1 WAKORINTO 11 - Bibilia Kui Mdedie fo Kimochi

¹ Muwe waitung'ati wako chando inyi njii o Kristo.

² Na ngamwichika, wanawawama, nyi kipfa monjikumbuo kya shindo shose mukuwode necha na njowawaso tsilya njilemwinenga.

³ Kya indi njikundi mumanye ke mdo fo orio mndumii nyi Kristo, na mdo fo mka nyi mii, na mdo fo Kristo nyi Ruwa.

⁴ Orio mndu msoṟo kashika iterewa anu kashika ideda awodo Mumuyo nao aṟee kindo kisoke mdonyi nyi asutsa mdo foke.

⁵ Kya indi orio mndu mka kashika iterewa ang'u ideda awodo m Mumuyo alawoshye mdo foke nyi asutsa mpfo foke. Kyamba nyi awa umu tichi na ichu atsikie njui tsake.

⁶ Kyamba kokoya mka alakunda ikushikya na nahende isemo na kamu. Kya indi ili ihenda isemo ang'u itsiko lyo liendie mndu mka wusutsu na nakae amshikye.

⁷ Mndu msoṟo o alawuṟye ishikya mdo kyamba nyi ai mfano fo Ruwa mohamba ngela yake. Kya indi mndu mka ai mohamba ngela ya mndumii.

⁸ Kyamba mndumii alapaṟikye ko mka indi nyi mka apaṟikye ko mndumii.

⁹ Manya chi mndumii aletano kimaduma kya mkapfo, indi nyi mka kashika itano kimaduma kya mndumii.

¹⁰ Nkyondo kiwaṟi mka nakae na kichano kyeitoṟyo ipfo mdonyi foke kipfa kya wasu walya.

¹¹ Ma kikamba kido indi ipfo Mndumii-hu mndu mka awa kindo shile mndumiipfo, manya mndumiia awewa kindo shile mkapfo.

¹² Kyamba chando mka apaṟikye ko mndumii, nyi wudo da na mndumii ekefeo nyi mndu mka. Nasho ili shii shido nyi shii shiwike nyi Ruwa shose.

¹³ Kedumbwonyi muwenyi, nyi kisumhanyi mndu mka nahambe kiterewo kyeterewa Ruwa alaimshikye ko?

¹⁴ Alae, chi wumba liyenyi limloshye ke mndumii kalekya njui tsilee nyi akuendye wusutsu?

¹⁵ Indi mndu mka awode njui nileshe nyi kiichiko kyake. Cha kipfa amwinenge njui tso nleshe tsimbiie maṟao hemshikya.

¹⁶ Indi kokoya kwipfo ahamba nawike-ho Ngano, so luwode kido cha ikyopfo, manya siṟi tsa Ruwa ote.

Kilaayo kya Mndumii

¹⁷ Ili njiwawasa njidi kuwode-pfo handu halawa iichika, nyi kipfa mokesanza kilai kya kiira indi kya kihutsa.

¹⁸ Kya kuwoka ngaicho wai ke ippfo konu ili mokusanza kui siṟi nyi kuwode mapaṟakano. Nakyo ngakiidikya kyenga.

¹⁹ Kyamba nyi kuwaṟi iwoneka maletsano ifo konyu kundu walya waidima ikusiryo wamanyike na pata ipfo hamu kulaidimika kekulia kilayo kya Mndumii.

²⁰ Kyamba ipfo kilionyi orio mndu ekepfukapfuka iwada kilya kii kyake kikyenyi,

²¹ na ichu awodo n njaa, na ichu nyi a mnanzi.

²² Ale! Mulawode mba tsekulia-pfo na ikunyoya? Ang'u mopiṟa siṟi ya Ruwa na ihutsya walya walawode kindo sonu? Njimuwie njida ngesa? Njimwichike ko? Kya ikyo njemwichikanyi.

²³ Kyamba nyio Mndumii amenjienenga imanya shilya njilemmaa imudambikya nyo, nasho shii shidi, ke Mndumii odu Yesu kio kilya aleṟingyo nyi alewada mkate.

²⁴ Kekiidima yaana kafufunja shifunyo kahamba, Aifu mbihu foko fohenda idambikyo kipfa kyanu. Muwe mowuta mudo kenjikumbuo.

²⁵ Na wudo nakyo kirahu kilya kilayo kyamlio kechihamba, Kirahu ki nyi mma mhya ya ipfo samunyi yako; muwe mochiwuta mudi orio mandi monyoya-ho mochinjikumbuo.

²⁶ Kyamba orio mandi molya mkate fu na inyo kirahu ki mukeri ihamba opfu lo Mndumii itane echiwuya.

²⁷ Nkyo kyaenenga orio molya mkate fu ang'u inyo kirahu kya Mndumii alashisumhanye nyi atahachie mbihu fo Mndumii na samu yake.

²⁸ Indi mndu o wandu nakutaanye amonyi, kammaa nache echilya kya mkate fu nawenyo kya kirahu-ki.

²⁹ Kyamba ichu ailya na inyo alaichi mbihu fu fuipfo nyi akulia wudeheli na iwukunyoya.

³⁰ Nkyo kimaduma ipfo konu kwipfo wafoi waluo, wai wanyonge, na wandu sa weengi walee.

³¹ Indi kima luwekuanduya so luwenyi luwechidehelyopfo.

³² Kya indi ili loshika idehelyo nyi Mndumii nyi lohenda itoṟisho kundu lulaseso handu hamu na wuyana wu.

³³ Nkyo kimwenenge, wanawawama wako, ili moshika ikusanza kilionyi muwe mowediana.

³⁴ Kokoya kwipfo mndu awodo nyi njaa nakulie ipfo kanyi, mulashike ikusanza liendye wudeheli. Shingi shadeo-pfo nyi njechishisungusia ili njecha.