1 WAKORINTO 4 - Bibilia Kui Mdedie fo Kimochi

¹ Na wudo so orio mndu nalutane waṟundi wa Kristo na waheki wa kyama ki-koome kya Ruwa.

² Kikawa kido kitsuhae kyeringa waheki nyi nashike iwono ai mteechi.

³ Kokoya ngahenda idumbuyo n-nyo mdumbuye mliwe ang'u nyi ngadumbuyo nyi menge ya kiwandu kiwe lyo likerye inyi kindo sa kitutu. Ma inyi ngakudumbuya mdumbuye njimonyipfo.

⁴ Kyamba njilaichi kitewe. Kya indi ki kyansumhantsakyo, modumbuo kyako nyi Mndumii.

⁵ Nkyo kimaduma mulahende idumbuo kiheri kilandewiṟa itane Mndumii ache ichu echiendie senyi shindo shii-shiṟikishe meemenyi na itambaṟuya necha patehu chila tsikuwode ngoonyi Mandi na halya orio mndu ose kiṟumi kilya kimsumhanye nyi echiwikyo nyi Ruwa.

⁶ Nasho wanawawama, ngameshihalutsya ora lo kodu so na Apolo kimaduma kyanu, kundu mukuwutye kodu imanya ke kulatole shilya shii-shiṟehye, kundu ichu umu nalakushelye-ho kya ichu umu kechilehana na wengi kya ichu ungi.

⁷ Kyamba nyi o ku akuwika iyo mdonyi. Nyi kiki ukiwode ulakiambye? Na kiwe nyi ukiambye nyi kyaki ukushela cha nyi kulakiambye?

⁸ Mulemmaa ihuda mulemmaa ikusuṟia mulemmaa iwada wumangi tare so? Na kiwechiwa nanga mukawewona wumangi wu kundu naso lukae wumanginyi wu handu hamu nanyo.

⁹ Kyamba ngahamba ke Ruwa alutanye so wasu luwe wandu wakinga numa luwe wepfa lukamewiia wuyana ṟiho lyeṟihisha wamalaika na wandu.

¹⁰ So lui matondo kimaduma kya Kristo, indi nyo mui waṟango kui Kristo. So nyi wafafa indi nyo nyi wawanzi. Nyo mui na kiṟumi kicha so lui na wusutsu.

¹¹ Luwodo nyi njaa na nyoda shika saa ii lui nayo wulalu tichi lu wakuye maṟao lukapo ngapo lulawode kanyi kokaa.

¹² Luiwina lochiluya moo kui maṟunda ha mawoko hadu luwenyi. Hando lohenda irumo nyi lowika-ho ona, hando lohenda iterengyo nyi lokutirisia.

¹³ Hando lohenda iiryo kui wongo nyi lokededa kya wucha. Lui-watane maseheṟo ha wuyana luwembiia wose kindo kya manyeena shika inu.

¹⁴ Ishi chi ngashiṟehya kundu njimhutsye sonupfo, kya indi kundu njimtutume nasho mui wana wako wakunde.

¹⁵ Ma muwei na waichi wemwichia Kristo shiku na shiku chi muwode mudi na wemfee wafoipfo, kyamba nyio inyi njilemfee njii Kristo-hu kui ndumi ya sia ya okiio.

¹⁶ Nkyo kyantewa ngamtutuma ke muwe mokuwakisha na inyi.

¹⁷ Nkyo kimaduma ndeduma Timoteo ipfo konu ai mana oko mkunde ai na mhendeli o Mndumii-hu, nyio echimkumbuṟa mhendeshye yako ya Kristo-hu iya njekeilosha orio siṟinyi hando hose.

¹⁸ Kwipfo wakuṟumbashie cha ili ndaicha na konu.

¹⁹ Indi njechicha na konu owinyi Mndumii kamkunda njechikaa njitichie kilya wakuidimye chi kilya wakudedye.

²⁰ Kyamba wumangi wo Ruwa wukukerye kundo kudedopfo kya indi nyi ipfo kundo kuwuto.

²¹ Kilya mukundi nyi kiki? Njiche konu njirie iṟiiga ang'u njiche njirio nyi mkundye na mumuyo mwoloṟu?