2PETRO 2 - Bibilia Kui Mdedie fo Kimochi

¹ Indi kuweipfo na waikimbi wa wongo ipfo kiidi kya wandu. Chando na ipfo konu kochiwa wai walosha wa wongo. Wechilosha moshie mbicho fonyamaṟa na ikana Ruwa-alewakiṟa. Na Mnene ichu alewatalaa nyi wechimkana wekutumukishya wadi kiwadetsa owinyi.

² Na wandu wafoi wechiwingya njia-tso tsawo njiwicho. Nyiwo wechitewa njia ya kii-lohi ihende irumo.

³ Ili wawodo nyi wuehi wechikapa nanyo mbucha kui sumu tsawo tsa wongo. Indi kui kiheri kileshe Moanduya owo nakuṟeheṟie, na Morumatsa owo nawonyi.

⁴ Kyamba ma Wasu walya wa ruwehu walemdekyo Ruwa alewahoṟia-pfo. Kya indi kawakumbalya modonyi fo Gehena hando hadekye wanda na kamu hashingikye meema puti wakae-pfo wai wapfunge itane weshika yanduyo.

⁵ Manya Ruwa alesaṟia wuyana wulya wo mboko-pfo, indi naleende mfu fung'anyi kulya orukenyi lo wandu walempiṟa. Indi nyi Noe mwongoyi o wusumuhanyi na walya wake mfungade Ruwa nalewakiṟa kechiendye wuyana wo walemeshi mfu fulya fowarumatsa.

⁶ Na mṟi ya Sodoma na Gomora Ruwa kaikombetsa kombi kaikoṟa na modo kiwe kichano kya shindo shechihoya wandu wechikaa wapiṟe Ruwa.

⁷ Ruwa nalekiṟa na Loti ulya asumhanyi awei-mrohie adi nyi mhendekye fo walemeshi walya fuwei fo melu-melu.

⁸ Kyamba Loti nawei kiidi kyawo, na kafoi mrima foke fukasukio mnu kya mawuto halya hawo mawicho, halachihianyi na Ruwa. Sho shiwekeri itura mrima foke fusumhanyi.

⁹ Mndumii aichi iletsa wandu wamwidikie kiheshionyi kyawo, indi iwa walasumhanyi nyi aichi iwasuṟumya ngapo mfiri foanduo waipfo wechidehelyo.

¹⁰ Ngoseṟa mnu nyi walya wewingya seko tsa mbihu wawodo nyi wulangi wuterefutsie wakapiṟa wunene. Wo wandu waami, wakahakaha walaowuo iruma waapfinya wa ipfo huye na iwaisalucha.

¹¹ Napfo kundo wamalaika wa ruwehu wenyi pfinya na wuumi kota walosha wo wa wongo walaendeho mdumbuye yewaruma oshangunyi lo Mndumii.

¹² Indi wanduwo wai cha mando halai na wuṟango, hekeshao na lyefurumia hekyeshinjo, nyi wekeruma ishi walaichi. Wo wechirumatso kipfa kya wuwicho wowo wawenyi.

¹³ Wuṟundi wechikudaya nyi wusumhanye wumbafu wowo. Sia yawo nyi iwuta napata mfiri kui na sa ikyo kyose kya wuseṟeṟi wo wo kimbihu. Wo nyi walaala na wusutsu konu ili wechikaa nanyo ili wakeri ilya nanyo.

¹⁴ Meso hawo haichuo wuṟuhui, walaida wunyamaṟi. Wekyetuusa mrima ya wafafa ilai-mdamiṟe. Mrima yawo iichwo lango tsa masaa, wai wana wa oseso lo Ruwa.

¹⁵ Waleda njia njihoṟotsu wakaṟahaṟaha wewingya njia ya Beleamu mana o Beori alelanga wuṟundi wo wumbafu wulya.

¹⁶ Indi nyi alewonyo-ho owingo lo wutahachi woke wuwenyi. Nzoi ilekyededa lilededa na ṟu lya mndu o wandu, likakanga mhie fo mwikimbi ulya fuwei-mpfuluye fudi.

¹⁷ Nawo nyiwo wakeri cha soka tsilaṟukie mṟinga na cha mapuchi hamawiwite nyi otanu. Kilya kii-kiṟeheṟye-ho kyawo nyi kulya ṟungunyi lya meema.

¹⁸ Kyamba wo wekyekushela na madedo ha maai; wechituusa na lango njiwicho tsa nyamenyi kui mamelukameluka wandu, walya wamelekana msanzie fo wechumia kipfuṟi.

¹⁹ Wekewateṟya ikuachia, nawo wawenyi wai masinga ha wunyamaṟi. Kyamba mndu nai isinga lya ikyo kyose kimchilie.

²⁰ Kyamba kokoya iwa waledicha ngafu tsa wuyana kui imanya Mndumii na Mkiṟi odu Yesu Kristo, na numa wakaidikia iwingo na ichilia nyi wechioṟowyo nyitso lingi kyawo kifurumi kyechiwichuo ngoseṟa kota kya kuwoka.

²¹ Kyamba kyawo kiwechia kima walawemanya njia yo ya wusumhanyinyi, kota hando wameimanya wakaikumba mhongo wakaleha iwawaso lilya yele waleliambia.

²² Kikawewahoya kya mfanano fulya fohamba, “Kite kyekewuya-madaiko hakyo kimenyi na kila kingi kehamba, ‘Nguwe nsanje yekusinga kundo kupochikye.’” Nyi wudo kii kowo.