawidi kahenda kanyi koke, nawo wakamnenga kelya, kalya.

²¹ Waṟundi walya wake wakaṟihiyo wakambia, “Luidima imanya kindo awuta pfo? Kiheri mana opfo awei na moo, nowekeri impfihiṟia, koleha ilya kelya. Kyaindi ili mana amepfa nokure na ilya kelya.”

²² Nahong'u Dawidi kawahaluo kawawia, “Ee nkyalohi mohamba, kiheri mana ulya awei na moo njilekuima kelya njechiterewa njekusaṟa ke Ruwa nechinjisaṟia nakiṟe mana ulya.

²³ Kyaindi ili mana ulya amepfa, nkili njechikuima kelya? Aka njeidima iṟutsa manacho?”

Solomoni afeo

²⁴ Kyasia, Dawidi kawihiṟia Bathsheba moo, kalaa nao, nao kakapika kafee mana o womi kamlaha rina lyake Solomoni. Ruwa kakunda kimana kilya,

²⁵ kamdikia ndumi yemuichika na imnenga mboṟa kui oshangu lo mwikimbi Nathani, na immbia nawie Dawidi nalahe manacho rina Yedidia, (Mkunde o Ruwa).

Dawidi akapa Waamoni

²⁶ Kiheri kyo, Yoabu kasaṟikia Raba mṟi fo Waamoni, kafukapa na ifuwada.

²⁷ Yoabu kaduma ndumi ko Dawidi, kambia, “Ngamekapa mṟifo Raba, na iwada nduwa yawo ya mṟinga.

²⁸ Wulalu sanyia wandu walya wose watsuhae, waṟingichie mṟi fo na ifuwada. Kulamewuta kudo ngafuwada inyi, fochilaho ko watsuhae irina lyako.”

²⁹ Kyasia, Dawidi kasanyia wandu wake, kaṟingichia mṟi fulya kafukapa na ifuwada.

³⁰ Nahong'u Dawidi kawuta oṟo iya ya Mangi, yawo mdonyi fo mangi ulya. Oṟo iya wulemeri woyo nyi kilo makumi haṟaṟu na shitanu (35) sha sahabu; na kiidi kyayo kuweikuwike iho lya wuhuru wung'anyi. Dawidi kaṟaa Oṟo iya mdonyi foke. Nalewada masaa sa hafoi mnu mṟinyi fulya fo Raba.

³¹ Kyasia, wandu walya alewawada shidenyi kawaachikia waṟunde na misimeno, masoka ha menya, makumbi ha menya, na iwaitika wasungusie matofaṟi. Kawewuta ado na wandu wa mṟi ya Amoni. Kyasia, Dawidi na wandu wake wose wakawuya na Yerusalemu.