2PETRO 3 - Bibilia Kui Mdedie fo Kimochi

¹ Nyo mui wakunde wako, paruo ii ngamṟehya nyo nyi ya kawi. Njimwamtsie natso mhie fulya msalari njechimtamuṟya-ho mbonyi tsi.

² Muwe mochikumbuo madedo halya halehambo nyi waikimbi walya waele na iwawaso lilya lya Ndumi Mkiṟi lii-yende nyi wasu walya wanu.

³ Kisongoye shose manyenyi kiheri kyefurumia kochicha wandu wetaluo, mchumie yawo inchilie nyi lango tawo njiwicho. Kochicha-pfo wetaluo wai wapirisi wenyi-wupiṟi wechichumia waiwaṟaishe nyi lango tsawo wawenyi.

⁴ Wekehamba, “Kyasa kya iwuya lyake kilemawutsyo hanga ngesa?” Wokya mandi waku wamepfa, shindo shose shii chando shiwei lilya shilewiko iya wuyanenyi.

⁵ Ili wandu wa wakutimbishye, wakahadima imanya ke Ruwa nalededa, ruwehu na wuyana shikawumbo. Wuyana wulewiko mṟingenyi kui mṟinga mṟingenyi kui dedo lya Ruwa iwewangiho na mweke fo mṟinga.

⁶ Na kui mṟinga, mfu fulya funganyi fo mṟinga, wuyana wo kiheri kilya natso tsikakusanza tsekombetsa mkambo fo wandu fose wakarumatso nyi mṟinga.

⁷ Indi ngina ya ki-wulalu na wanda ii shishiṟihikye nyi idedo lya Ruwa, tso tsikeri nteṟye modo kui idedo li lya Ruwa tsiinkoomye mkonu fo maanduo halya hang'anyi forumatsa wandu walya wenyi-wulemeshi.

⁸ Nyo mui wakunde wako, mlahadime kindo kimu, ke mkonu fumu fukukerye Ruwa cha ili fui maka kiku, na maka kiku cha ili ikeri mkonu fumu.

⁹ Mndumii akeleṟye yawutsa kyasapfo chando waipfo wandu wafoi wakusaṟie aikikeleṟa. Kya indi ai momleelya nyo kipfa alakundi kuedekye mndu manya umu indi washike idumbuya na ihaluka wose.

¹⁰ Kochicha mkonu fo Mndumii oweṟe faa cha mwiiwi. Nafo nyifo ngina yechisaramaya neduika ling'anyi na shiṟaana shayo shechipaṟakana shii-shirohie m modo, na wanda ii na wudo yechihenda ikoṟo hamu na shiwike shii nayo.

¹¹ Na wudo ili shose shakunda isalaṟo apa mkoṟomu fuimkoromuo nyo mukae mochihendeka mhendekye mwele fuwode wuindi woindia Ruwa wose.

¹² Muwe mochiweda iwoneka lya Mkonu fukeri fo Ruwa mofuwingya. Mfo fochitewa ngina yechipaṟatsano modonyi na shiṟaana shechisalaṟo shii-shii-rohie m mrike.

¹³ Indi so kui kyaasa kyake luiwedya ngina njihya na wanda njihya ii na wusumhanyi luidikyanyi na kyasa kyake.

¹⁴ Nyo mui-wakunde wako, nkyo kimaduma ili muiweda isho, mukutambahanye muhende ikoyo-ho mulai na paṟi ma limu mulawa ihoyo owingo oshangunyi lo Ruwa mui na ofoṟo.

¹⁵ Kimuwaṟi muwone na wuleeli wo Mndumii odu muwuhendelye womwendie okiio chando na manowama odu mkunde Paulo amaa imṟehya kui wuṟango wulya alesumbo nyi Ruwa.

¹⁶ Isho nyisho aideda baṟuonyi tsake tsose ili ashike ipaaya-ho isho. Ipfo kiidi kyatso kwipfo shindo, maata shi shiumu imanyika owinyi. Nyisho wandu wai matondo, walai wapfunde walai wawanze wekeshipfuluopfuluo chando wekyepfuluo Madedo hengi Maele, na mṟehie ingi wakakuwutya-ho ihenda ikudetsa wawenyi.

¹⁷ Nahong'u, nyo mui wakunde wako, ili mulesonguo na samanya Mukuṟise kundu mulawone mochieko nyi odeko lulya lo watahachi wo muwechitaṟasha hando mokuilikishya-ho.

¹⁸ Kya indi muhende ikung'anya ipfo kiidi kya wutonga na wulaanyi womanya Mndumii odu Mkiṟi Yesu Kristo. Wuitoṟi wui woke mandi ha wulalu shika mfiri fo mlungana. Amenyi.