2PETRO 1 - Bibilia Kui Mdedie fo Kimochi

¹ Inyi Simeon Petro njii isinga lya Yesu Kristo na msu oke ngaiṟikiṟa iwa wai-watomoke wuidiki wumu na iwu wodu wuitikisi nawo tichi kui wusumhanyi wo Ruwa chu odu na mkiṟa Yesu Kristo.

² Wutonga na ofoṟo shimuwelukye welu kui imanya Ruwa na Mndumii odu Yesu.

Mui walahe na isambuṟo nyi Ruwa

³ Chando pfinya yake ya ki-Ruwa, Ruwa ammaa iluwonya shiende moo na wupfudi shose kui imanya ichu alelulaha na mweke fo wuitoṟi na wucha woke o amonyi.

⁴ Sho shatewa luinengo shasa sa shing'ianyi shiwode macha, kundu shimtane muwe wa-kita kimu mbika ya ki-Ruwa muweturuchukye odetso luwukye ipfo wulangenyi wo wuyana.

⁵ Nakyo nyikyo kimwenenge muitike-ho na kamu yende mbuka ncha ipfo wuidikinyi wonu; indi na ipfo mbukenyi ncha muende-ho wulaanyi.

⁶ Na ipfo wulanyi muendeho ikutumhaṟa, na ipfo kikutumhaṟyonyi muendeho ikutirisia na ipfo kikutirisionyi muende-ho wu-pfundi.

⁷ Na ipfo wupfudinyi muende-ho ikundana na wana wa wawama, na ipfo ikundanenyi na wanawawama muende-ho ikunda lilya ling'anyi.

⁸ Kyamba kokoya ishi shikeri konu shechiengeṟeka, shechimwinenga muwe watanyii na iwonaho kiira kya imanya Mndumii odu Yesu Kristo.

⁹ Kyamba ulya alawode isho o ai mpfu meso eidima iwonapfo na nahadimie imanya mandi ke alemsanjo manyamaṟo hake ha kacha.

¹⁰ Ili nyi wudo kii, nyo wanawawama, kimwamtse kawi muitike iwanza nandaho na msambuṟye iya mulelahio nyi Ruwa iwe ya kiheri kyose. Kyamba kokoya mochiwa wewuta shilya shilya mochiho ma indi-pfo.

¹¹ Mukamba mudo nyi mochiengeṟyo necha kimwitsa wumanginyi wo Mndumii na Mkiṟa odu Yesu Kristo wokaa mlungana.

¹² Nkyo kimaduma njechiwa momkumbuṟa kya shilya shilya mfiri yose ma ili mushiichi mui-waṟihike nyi kii-lohi iki muleambia.

¹³ Indi ngahamba nyi kisumhanyi njiwe njechimwamtsa-amtsa kui imkumbuṟya ilindi njikeri iya wuyana.

¹⁴ Kipfa njichi ke nyi kufui njileṟie mbihu fu fooepfa mbai chando Mndumii odu Yesu Kristo alenjimanyishya.

¹⁵ Indi njechipfuṟukana imuloṟa muidime ikukumbuṟya isho na orio kiheri kyose, ilindi njemaa ipfa.

Lulewona Wuitoṟi wo Kristo

¹⁶ Kyamba so lulawerianyi na shihano shii-shihanehane ilindi lulemwongoya pfinya ya icha lya Mndumii odu Yesu Kristo na mkae foke fui nao. Kya indi lulewona na meso hadu wunene woke.

¹⁷ Kyamba o aleambya wuindi na wuitoṟi wuwukye ko Ruwa Wande, matika halya ṟu lilemchea liche ipfo wuitoṟinyi wo huya shose likadeda lidi, “Ichu ai Manoko sa mkunde, achihianyi na inyi.”

¹⁸ Na ṟu-lyo luleliicho lichee ruwehu mandi luwei handu hamu nao ipfo kitonyohu kya fumvu lilya yeele.

¹⁹ Na lukuwode tapu na idedo lya wuikimbi. Mowuta kicha mochiliwada likeri kimui kyewaa ipfo kundo kukiwa itane kukye na nyenyeṟi ya hera idoe ipfo ngoonyi tsanu.

²⁰ Ngoseṟa ya isho, manyenyi iki kya kuwoka, ke orio Wuikimbi wo Biblia wochiwa idambuyo kui njia ya ki-wandupfo.

²¹ Kyamba kuipfo wuikimbi wulemendo kui kyama kya wandu manya-lepfo. Kya indi wandu waweipfo walededa kiwukye ko Ruwa wawewodo nyi Mumuyo Mwele.