2SAMWELI 1 - Bibilia Kui Mdedie fo Kimochi

Dawidi amanyisho opfu lo Sauli

¹ Sauli amma ipfa, na Dawidi ammarisa iwaha Waamaleki walya, kawuya na Zikilag na ikaa pfo kiheri kya mkonu iwi.

² Ili lya ngama kukacha manake umu awuka kiṟaṟo kya ya Sauli, naweranduye nguo tsake na ikushia teri mdonyi kechiloṟa fowa yake. Ekishika handu Dawidi awei, kakuolotsa wanda na ipfiria Dawidi ndi.

³ Dawidi kammbesa, “Nyiku uwukie?” Nao kamhaluo kambia, “Ngakusheṟuo kambinyi ya Waisraeli.”

⁴ Dawidi kammbesa, “Kenjiwia nkiki kiwutikie, mbonyi tsihendie kuda?” Manake ulya kamhaluo kambia, “Maaskari wadu wose wadicha. Wandu wadu wafoi handu hamu na Sauli na mana oke Yonathani walewaho.”

⁵ Dawidi kammbesa, “Nomanya kuda ke Sauli na Yonathani wawawahe?”

⁶ Nao kamhaluo kambia, kiwei kiheri kilya njiwei kulya ifumvunyi lya Gilboa, njilewona Sauli akuhetsie ipfumunyi lyake na magari ha shida ha wakituwa wake wechimsembelia.

⁷ Sauli kahaluka kanjiwona kanjilaha. Na inyi ngamuidikia “Embe!”

⁸ Kanjiwesa, “Inyi nyiu?” Na inyi ngamhaluo ngammbia inyi nyi o oshari lo Waameleki.

⁹ Nao kanjilaha kanjiwia, “Ncho njiwuta moo, kipfa njimfaṟe mnu na njikeri kufui na ipfa.

¹⁰ ‘Koikyo ngambaha kipfa njiweichi echiidima ikiapfo. Kyasia, ngambuta oṟo iya yake ya wumangi aweṟee na maṟikoso hawei mawokonyi hake ngakuendie.’”

¹¹ Dawidi karanduo nguo tsake hamu na walya wose wawei kimu nao kipfa kya fowa tsing'anyi tsilewawada.

¹² Wakakapa, kilio, na ikuotoya mṟasa kyukanyi, kya Sauli na Yonathani, na Waisraeli na wandu walya wose wa Ruwa walewohio shidenyi mkonu fulya.

¹³ Kyasia Dawidi kawesa manake ulya alemendie mbonyi tsilya, “Iyo nyiku uwukie?” Nao kamhaluo, “Inyi nyi o kishari kya Omaleki kyaindi njekekaa orukenyi lopfo cha mhenu.”

¹⁴ Kyasia Dawidi kammbesa, “Nyiku uwutie ukari wowaha Mangi chu amsambuṟe na ishumbuyo nyi Ruwa?”

¹⁵ Nahong'u Dawidi kalaha msoṟo umu kambia, “Waha mndu chu.” Msoṟo ulya kamkapa na oshu kambaha.

¹⁶ Kyamba kido Dawidi kahamba, “Nyi iyo okuendie ofu lu kumonyi, kipfa nyi iyo okuṟingishia kumonyi ke nowahie mshimbuo chu o Ruwa.”

Dawidi akapa kilio kya opfu lo Sauli na Yonathani

¹⁷ Dawidi kaimba kiimbo kesumukia kipfa kya Sauli na manaoke o Yonathani.

¹⁸ Na iwawasa ke kilosho wandu wose wa Yuda. (Kikiṟehiye kitapunyi kya Yashari).

¹⁹ Walya wai kiṟumi kyapfo iyo Israeli wawawahie mafumvunyi hapfo na mbahanyi tsapfo waomboka.

²⁰ Manya mlawie mbonyi tsi ko wandu wa mṟi fo Gati na Ashkeloni; kipfa nochichihiṟa waka wa Wafilisti, na wana wa kika wa wandu walawadine.

²¹ “Onyo mafumvu ha Gilboa, mvuo ilawaolokie ma ṟauṟa, makulawone kochioṟa maimba ang'u mbeu ya mbaṟi yose terinyi yanu. Kipfa handu ho Mangi Sauli namlaṟe? Na ngawo ya Mangi injifanyiṟe, ilechiwase ishio mafuda.

²² “Uda wo Yonathani wulewuya wulya pfo, na oshu lo Sauli lulewuya ulya pfo, lulewada waapfinya wafoi, ma walewuya walarie kindo pfo.

²³ “Sauli na Yonathani, wawei wandu wawakunde na weṟihisha; wawei wamu kiheri kya moo na kiheri walepfa. Wawei waweṟeshu kota owishi, na wawewode pfinya kota miiso.

²⁴ “Nyo waka wa Israeli, fihiṟenyi kipfa kya Sauli! Kipfa nalemṟika nguo tsa kimande tsa Kimangi, tsinjichope kui sahabu.

²⁵ “Nyi uda waapfinya waleoloka, wakapfa wai ngapanonyi, na Yonatani nalee apfie mafumvunyi.

²⁶ “Njikufihiṟia monowama Yonathani; kipfa njiwekukundi mnu, kipfa ikunda lyapfo koko liweng'anyi lyikaeṟa , ikunda lya mndu mka.

²⁷ “Wasoṟo walya wakari wa shida wapfie nashisha shawo, shishide shido shilawode iṟunda.”