1 WAKORINTO 6 - Bibilia Kui Mdedie fo Kimochi

¹ Alae. Mndu o konu awode kindo kededa na odoe nawo ekarya imwanduya ipfo ko wa mkika nalache oshangunyi lo walya wai waele?

² Ma mulaichi ke walya wai waele wechiwonya wuyana wu mdumbuye fowo? Na kokoya wuyana wu woshika iwonyo mdumbuye ipfo kundo nyo muwode menge akashika mulasumhanye yadanya mondu ii mangu idi?

³ Mulaichi ke nyi lochiwonya wamalaika mdumbuye, denyi ishi sheluya moo!

⁴ Akawo nyo ili muwode kyeanduyana kya shindo sheluya moo nyi mokedamiṟa-ho walya walawode kiṟumi ipfo siṟinyi?

⁵ Ngahamba njido njimhutsye sonu. Na wudi muwuṟye mndu ai mṟango o ipfo kiidi kyanu awechiidima iletsana mndu na manomae.

⁶ Kya indi mndu manowama ekeanduyana na manomae nakyo nyi ipfo patenyilya walaidikye.

⁷ Nalyo ili muwodianyi mudi mondu muwenyi na wenyi nalyo liyenyi limwendie kihutsa. Kimaduma nyiki mulakunda iwutyo sha wukika? Kimaduma nyi ki mulakunda isoko?

⁸ Kya indi nyo muwenyi mokewuta sha wukika na isoka mokesoka. Na wandu walya mokewawutia mudo nyi wanawamanu.

⁹ A mulaichi ke wewuta sha wukika nyi walechioṟa wumangi wo Ruwa? Ma mulakulembe. Makiṟuhuya na mkiṟuhuyo wechioṟa wumangi wo Ruwapfo, manya weindya maruwa ha wongo; manya wetahachia wali, manya wesutsa wukika ang'u wumi.

¹⁰ Manya waiwi, manya wenyi-wuehi, manya makinango, manya makiruma, manya wasoki.

¹¹ Na wa mbaṟi itsi muwekeri maata wanu. Kya indi momesanjo. Kya indi momeilisho. Kya indi momesumhantso kui rina lya Mndumii Yesu Kristo na kui Mumuyo o Ruwa odu.

Mbihu iendye Ruwa Kiṟumi

¹² Shindo shose njikuwodie kyasho momu, kya indi chi shose shanjiwiia kya wuchapfo. Shose njikuwodei kyasho momu, kya indi njilawone njehenda ilimbo nyi kiliwe.

¹³ Shindo shelya nyi sha ndewu nayo ndewu nyi ya shindo shelya. Nao Ruwa echishikombetsa shi shiwi, ndewu na shelya. Indi mbihu fo mndu fuu-mbike fuwe fo wuṟuhuipfo kya indi nyi fo Mndumii, nao Mndumii nyi menyi mbihu fu.

¹⁴ Na Ruwa kashika iṟutsa Mndumii nyi echishika iṟutsa naso kui pfinya yake.

¹⁵ Mulaichi ke mbihu yanu nyi yo shiwungo sha Kristo? Akashika shiwungo sho sha Kristo wulalu njishiire njihende ishihaluo shiwungo sha makiṟuhuyo? Manya!

¹⁶ Mulaichi ke ichu alungana na makiṟuhuyo nyi amewa mbihu fumu nao? Cha kipfa ahambye, walya wawi wechiwa mbihu fumu.

¹⁷ Kya indi ichu alunganyi na Mndumii nyi amba mumuyo fumu nao.

¹⁸ Dichenyi wuṟuhui. Orio wunyamaṟi mndu awuta na wukeri kya nja ya mbihu foke. Kya indi ichu aṟuhuya nyi atanya mbihu foke amonyi wunyamaṟi.

¹⁹ Ang'u mulaichi ke mbihu fonu nyi fomba hekalu lya Mumuyo Mwele aikaa nanyo, ichu muleinengo nyi Ruwa. Nanyo chi mukeri wanu muwenyipfo.

²⁰ Cha kipfa muiwahuṟe na mtalo fo kisale. Kyo kimwitike muhende iṟumisha Ruwa chu kui mbihu fonu.