1 WAKORINTO 13 - Bibilia Kui Mdedie fo Kimochi

¹ Ma ngadeda shishomo sha wandu na sha wamalaika, na inyi njiwuṟye ikunda njiwewa cha manga fodihina na cha mangalili hededa.

² Ma mbewode shisuku njiweichi shindo sha kisenyi shose na wulaanyi wose, mbewode na mwidikye foteshuo mafumwu, na inyi ndawode ikunda njikeri kindopfo.

³ Ma mbechihawya wakiwa masaa hako hose ngawedambikya na mbihu foko fuhende koṟo, na inyi njiwewuṟye ikunda na isho shinjiwukia-ho kindosho.

⁴ Ikunda nyi liwode wuleeli. Ikunda nyi lyekewongoya wandu. Ikunda chi liwode wulang'apfo, manya lyekekushelapfo.

⁵ Malikutumbashielyo. Ikunda chi litahachye sonulyo, ma lyekepfula kiira kyalyopfo, ma lyechiwa itawishotawishopfo, ma lyekeitalya mawicholyo.

⁶ Lyo lilawa ichihiṟo nyi wukika, kya indi liichihio orio kundu likumbuhananye kilya kii-lohi.

⁷ Lyo nyi lishikye shose, nyi lihendelye shose, nyi liwedye shose, nyi likamadye shose.

⁸ Ikunda lyechisia manyalelyo; shisuku nasho shechihenda idumbuka, na ideda na shiṟuma nalyo lyeshika imanda, na wulaanyi wolanya shindo wo wochidumbuka.

⁹ Kyamba wulaanyi wodu nyi wo mbetesa, na shisuku shadu na sha mbetesa.

¹⁰ Kya indi ili mandi wuholotsi wulya womcha na mbetesa yechisia nawo.

¹¹ Ili njiwei mkoku njilededa cha mkoku ngameṟanguoṟanguo cha mkoku na ihia kimkoku. Ili ngamba msoṟo ngamekuatuo wukoku wose.

¹² Kiheri kya wulalu lushiwonyi cha mfano ya kilolenyi shii mangeṟingesha, indi kiheri kya numa lochishiwona oshangu kui oshangu; kiheri kya wulalu imanya lyako likeri lya mbetesa, kya indi ili numa njechikimanya kyose chando na inyi ngamanyo.

¹³ Na wulalu mwidikye na mukundie na mbedie, isho shiṟaṟu nasho shechikaa. Kya indi mkundie nafo fung'anyi kiidi kyasho.