1 WAKORINTO 16 - Bibilia Kui Mdedie fo Kimochi

¹ Kya kisango kilya kesangya waele walya muhende iwuta chando ndewawasa siṟi tsa Galatia.

² Ke orio mkonu fo kuwoka fo mfungade orio mndu o ipfo konyu nakuleṟye ipfo kanyi koke kiteseheṟyo amwonyishe nakyo kundu kisangokyo kilawone kyechianga isanyo inyi ngamemaa icha.

³ Na inyi ili ngamwafukya walya mochiwasambuṟa njiwadume na paruo wahende iduo oleki lonu kulya Yerusalemu.

⁴ Indi kiwe lochifo necha njihende nao inyi nyi wechihenda kimu na inyi.

Makusaṟo ha Paulo

⁵ Kya indi njechicha na konu ngamaa ikuidya ipfo Makedonyia. Kyamba ipfo Makedonyia ngaida-ho kya ikuidya tupu.

⁶ Indi ipfo konu kokoya kyawa nyi njechikaa-pfo ma itsinda-ho na mta fo mbeo kuhenda.

⁷ Kyamba ndakundi wonana nanyo wulalu njechiida tupu kipfa njikusirye kekaa konu kiheri kiliwe na mweke fo Mndumii.

⁸ Kya indi njechikaa Efeso itane Pentekoste.

⁹ Kyamba njii mpfunguye mongo sa mnene foduo maṟuṟukanyonyi, kuwode na walemanyi wafoi.

¹⁰ Kya indi ili Timoteo acha mutambahanye kundu nakae konu alawodo nyi wuowu. Kyamba aipfuṟukanya kyando kya Mndumii kimu na inyi.

¹¹ Ma kulakae-pfo echimmina, indi mumsamye na koko kipuo; kyamba nyi njimbedye kimu na wanawawama.

¹² Indi kya Apolo chu manowama nyi ndemterewa mnu ke nache na konu kimu na wanawawaam, nao kaleha ihenda wulalu pichu; kya indi echicha ili echiwona daawa.

Madedo ha ifurumia

¹³ Laenyi choowe, hoṟokenyi na wuhoṟotsu wo mwidikye, muwe womi muwewa ngohoda.

¹⁴ Shindo shanu shose shitanjike kui mkundie.

¹⁵ Ngambawasa-se kimu, wanawawama. Nyi muichi ke Stefano mba yake nyiyo mboki ya Akaya nawo wakuwikye kipfuṟukanyonyi kyepfuṟukanya waele.

¹⁶ Kyasia idikyanenyi na wandu cha iwa na orio mndu moṟunda kimu nawo na ikuwinyisha.

¹⁷ Na inyi njii mchihie kya Stefano na Fortunato na Akaiko wakukerye na inyi. Nyi walenjiichuṟya pacha peche lyanu.

¹⁸ Kyamba wanjiwihiṟye mumuyo foko moo na fonu nawo. Kyasia wado cha iwo wamanyenyi,

¹⁹ Pirisika wamwiṟikiṟa mnu kui Mndumii handu na siṟi ikeri ipfo mba kowo.

²⁰ Wanawawama wose wamwiṟikiṟa. Iṟikiṟanenyi kui ihekyana momu yele.

²¹ Aiki kiṟikiṟo kyako inyi Paulo kui owoko loko njimonyi.

²² Mndu ma kawa u msa alakundi Mndumii nawiko ṟisenyi. Maranatha.

²³ Wutonga wo Mndumii Yesu wukae nanyo.

²⁴ Kikunda kyako kii nanyo mose mui Kristo-hu Yesu.