1 WAKORINTO 5 - Bibilia Kui Mdedie fo Kimochi

¹ Koichyo kundo kose ke konu kuwode wuṟuhui, na wuṟuhui wu nyi wo mbaṟi ileewa isenda ma ipfo ko wandu walaidikye wai, mndu nakae na mka o ndee.

² Nanyo mokutumbashya mulakunda ikuinadya kundo nahende iwuto ipfo kiidi kyanu icho atanye kindo kyo.

³ Na inyi ma ndakeri-ho kui mbihu indi njikukerye-ho kui mumuyo njilemmaa idumbuya mndu-chu aletana kindo kiwicho kido mdumbuye cha ili njiweiho.

⁴ Ngadeda kui rina lya mndumii Yesu luwodanyi nyo na mumuyo foko hamu na pfinya ya Mndumii odu Yesu.

⁵ Kyedambikya Satan mndu cho mbihu fohoṟuo kundu mrima fukiṟo mkonu fulya fo Mndumii.

⁶ Ili mukutumbashye mudi chi kichapfo. Mulaichi ke kitarang'asha sa kitutu kidutsye mbumba fo mso fose mtarang'ao?

⁷ Kyasia muahye kitarang'asha kilya kiku na nja kundu muwe mbumba mhya chando mui mulaiwawike kitarang'asha. Cha kipfa na pasaka yadu ilemmaa ishinjo, nyio Kristo.

⁸ Nakyo kyaenenga luachikie mkonu mnene iya yadu, chi kui kitarang'asha kilya kiku manya kui kitarang'asha kya wuporu na wuwicho kya indi kui shilaishitarang'ashe sha wusalari na wulohi.

⁹ Njilemṟehya na paruo iya ke ma mulasangane na waṟuhui.

¹⁰ Chi ngamhamba nayo waṟuhui wakeri na wuyana wu ang'u manyinyi ang'u wasoki ang'u weindya maruwa ha wongo wai nawo. Kiwei kido kiwemwitika muwuke iya wuyana.

¹¹ Kya indi wulalu kilya njilemṟehya kiwei kii-le, ke mulasangane na mndu a mlahe manowama nao awa mṟuhui ang'u inyinyi ang'u moindya maruwa ha wongo ang'u mokiruma ang'u makinango ang'u msoki. Mndu o mbaṟi ii ma ilya mulaidikye ilya nao.

¹² Kipfa nyi kiki kimbode njidumbuye wa ora lo nya mdumbuye? Chi kyanu kyewonaya wa ora lo kya mba mdumbuye sho?

¹³ Indi iwo wakeri ora lo nja nyi Ruwa echiwawonya mdumbuye. Funenyimbafu ulya ipfo kiidi kyanu.