1 WAKORINTO 14 - Bibilia Kui Mdedie fo Kimochi

¹ Lalakyenyi mkundie fu muwe mochilanga shisumbo sha Mumuyo, indi kilya kii kinene nyi kundu muhendetambahaluya.

² Kyamba ichu modeda mdedya Ruwa. Kyamba kulaipfo mndu moicho, indi awa modeda sha kisenyi kui Mumuyo.

³ Kya indi ichu motambahaluya nyi adedya wandu kyewaholotsa na iwaṟamtsa na iwakarisha.

⁴ Ichu aideda mdedye fo shiṟuma nyi ekekuholotsa amonyi, indi motambahaluya o awa moholotsa siṟi.

⁵ Na inyi njiwekundi muwededa mdedye ya shiruma nyo mose, kya indi kilya njiwekundi kya wueṟa nyi kundu muwewa wetambahaluya. Kyamba icho motambahaluya nyi mnene kota ichu modeda mdedye fo shiṟuma kulawode awa na moshidambuya, siṟi ikuwutye-ho iheda holotso.

⁶ Alewo wanawawama, kokoya ngamchea njededa mdedye shiṟuma nyi kiira kiki njembonya ngamda ndadeda nanyo otambahaluyo ang'u wulaanyi ang'u odambuyo ang'u mapfundo.

⁷ Ma koka nyi shindo shilai na moo ili shalekya maṟu kiwe nyi mtoṟiṟo kiwe nyi kinubi (nyi wuda lyekapa lii na ndusu mfungade), shilamlekya maṟu hailachanyi kechimanyika kida ke nyi kiimbo kiki kikapo nyi mtoṟiṟo ang'u nyi kinubi?

⁸ Kyamba na ombe lo shida koka lolekya ṟu lilamanyikye nyi o ku echikuṟehyeṟa kya ihenda kiwahanyonyi?

⁹ Shi wudong'u nanyo na mdedye fonu fo shiṟuma, kokoya modeda lilamanyikye, nyi wuda kochimanyika-ho kilya kiidedo ngesa? Kyamba moewa wededa mkume-hu tupu.

¹⁰ Kunu wuyana kuwode mdedye ya mbaṟi sa tsifo, manya kulaipfo ma fumu fulatambahaluka.

¹¹ Kyasia-ng'u komkoya ndamanya mhambye fo kishomo kilya njechiwiia mokideda ulya ndaicho, nao modeda ulya echinjiwiia inyi mndaicho.

¹² Na wudo nanyo ili mulalakye mudo sha mumuyo kundenyi ilanga sheholotsa siṟi mushike isuṟyo.

¹³ Nkyo kimaduma ichu modeda fo shiṟuma naterewe-ng'u nainengo pfinya yedambuya.

¹⁴ Kyamba kokoya ngaterewa kui shiṟuma nyi mumuyo foko fuiterewa-ho indi mhio foko fulawika kindo.

¹⁵ Akashika nyi kyawa-se kida? Nyi njechiterewa kui mumuyo, njiweterewa na kui mhio; njichiimba kui mumuyo njiweiimba na kui mhio.

¹⁶ Cha kipfa kokoya iyo oterewa kui mumuyo ochiana na ichu adamya kidembo-hu kya mndu alaichi nyi echiidikya kindo uihamba?

¹⁷ Kyamba iyo ee nyi uiana necha, kya indi ulya ungi akuwutia-ho ihenda iiropfo.

¹⁸ Inyi ngaana Ruwa kimaduma nyi njekededa fo shiṟuma ngamweṟa nyo mose.

¹⁹ Kya indi ipfo kundo siṟi iisanze ngakukundika ideda ma madedo cha hatanu kui mhio foko hawe hechilosha wengi kota ideda madedo kiku kui shiruma shilya.

²⁰ Wanawawama, ma mulawone mochiwa wana kui wutichi wotichia mbonyi muwe wandu watimye.

²¹ Ipfo wuwawasonyi kuu-kuṟehye kuile; Njechideda na mkambo fu kui mweke fo wenyi-shishomo shingi na kui momu ya wahemu; manya waidedyo wado wechinjiichopfo. Mndumii nyi wudi ahambye.

²² Nkyo kyaenenga mdedye ya shiṟuma yawa kichano chi kya waidikipfo kya indi nyi kyemanyisha walaidikye; indi odambukyo lulya lo lukerye chi walaidikyepfo kya indi walya waidikye.

²³ Kyasia-ng'u kokoya siṟi yose isanzi handu hamu na wose washike ideda kui shiṟuma kishika kukaida napfo wandu walaichi ang'u nyi walaidikye alae chi wechihamba nyi wusuko wumbode?

²⁴ Kya indi kokoya wahoya idambuya wose kukaida napfo mndu alaidkiye ang'u alaichi mbonyi nyi ahenda idedyo nyi wose,

²⁵ na ihenda iwonyo owingo na pata, na wudo echiho wanda kewikya Ruwa wuindi na ihamba na pata ke Ruwa asanganyi na nyo.

Chile tsa siṟi

²⁶ Alewo wanawawama, nyi kukuwukyeho ki? Orio mandi mosanza handu hamu nyi orio mndu onu awode kiimbo ang'u opfundo ang'u otambahaluyo ang'u shiṟuma ang'u odambuyo; isho shose shitanyike shewembesha kiwimbi.

²⁷ Kokoya mndu adeda kui shiṟuma wadede wawi washika ifo wawe waṟaṟu nahong'u, nawo wadede kui makamba, na umu nashidambuye.

²⁸ Kya indi kokoya kulaipfo modambuya nakutsie ipfo kisanzyonyi nakudeye kikoke amony ai na Ruwa.

²⁹ Indi waikimbi wadede wawi ang'u waṟaṟu na wengi watambahaluo.

³⁰ Kya indi sa adambye kamanyisho idedo, ulya o kuwoka nahende itsia.

³¹ Kyamba nyi moidima iikimba nyo mose umu umu wawuteho ikulosha wose na ihenda wihiṟyo moo wose.

³² Nayo mumuyo ya waikimbi nyi yekaa yechiidikya waikimbi.

³³ Kyamba Ruwa alai o mtandawuko kya indi nyi o ofoṟo.

³⁴ Kiwe chando kikeri ipfo siṟinyi tsa waele tsose ke waka watsie ipfo shisanzyonyi sha siṟi, kyamba walai-waenenge momu fodeda kya indi wawe wenyi-wuindi chando nawo wuwawaso wohamba.

³⁵ Wakakunda ikulosha kindo wawese wamii wawo kulya kanyi kowo kyamba nyi kiendye mndu mka sonu ili adeda kisanzyonyi kya siṟi.

³⁶ Alae nyi ipfo konu dedo lya Ruwa lipaṟikye ko? Ang'u nyi konu kwenyi likushikye ko?

³⁷ Kokoya kwipfo ahamba ke nyi ai mwikimbi ang'u mndu o mumuyonyinahoneṟye ishi ngamuṟehya nyo ke shikeri sha mawawaso ha Mndumii.

³⁸ Indi kokoya mndu akileha nyi ahenda ileho.

³⁹ Ili kyamba kido, wanawawama, muitike ihenda dambuya, na ideda kui shiṟuma mulaiime.

⁴⁰ Indi shose shitanyike kui wuindi na ki osenge.