2SAMWELI 10 - Bibilia Kui Mdedie fo Kimochi

Dawidi akapa Waamori na Waaramu

¹ Kiheri kitutu kikaida Nahashi mangi o Waamori kapfa na mana oke elaho Hanuni kawa Mangi handu ha ndeye.

² Mangi Dawidi kahamba, “Njechiṟunda necha na Hanuni, chandu ndeye Nahashi awekeṟunda na inyi.” Kyasia, Dawidi kaduma waṟundi wake wahende iduo shindo shewihiṟia Hanuni moo kipfa kya opfu lo Nahashi ndeye. Wandu walya wewihiṟia moo wakashika oruka lulya lo Amoni,

³ na wanene walya wa Waamori wakawona, wakadeda na mangi owo wakammbesa, “Noichi ke Dawidi nakudikia wandu wekuwihiṟia moo kipfa kya opfu lo Ndeo? Wandu wa wawadume icha imanya mbonyi tsa mṟi fodu, na numa wache ilukapa na ilurumatsa.”

⁴ Nahong'u Hanuni kawada waṟundi walya wa Dawidi kawaoda ora lumu lo mdo yawo na ngerero tsawo na iranduo ora lumu lo nguwo tsawo wokia nzingonyi mṟasa songonyi tsawo na iwalekia wawuye na kanyi. Wandu walya wakawado mnu nyi sonu yewuya na kanyi chandu wawei.

⁵ Dawidi kahenda iwio mbonyi tsilya, kawadumia watirime kulya Yeriko mṟasa njui na ngerero tsawo tsiwenjiode tsing'ane, wawuyeng'u na kanyi.

⁶ Waamoni waendeiwona ke wasuiṟa Dawidi, wakasanyia maasakari wa madende Waaramu wekapana shida shiku makumi hawi (20,000) iuka Bethrehobu na Soba, na waskari wa shida shiku ikumi na shiwi (12,000) iwuka Tobu, na mangi Maaka arianyi na waskari wake kiku kimu (1,000).

⁷ Dawidi kaicho kya mbonyi tso, kaduma Yoabu na waskari wose wa shida wahende ikapana nawo.

⁸ Waamoni walya wakacha ikusanyia na iringa alya kichuminyi keida na Raba mṟi fowo fung'anyi. Waaramu iwuka Soba na Rehobu na wandu wengi wawuka Tobu na Maaka wakakuumbia kulya patenyi.

⁹ Yoabu kawona shida shawa shiwawo mnu kusonguo na numa yake, kasahuo waskari maata na Waisraeli wai ngohoda wakapane na Waaramu walya.

¹⁰ Na waskari walya Waisraeli waletsuhaṟo kawawika wanda ya wunene wo manaomaye elaho nyi Abishai, kundu wakapane na Waamoni.

¹¹ Yoabu kawia Abishai, “Waaramu wa wakanjilemia mnu, nochicha injitarama, na Waamoni wa wakakulemia mnu njechicha ikutarama.”

¹² “Kyaindi makulaowuo! Lukaapane kisoṟo kundu lukiṟe wandu wadu na mṟi i ya Ruwa iladao. Na Mndumii-Ruwa naluwutie shilya shimchihiṟie.”

¹³ Kyasia, Yoabu na wandu wake wakahenda kusonguo ikapana na Waaramu walya, na Waaramu walya wakadicha.

¹⁴ Waamoni wakawona Waaramu wedicha, nawo wakadicha Abishai, wakamda wakawuya na kulya mṟinyi fo Rabba. Kyasia, Yoabu kada ikapana na Waamoni walya, kawuya na Yerusalemu.

¹⁵ Kyasia Waaramu walya wahende iwona wakapo nyi Waisraeli walya, wakasanyia waskari wawo wose handu hamu.

¹⁶ Mangi Hadadezeri kaduma Waaramu walya wawekeri ora lo ngamenyi lo meda fo Eufrate waendo. Wakacha na Helamu wanda ya wusongoru wo Shobaki ai mnene o Maaskari wa shida wa Mangi Hadadezeri o Shoba.

¹⁷ Dawidi kaicho mbonyi tsilya. Kasanyia waskari wa shida wa Israeli, wakaambada meda fo Yordani mṟasa Helamu, handu halya, Waaramu wawekuwumbie na shida shikawoka,

¹⁸ Waaramu walya wakadicha se waskari walya Waisraeli wakada nduma wandu wawo mahana mfungade (700) wapfie wai weduo magari ha shida, na wandu wawo shiku makumi hana (40,000) wai waskari wedoya frasi na msongoru Shobaki apfie alya patenyi lya shida.

¹⁹ Wamangi walya wose waweketaramana na Hadadezeri wakawona ke Waaramu wakapo nyi Israeli, wakakudambika mawokonyi ha Dawidi, wakawa waṟundi wake. Na wokia lyo Waaramu wakaowuo itaramase Waamoni shidenyi.