1 WAKORINTO 8 - Bibilia Kui Mdedie fo Kimochi

¹ Na kya nyama tsiinjidasye maruwa ha wongo; na luichi ke so lose lui wenyi-wuṟango. Wuṟango nyi wokeende ikutumbasha indi ikunda nyi lyekepfunga mba.

² Kokoya mndu akumbuo ke ai na wuṟango woemanya kindo o amemanya njia wuṟango woṟunda nayopfo.

³ Chila nyi mndu akundi Ruwa; ichu nyi ammanye nyio.

⁴ Kyasia kya mlie folya nyama tsilya tsiinjidasye maruwa ha wongo na luichi ke maruwa ha wongo hakeri wuyana lohipfo, na ke kulaipfo Ruwa shile ichu umu.

⁵ Cha kipfa ma kokoya kuipfo wehambo maruwa kiwe nyi ruwehu ang'u nyi wuyana chando-ng'u kuwode wai maruwa wafoi na wandumii wafoi.

⁶ Kya indi so luwode Ruwa umu ai Wande. Nyio kimaenyi kya shose shii-ho na kiwuyonyi kyadu na ipfo koke. Luwode na Mndumii umu nyio Yesu Kristo. Kui mweke foke shindo shilemba shose, naso na kui mweke foke.

⁷ Kya indi wuṟango wu wukeri na wosepfo. Kwipfo weketsilya cha ili tsiinjidambikye maruwa ha wongo lohi, ngo tsa mrimenyi yawo, ili tsiinyifafa tsidi, tsikahenda ifanyitso.

⁸ Kya indi kando kaa na wucha wolusanza na Ruwapfo. Lukaalya lui na wo mwengeṟyapfo, lukada lulalya lohenda iwunyiṟyopfo.

⁹ Ke kuṟisenyi mulawone mkuachie fonu fuwe fochiendie walya wai wafafa kihutsa.

¹⁰ Kyamba mndu kakuwona iyo menyi wuṟango wu kudamye kiliyonyi ipfo kundo wadambikye shidaso shilya alae ngo tsa mrima fo mndu cho afafaa adi chi tsechikapyo owanzo natane alya tsiinjidambikye maruwa ha wongo?

¹¹ Na ulya mfafa kahenda idetso nyi wuṟango wu wopfo, nao ai nyi manowama msa Kristo alempfia.

¹² Na wudo ili muitahachia wanawawama wo na ikapa ngo tsa mrimenyi yawo ifafaa idi, nyio Kristo mukeri imtahachya.

¹³ Nkyo kimaduma kiti kelya kidekeshe manowama oko nyide ndalye nyama itane mlungana, ndashike tewa manowama oko nakape tuulya.