1 WAKORINTO 9 - Bibilia Kui Mdedie fo Kimochi

¹ Alae inyi chi makuachia? Inyi chi msu? Chi njiwonye Yesu Kristo Mndumii odu? Nyo chi mui itana lyako njitanye Mndumii-hu?

² Kokoya inyi ndai msu o ko wengi kya indi njii msu konu nyo. Kyamba kitisiṟo kyemanyisha wusu woko nyi nyo ipfo Mndumii-hu.

³ Kiṟohwo kyako njekeṟohwo iwo wenjihesha nyi wudo kikeri.

⁴ Alae chi lui na pfinya yehenda ilya na inyo?

⁵ Chi lui na pfinya yekualikya mka ai manowama arianyi naso wamae wa Mndumii na Kefa?

⁶ Ang'u alae nyi inyi njimonyi na Barnaba lulai na momu foda maṟunda heluya moo?

⁷ Nyi asikari mki ekehenda shidenyi ma indi echikutaya wueri woke amonyi? Nyi o ku ekedonga msabibu alechilya mandunda hayo? Ang'u nyi o ku echilisa poo alechinyo maruwa ha poo lilya?

⁸ Alae njideda isho kya mbuka tsa wandu ang'u wuwawaso nawo wuhambye ishowo?

⁹ Kyamba ipfo wuwawasonyi wo Mose kuukuṟehye kuile, “Ma kulawone kochipfunga mbe dumbu yechituura ngano.” Alae Ruwa nyi akusaṟa kya mbe?

¹⁰ Ang'u chi adeda isho kipfa kyadu tichi? Ee-ng'u nyi shii-shiṟehye kipfa kyadu kehamba ke mdemi nawe modema kui mkusihye nao motuura ngano nawewa motuura kui mkusihye fo kuwonya ohawi lumsumhanye.

¹¹ Kikamba so lumdongye nyo shii sha Mumuyo, alae nyi kindo sa kinene kokoya losambuo shindo-hu shanyu shii sha mbihu?

¹² Kokoya wengi waiho wawode pfinya yekuwutya-ho ohawi lowo ipfo konu a so chi lya wueṟa? Kya indi so lulekuachia na pfinya iipfe, indi lokukarishya kya shindo shose kundu lulawone luwechiwikya ndumi ya sia ya Kristo tunja.

¹³ Mulaichi ke walya wepfuṟukanya sha hekalunyi nyi wekelya ohawi luwukye kosho, na walya wedasya-ho shidaso nyi wekehawyo sha rasionyi?

¹⁴ Na Mndumii na wudo awawasye ke walya weonguo ndumi ya sia ya okiio wakuwonye keluya moo kiwukye mwongoyenya.

¹⁵ Indi inyi njiwekutambye na pfinya i ma kya kimupfo. Manya chi ngaṟehya isho kundu kinyiwiie kidi inyipfo. Nanga njikupfie! Kuwode mndu ma kawa wu echifurunja kiṟumi kyakopfo.

¹⁶ Kyamba ma kikawa njiongwo ndumi ya sia ya okiio lyo linjiendie kiṟumipfo. Kyamba lyo limbode lii kitikima. Ochia loko kokoya ndaiongwo.

¹⁷ Cha kipfa ngatana iki kui ikunda lyako njiwode woṟunda woko. Kokoya kilai nyi ikunda lyako, kya indi wukaṟa wu na njimdambikye.

¹⁸ Ngashika oo woṟunda woko nyi wo iki? Nyiwo iwu, ke ili nyonguo ngalekya ndumi ya sia ya okiio njilatao, ndawese-ho kilya kimsumhanye kya kiheo kya ndumi ya sia yo.

¹⁹ Na ipfo kundo ngamba njido makuachia kya wandu wose nyi hondo njilekutana isinga lyesingya wose kundu njiwonye wandu wafoi lya wueṟa okiio lu.

²⁰ Na ngamewiia Wayuda cha mndu Myuda kundu njikuwonye Wayuda. Nyiwewiia walya wai shi ya wuwawaso cha njii shi ya wuwawaso kundu njikuwonye wai shi ya wuwawaso.

²¹ Walya walai shiya wuwawaso na ngamewawiia cha ili njilai shi ya wuwawaso. Nao inyi njilawuṟye wuwawaso wo Ruwa, kya indi njikuilikishye wuwawasonyi wo Kristo. Nyi njilewawiia njidi-le kundu njikuwonye walai shi ya wuwawaso.

²² Walya wefafaa njilewawiia mfafa nao inyi kundu njikuwonye iwo wafafa. Nyiwo wandu wose njiwe mawiia mkao yawo yose kundu njiwute-ho ikiṟa wandu kui njia tsose.

²³ Na inyi ngawuta isho shose kimaduma kya ndumi ya sia ya okiio kundu njiwe mokyando oyo.

²⁴ A mulaichi ke walya wetangyana kya ikapa mteeṟa nyi wekewikya mteeṟa ipfo pate-hu wose, kya indi mokoya kirekyo kilya nyi umu. Wikyenyi-ng'u mudo mteeṟa kundu mukiwade.

²⁵ Na orio morekyana nyi ekekuotoya kya shindo shose, kyasia nawo iwo nyi kundu waambye oṟo ya kiṟumi iya yechisia, kya indi so nyi kundu luwade iya ilechisia.

²⁶ Na inyi da njikapa mteeṟa njido chi cha mndu arichahyapfo, na inyi na wudo ili njikapa na nzina chi ngakapa njiashe hando hekapapfo.

²⁷ Kya indi nyitsana mbihu foko na ifuidikisha, kilawe ke ngammaa yongoya wengi na inyi njimonyi njiwe imndu lyekumbalyo ipfo.