1 WAKORINTO 3 - Bibilia Kui Mdedie fo Kimochi

¹ Na inyi le, wanawawama wako, njileidima ideda nanyo cha wa kimumuyopfo kya indi cha wa kimbihu, cha wana wa kikristo.

² Njilemurutsa maruwa njilalemwinenga kelya kyumu kipfa mulawemekiidime. Ee ma wulalu moekiidima-pfo.

³ Kyamba ma wulalu da mukeri-se wa-kimbihu. Kyamba ili ipfo konu kuwode wunyenyi na wuṟingi chi mui wa-kimbihu mochikuhendeshya mbaṟi ya kiwandu?

⁴ Nyi kokoya kwipfo ehamba, inyi njii o Paulo, na ungi ehaba, inyi njii o Apolo, chi ideda mbaṟi ya kiwandu mui?

⁵ Alewo Apolo nyi ai ki, na Paulo nyi ai ki? Nyi wakeri wapfuṟu-kanyi mulemidikisho nyiwo na orio ose aweiṟunda kiheo kilya Mndumii alemnenga.

⁶ Inyi ndewaya Apolo kanosa, kya indi moalutsa shose nyio Ruwa.

⁷ Kokoya nyi wudo kii mowaya chi kindopfo ma ichu monosa chila Ruwa moalutsa nyio.

⁸ Kya indi mowaya na monosa wahianyi, na orio owo echiwona woṟunda woke wumsumhanye o wuidikyanyi na mawina hake.

⁹ Kyamba so luiṟunda kimu na Ruwa, nyo mui ndonga ya Ruwa, mui wiko lya Ruwa.

¹⁰ Kui kiheo kya wutonga wo Ruwa njii-msumbe nyi ngamewika kiwanja cha mpfuru mṟango na ungi kawika-ho mba. Kya indi orio ose moiwika-ho naṟunde na osaṟe.

¹¹ Kyamba kulaipfo mndu aidima iwika kiwanja kingi shie nyi kilya kilemmaa iwiko, nyikyo Yesu Kristo.

¹² Na kokoya mndu awika kiwanje-hu ki sahabu ang'u fesa ang'u maho maili pang'a ang'u shidi ang'u nyatsi ang'u mamwahiṟo.

¹³ Kyasia kiṟundyo kya orio mndu kyechiwoneka na pata, kyamba mkonu fulya fulya fochikimanyisha kipfa nyi fochikuwonekya furie modo, na modo fu fumenyi nyi fochihamba kiṟundyo kya orio mndu ke nyi kiwei kya mbaṟi nki.

¹⁴ Kiṟundyo kya mndu awikye-ho kikakaa-ho kiwangi echiambya woṟunda woke.

¹⁵ Kiṟundyo kya mdu kikasenekya echiwudetsyo, indi o amonyi echiletso likawa cha lya mndu mokiia modo.

¹⁶ Mulaichi ke, nyo nyi hekalu lya Ruwa na ke, Mumuyo mwele ai mokaa nanyo sho?

¹⁷ Kokoya mndu anyamaṟa hekalu lya Ruwa, na Ruwa echinyamaṟa mdu cho. Kyamba hekalu lya Ruwa lii yele, nalyo nyi nyo.

¹⁸ Kulakae-pfo echikulemba amonyi. Kokoya kwiipfo konu akuwona amonyi ke aa mṟango na maindi ha kiwulalu, nakuwiie tondo nakuwutie-ho ihenda ṟanguo.

¹⁹ Kyamba wuṟango wo wuyana wu nyi wutondo ipfo sumuhana na Ruwa. Kyamba kii-kiṟehye kii-le, “O nyio mochawilia waṟango ipfo mlemekonyi yawo.”

²⁰ Na lingi-se lyehamba, “Mndumii aichi makusaṟo ha waṟango ke nyi hai ha maai.”

²¹ Kokoya nyi wudo kii kulakae-pfo echiku-shela na mndu o wandu kyamba nyi hanu hose.

²² Liwe nyi Paulo, liwe nyi Apolo, liwe nyi Kefa, liwe nyi wuyana wu, liwe nyi moo, liwe nyi opfu liwe nyi shindo shi-ho liwe nyi shilya shekaa shiwe, shose nyi shanu.

²³ Nanyo nyi mui wa Kristo, na Kristo nyi o Ruwa.