1 WAKORINTO 12 - Bibilia Kui Mdedie fo Kimochi

¹ Kya shisumbo sha Mumuyo le, wanawawama, njikundi mude mulamanyapfo.

² Muichi lyandi muwekeri wahenu nyi mowekedao ko mfanano ilawode mdedye cha ili mokuruo-pfo.

³ Nkyo kimaduma ngammanyishya ke kulaipfo modeda awodo nyi Mumuyo o Ruwa awechihamba Yesu naseso, na kulaipfo aidima ihamba, Yesu ai Mndumii shile awodo nyi Mumuyo Mwele.

⁴ Nyi kuwode makamba ha shisumbo sha Mumuyo, indi Mumuyo nyio menyi.

⁵ Kuwode makamba ha mapfuṟukanya, na Mndumii nyio amonyi.

⁶ Kuwade makamba ha matanyo kya indi nyi Ruwa ai motana shi shose arie wose.

⁷ Indi orio mndu aenengo mdambuye fo Mumuyo kundu kuwonekeho kiira.

⁸ Kyamba ichu umu amnengo nyi Mumuyo ideda wuṟango, na ichu ungi ideda wulaanyi kui mweke fo Mumuyo ulya ulya.

⁹ Ungi amnenge wuidiki kui Mumuyo ulya ulya, na ungi aimsumbe pfinya tsechiṟa waluo kui Mumuyo ichu umu.

¹⁰ Na ungi amnenge iwuta ngata tsa pfinya, na ungi ihamba wuikimbi na ungi itichya wuilachi wo Mumuyo iya iipfo, na ungi aimnenge mdedye ya shiṟuma, na ungi amnenge wuṟango wodambuya shiṟuma shilya.

Shiungo shifoi indi mbihu fumu

¹¹ Indi isho shose nyi Mumuyo ichu umu ose ashitanye echihawya orio umu kikoke chando akunda.

¹² Kyamba chando mbihu fo mndu fui, nyi fo fumu na shiwungo shafo nyi shifoi, indi shiwungo sha mbihu shifoi shidi shikeri mbihu fu fumu sho shose, nyi wudo na Kristo ai.

¹³ Kyamba so lose lulempatisyo mbihu fumu kui Mumuyo umu, kiwe luui Wayuda ang'u kiwe lui Wagriki, kiwe lui masinga ang'u kiwe lui masumba. Nyi luiwarutsye Mumuyo chu umu so lose.

¹⁴ Kyamba na mbihu fo mndu fulakeri kiwungo kimu indi shifoi.

¹⁵ Kima odende luweihamba, ili ndakeri owoko njikeri o mbihupfo, kyo kiwechitewa lulakae lui lo mbihupfo.

¹⁶ Ma kudu kima kuweihamba, ili ndakeri riso njikeri o mbihupfo lyo liwechitewa kulakae kui ko mbihupfo.

¹⁷ Kima mbihu fuwei riso fose a iicho kindo liwechiwa naki ko? Kima fuwei kudu fose na irumishya opfamo liwechiwa na ki ko?

¹⁸ Indi wulalu Ruwa awewikya shiwungo shi orio kimu kyasho kya ipfo mbihunyi chando alekunda.

¹⁹ Kya indi kima shiwei sha ofano lumu shose, a mbihu nyi fuwechiwono ku?

²⁰ Indi-ng'u wulalu shiwungo nyi shifoi, indi mbihu nyifo fumu.

²¹ Na riso lilaidima iwia owoko, njikutiie iyonyi. Manya mdo fulaidima iwia madende, nyimutie nyonyi.

²² Kya indi lya wueṟa mnu, shiwungo sha mbihu, shilya shifanyi cha ili shii shifafa kota shingi nyisho lushiwuṟye kya wuitiki.

²³ Na shilya loshitana shikiwae kiṟumi sho lokeshisoṟowitsya na tsirie kiweṟe kya ngoseṟa, na shilya shadu shiwode wuṟenze sho shirie wuindi wo ngoseṟa.

²⁴ Indi shilya shadu sha sonu njicha sho shii na tiiepfo. Kya indi Ruwa ametomboshana adi mbihu kashika iwikya kiwungo kikiwa kiṟumi kisonguo.

²⁵ Kundu mbihu manya fulahendehoyo mpaṟakano, kya indi shiwungo shiinduṟane shishenyi na shenyi.

²⁶ Na kokoya kiwungo kimu kyahenda iwawyo shingi shose shawayo hamu nakyo; kokoya kuipfo kiwungo kyawikyo mng'ano shahenda ichihio hamu nakyo shose.

²⁷ Nanyo mukeri mbihu fo Kristo mukuhawie-ho shiwungo.

²⁸ Na kwipfo Ruwa awawikye ipfo siṟinyi, lyesonguo nyi wasu, lya kawi nyi waikimbi, lya kaṟaṟu nyi wedambuo, lingi nyi wewuta ngata tsa pfinya, lingi nyi warie pfinya tsechiṟa waluo, lingi nyi waeki, lingi nyi waiṟichi, lingi nyi wededa mdedye ya shiṟuma.

²⁹ Alae nyi wai wedambuo wose ko? Alae nyi wai wewuta ngata tsa pfinya wose ko?

³⁰ Alae nyi wai warie pfinya tsechiṟa waluo wose ko? Alae wai wededa mdedye ya shiṟuma wose ko? Alae nyi wai wetambahaluya shiṟuma wose ko?

³¹ Indi lalakyenyishisumbo shilya shi shicha lya wueṟa. Na kutsuhae njia ingi ierie tsingi tsose nayo ngahenda imloṟa.