1 WAKORINTO 15 - Bibilia Kui Mdedie fo Kimochi

¹ Indi ngamkumbuṟa, lanye wanawawama, ndumi ya sia ya okiio ndemuongoya nyiyo muleiambya mukuilikye nayo.

² Na ikiṟo mohenda ikiṟo nyiyo, komkoya muwode mbonyi tsilya ndemuongoya tapu. Kilawe nyi muleidikya msangachale.

³ Kyamba ndemwendie nyo kilya ndekiambya na inyi, kya kuwoka ke Kristo apfie kitewe nyi njonyamaṟo tsadu chando kuwei kuṟehye.

⁴ Kiidima na ke nyi amṟike na ili lya kaṟaṟu aṟukye chando kuwei kuṟehye.

⁵ Kiidima nao ke nyi alekuloṟa na Kefa, kiidima na walya ikumi na wawi.

⁶ Kiidima kawekuloṟa na wanawawama wafooya mahana hatanu handu hamu, kyawo wafoi waiho-se na moo itane inu, na wengi maata walemhenda ilaa.

⁷ Kiidima kakuloṟa na Yakobo kawekuloṟa na wasu wose.

⁸ Likingye wose kakuloṟa na inyi njii cha msa amfee kiheri kilahsikye.

⁹ Kyamba inyi nyi mtutu o wasu ndaiho molaho msu kipfa nyi ndewa mokisakisa siri ya Ruwa.

¹⁰ Kya indi kui wutonga wo Ruwa nji chasa nji, na wutonga wu woke wunjikerye chi wulewa wo wulyapfo kya indi ngamewinya kya wueṟa kota wo wose, ma chi inyipfo shile nyi wutonga wu wo Ruwa wukeri na inyi.

¹¹ Kake kokaa nyi inyi kokaa nyiwo, nyi wudo lokeongwo mukaweidikya mudo.

Iṟuka lyadu

¹² Kyasia kokoya kokeongoyo kya Kristo ke aṟumka ke nyi kulaipfo iṟuka lya wapfu?

¹³ Kya indi kokoya-ng'u kulaipfo iṟuka lya wapfu na Kristo nao naleṟukapfo.

¹⁴ Indi kokoya Kristo alaleṟutso kyasia-ng'u na mwongoye fodu na fowewa fo maai na mwidikye fonu nafo.

¹⁵ Natso luwewono ke nyi luwei waṟingishi wa Ruwa na wongo ili luweṟingishye kindo kilemanyina Ruwa luwehamba ke o aṟutsye Kristo nao alamṟutsye komkoya nyi kii ke wapfu walechikaa waṟutso.

¹⁶ Kyamba kokoya wapfu walechiṟutso, nao Kristo naleṟutsopfo.

¹⁷ Na kokoya Kristo alamṟutse mwidikye fonu fukusirye na kindo kii wulya, nanyo mukukerye-seho muriwo nyi manyamaṟo hanu.

¹⁸ Akawo na walya-ng'u walemhenda ilaa wekusirye na Kristo nyi wawedeka.

¹⁹ Komkoya lukusihye na Kristo kya moo fu lufurie wulalu tupu nyi luwewa wandu welilia kota wengi wose.

²⁰ Kya indi wulalu Kristo aṟukye-ng'u wapfunyi, nyi amba mopaṟasaka o walya walee.

²¹ Kyamba ili opfu lui-uende kitewe nyi mndu umu na wudo-ng'u na iṟuka lya wafu likawa liwukye ko mndu umu.

²² Kyamba chando waihenda ipfa kui Adamu ulya wose na wudo-ng'u wechihenda iṟutsyo moo kui Kristo wose.

²³ Kya indi orio mndu ose na itumana limsumhanye, mboki nyio Kristo numa walya wake o Kristo ili echiwuya.

²⁴ Numa nyi imarisyonyi lya shose ili indi adambikya Ruwa Wande wumangi kammaa irumatsa wuitoṟi wose na wunene na wuapfinya.

²⁵ Kyamba nakaki nakae awode wumangi wu naitoṟye natane aleṟya wakituwa wake shi ya madende hake wose.

²⁶ Mkituwa echikaa nafurumye iwuto-ho nyi opfu.

²⁷ Indi mandi halya amshika ileṟyo shi yake shose

²⁸ nao amonyi o Mana echikuleṟya ichu alemeṟya shose kundu nao Ruwa nawe menyishose mohomuo shose.

²⁹ Alewo wepatisa walya nyi wechikuwutya-ho ki wakupatisyo wai wepfa? Kokoya wepfa walashika iṟuka manyale nyi ki wakupatisyo kyawo?

³⁰ Natso nyi kili luikumba moo orio saa tsose?

³¹ Njikeri mopfa o mfiri yose soo nyo mui kiichiko kyako, wanawawama, njekuichika nakyo kui Kristo Yesu Mndumii odu.

³² Kokoya nyi kiwei kya wandu tupu ili njilekapana na mando malang'a kulya Efeso kyanjiwukya-ho nkyo iki? Kokoya wapfu walashika iṟutso, kyasia luwe lochilya na inyo kyamba nyi ngama lohenda ipfa.

³³ Ma mulalembike; sumu njiwicho tsekenyamaṟa sonu njicha.

³⁴ Ṟamkenyi necha ma mulatahachie hando; kyamba kuwode walaichi Ruwa; nakwipfo echiwesa, aa wuda wapfu washike iṟutso ngesa? A nyi wechicha warie mbihu ida ko?

Mbihu fo iṟuka

³⁵ Kya indi kulako kwipfo echiwesa, aa nyi wuda wapfu washike iṟutso ngesa? A nyi wechicha warie mbihu ida ko?

³⁶ Ili iyo! Mbeu okumba wanda yechiwuya ido yaluke chia yasongu ipfapfo.

³⁷ Na kilya owaya nakyo mbumbie fulya fui-mteṟye fuwepfo kya indi nyi kitaṟe kya kimboma, kiwe nyi kya Ngano ang'u nyi kya kilimu kya mbaṟi tsingi.

³⁸ Kya indi Ruwa nyio akinengye mbumbye yakyo chando alekukundya kaweenengya orio mbeu mbumbye foyo iinjenyi.

³⁹ Nyama tsiipfo tsose chi nyama tsimupfo, ya mndu o wandu nyi ingi na ya mando nyi ingi na ya malehe nyi ingi na ya makunga nyi ingi.

⁴⁰ Na wudo kwipfo na mbumbye ya kiruwehu na ya wanda ii, kya indi kiweṟe kya iya ya ruwehu nyi kingi na kya iya ya wanda ii nyi kingi.

⁴¹ Kiweṟe kya mengeṟi nyi kingi na kiweṟekya mweri na kingi na kiweṟe kya nyenyeri na kingi; kyamba nyenyeri na nyenyeri tsilachikye kui ngela.

⁴² Kyasia na wuṟdo kii na kya maṟukyenyi ha wapfu. Koṟiko kyechipuo, kochiṟutso kilekipuo.

⁴³ Kokeiiko kifanyi kochiṟutso kiila; koṟiko kii na wufafa koshika iṟutso kii na pfinya.

⁴⁴ Kokeṟiko mbihu fo mrima kochiṟutso mbihu fo mumuyo. Chando kwipfo mbihu fo mrima nyi wudo kwihona fo mumuyo.

⁴⁵ Nyi kuukuṟehye kudi, Adamu mndu o kuwoka nyi alewa mrima fuwode moo.

⁴⁶ Chi fo mumuyo fosonguopfo indi nyi fo mrima fui fo kuwoka, numa kukachang'u fo mumuyo.

⁴⁷ Mndu o kuwoka awukye terinyi ai teri, mndu o kawi ulya awukye ruwehu.

⁴⁸ Mbaṟi ya ichu o teri na ya walya wai teri nayo, na mbaṟi ya ichu o ruwehu na ya walya wa ruwehu nayo.

⁴⁹ Na so lukamemaa iṟaa mfananye fo ichu o ruwehu.

⁵⁰ Kindo ngahamba le wanawawama, nyi iki, ke shi-nyama na samu sho shaidima yoṟa wumangi wo Ruwapfo. Ma kipuo kyaoṟa kilechipuopfo.

⁵¹ Ambuyenyi ngamuwia kii kiṟikie, ke lulechihenda kulaya lose, kya indi lochiilachika lose.

⁵² Waṟu cha ili okema kiheri kya ombe lofurumya; kyamba kochikapo ombe na wapfu wechiṟuka warie moo fulechisia naso lochiilachika.

⁵³ Kyama na kikaki kipuo ki kiṟae kilapuo na kyepfa ki kiṟae kilepfa.

⁵⁴ Kyasia ili kyepuo ki kyekaa kiṟae kilepuo na kyefa ki kirae kilefa nalyondi idedo lilya lii-iṟehye lyechihoya lilya lihambye, opfu lui-umeṟe nyi mbinzi.

⁵⁵ Hoo iyo opfu wuwinzi wopfo nyi ku wui?

⁵⁶ Hoo-iyo opfu lokapa nyilo wunyamaṟi, na pfinya iya wunyamaṟi wuiṟie nyiwo wuwawaso.

⁵⁷ Kya indi Ruwa nahende iwikyo mwaano ichu moluinenga wuwinzi kui Mndumii odu Yesu Kristo.

⁵⁸ Nkyo kimwenenge, wanawawama mui wakunde, mukae mui wawanzi mulechisingida, muitike itana kyando kya Mndumii kui mwengeṟya mfiri yose ochimanya owino lonu lulai lo maai mukukerye Mndumii-hu.