1 WAKORINTO 7 - Bibilia Kui Mdedie fo Kimochi

¹ Kyasia kya shindo shilya mulenjiṟehya ngamhaluo ke nyi nanga msoṟo nalakuwashe na mndu mka.

² Kya indi kyeringa wuṟuhui orio mndu nawade mka oke amonyina orio mka nakae na mii oke amonyi.

³ Mii nainenge mka oke kilya kimbaṟi, shiwudo nao mka naweinenga mii kilya kyake kimbaṟi.

⁴ Mka naitoṟye mbihu fokepfo kya indi nyi mii, shiwudo na mii naitoṟye mbihu fokepfo kya indi nyi mka.

⁵ Ma mulaimane shile nyi kui ikuteṟyana mwaanya kundu mukuwonye nafo suku tsetsinda kiterewonyi. Numa muwewuyanase kundu Satan nalashike imtewa kui iwuṟa lyanu lyewuṟa kiheo.

⁶ Indi ngahamba iki kyeikimba, chi ngakiwawasapfo.

⁷ Kyako inyi njikundi nyi kiile ke wandu wose wawe cha inyi njimonyi. Kya indi orio mndu ose ai msumbe nyi Ruwa kii kyake amonyi ichu nyi wudi na ichu nyi wudi.

⁸ Indi ngawia iwo walamealika na iwo wapfie mii njiile, nyi kicha wakukaye chando inyi njikeri.

⁹ Kya indi kokoya walaidima ikuima wakualikye. Kyamba nyi kii kicha yalika kota yaaka.

¹⁰ Kya indi iwo walemmaa yalikana le ngawawasa, na iwawasa li chi lyakopfo indi nyi lya Mdumii, ke mka nalalekane na mii oke.

¹¹ Indi komkoya amlekana nao na nakae ado alaaliko ang'u nahoṟyane na mii. Nao mii nalawone echisama mka oke.

¹² Kya indi wandu wengi ngawawia inyi chi Mndumii-pfo ke kokoya mndu manowama awode mka oke alai mwidiki nao mka chu akundi kukaya nao nalamsame.

¹³ Na mka mliwe awode mii alai mwidiki na mii chu akundi ikukaya nao nalade msoṟo chu.

¹⁴ Kyamba msoṟo chu alai mwidiki nyi aimwilishe kui manowama chu. Shila wudo wana wanu wawei wa ngafu, indi wulalu wai waele.

¹⁵ Kya indi ichu alai mwidiki kalekana nakulekanye. Hando ho manowama mndumii ang'u mka nampfungiṟyepfo. Kilya Ruwa alulahye so nakyo nyi kiidikyano.

¹⁶ Cha kipfa nyi uichi kuda, iyo mka, koka ochikiṟa miopfo? Ang'u iyo mndumiinyi uichi kuda kokoya ochikiṟa mka opfo?

Chumia chando Ruwa akulahye

¹⁷ Maṟi orio mndu ose nachumie chando Mndumii amteṟye; chando Ruwa amlahye nyi wudo nahendeke. Nkyo ikyo njekewawasya siṟi tsose.

¹⁸ Mndu kamelaho awei mdine nalakiṟike; mndu kamelaho alai mdine nalahende idino.

¹⁹ Kiende kiṟumi chi mkae fui mdinepfo ma chi mkae fulai mdinepfo, indi ihendelya mawawaso ha Ruwa.

²⁰ Orio mndu ose nakae mkae iya awei nayo iliindi amshike henda ilaho.

²¹ Komelaho ui isinga ma kulawone kosuo. Ma koshika iwonyo mwaanya fohenda lekio kukundye ikaa.

²² Kyamba ichu amhenda ilahyo Mndumii ai isinga nyi amba mtalae o Mndumii. Na wudo ichu amelaho ai makuachia nyi awewiia Kristo isinga.

²³ Mui wahuṟe na wuhuṟu wo kisale, mulawone mochiwiia wandu masinga.

²⁴ Orio mndu le, wanawawama, mkae fulya awei nafo iliindi amshika ilaho nyifo nakae nafo ai na Ruwa.

Mkae fo watengo na wakusu

²⁵ Kya marokya kyo njiwode iwawaso lya Mndumii-pfo, indi ngahamba mhie yako njii mtane mhendeli kui isaṟia lya Mndumii.

²⁶ Na iki ngahamba kii kicha kimaduma kya mafirita ha ki-wulalu kikeri kii-le ke kiwe kicha mndu nakae mkae ai nayo.

²⁷ Nyi ui mpfungye mka? Ma kulakunde ipfunguo. Kumdeye kudi kulampfungye mka? Ma kulapfule mka.

²⁸ Indi ma kokoya oalika uwode mtipfo. Na rokya likakualikyo liwode mtipfo. Kya indi wandu wo wai wado wechirohyo m mawina ha nyamenyi, na inyi ngakunda ihawaringa.

²⁹ Kya indi ngahamba-le, wanawawama, mwaanya fo iheri li nyi itika inyia fukeri. Mandi hatsuhae walya wawode waka wawe cha ili nyi walawode.

³⁰ Na walya wailia wawe cha ili walailia, na walya waichihio wawe cha ili walaichihio, na walya waihuṟa shindo cha ili walai wenyisho.

³¹ Na walya wailuya moo na mweke fo wuyana wu walawone wechiwulia ngula. Kyamba mbikye fo wuyana wu nyi isia fukeri.

³² Na inyi njikundi mukae mulakurohye. Ichu alaalikye ekekuwinyisha kya Mndumii ke nyi wuda echichihiṟa Mndumii.

³³ Kya indi ichu aalikye nyi ekekuwinyisha na sha wuyana wu ke nyi wuda echichihiṟa mka oke, kawa mokuletsana adi amonyi.

³⁴ Na mka alai na mii na rokya na wudi aikuwinyisha na kya Mndumii, kundu nawe mwele kui mbihu na kui mumuyo. Indi ichu amalike nyi ekekuwinyisha na sha wuyana wu ke nyi wuda echichihiṟa mii.

³⁵ Na iki ngadeda kundu kiwe kiira konu muwenyi, chi kundu njimkumbye kiwoho kyemchuruwuyapfo kya indi kundu mudamie Mndumii-hu tsee mui na wuwongoyi wose wulaweṟukye.

³⁶ Kya indi na kawa wu kawona akiṟa yendie rokya lyake wusutsu aimkuya rikonyina wudo kuwode-ho wuitiki wowuta kindo nahende iwuta kilya akunda. Chi atahachia handopfo, wakualikyane.

³⁷ Indi ichu ahoṟoki na ngoo yake ii njiwanzi nalawode kitikimapfo kya indi ai na chile tsewuta kyake akunda nao akuteseheṟye mrimenyi foke fumenyi naringe rokya lyake nyi awuta necha.

³⁸ Nkyo kimaduma ichu moalikya rokya lyake nyi awuta necha; na ichu alaalikya rokya lyake nyi awuta necha kota.

³⁹ Mka nyi ai mlungye mii mandi ho mii ai-ho na moo hose. Indi mii kamhenda ipfa nyi amlekyo ihenda yalikyo nyi orio mndu amkunda kihendewutika kui Mndumii da.

⁴⁰ Kya indi nanga lya wueṟa kokoya akukaya chando akeri, nyi wudo inyi ngawona. Na ngahamba na inyi njii na Mumuyo o Mndumii.