1 WAKORINTO 2 - Bibilia Kui Mdedie fo Kimochi

¹ Na inyi lyandi ndecha na konu-le wanawawama, njechimwongoya kiṟingishyo kii-kiwike nyi Ruwa njilalecha na mtandawuko fo madedo na fo wuṟango.

² Kyamba njilalehamba njiichi kindo ipfo konu shile nyi Yesu Kristo nao nyi ili ambambye adi msalabenyi.

³ Njiwekukerye konu na mkao fo wufafa na wuowu na mdedema.

⁴ Na ili njiweideda na yonguo ma njileidimaidima na wuṟango woitika iwinapfo kya indi njiwemanyishya-ho Mumuyo na pfinya.

⁵ Kundu mwidikye fonu fulakae wuṟango-hu wo ki-wandu kya indi wuwe fu-mbike kui pfinya ya Ruwa.

Wuṟango wo Ruwa

⁶ Sha wuṟango na lushiwode sheongoya walya wai waholoki, indi wuṟango wu wulai wo maindi ha ki-wulalu manya wo waitoṟi wa ki-wulalu ki kyerumara.

⁷ Kya indi luihamba wuṟango wo Ruwa wo kisenyi wui wukoome wusa Ruwa aweteṟye. Maheri halawendewiko woluwonya so wuitoṟi.

⁸ Kyawo waitoṟi wa maindi ha ki-wulalu walawewuichi ma umu-ho. Cha kipfa nokoe wawewuichi wawechiwambya Mndumii menyi wuitori msalabenyipfo.

⁹ Kyakyo kikeri chando kiikiṟehye, “Shilya riso lya mndu lilawewona ma kudu kulaweicho, manya shilaweida na ngoonyi ya mndu o wandu, nyisho Ruwa aweshiṟeheṟye walya wamkundi.”

¹⁰ Natso nyio Ruwa alelutaṟa-mbuya kui Mumuyo. Kyamba mumuyo asumye shose na shiṟike sha kisenyi kya Ruwa.

¹¹ Kyamba ipfo wandunyi nyi o ku aichi shilya shiwode mndu shile nyi mumuyo fo mndu fui nao? Nyi wudo na shilya sha Ruwa kulaipfo msa aichi shile Mumuyo o Ruwa.

¹² Natso lulaleambya mumuyo fo wuyana, kya indi nyi Mumuyo awukye ko Ruwa kundu lukuwutye-ho imanya shilya luiwasumbe nyi Ruwa chando shii.

¹³ Nasho nyisho luideda kyasho chi kui madedo ha-masungusie na wuṟango wo kiwandu, kya indi ha-mawike nyi Mumuyo, lochiṟinganyisha shilya sha Mumuyo na mweke fo Mumuyo.

¹⁴ Indi mndu o mhendeshye fo kiwandu ekeambyana na shilya shii sha Mumuyo o Ruwapfo, kyamba shembiia wutondo nalaidime ishimanya, kipfa shekewa itichyo kui njia ya Mumuyo tupu.

¹⁵ Indi mndu msumbe Mumuyo eketichya shose nao amonyi alawa itichio nyi mndu.

¹⁶ Kyamba nyi o ku aichi mhie ya Mndumii awechimloṟa njia. Indi so lui na mhie fo Kristo.