1 WAKORINTO 10 - Bibilia Kui Mdedie fo Kimochi

¹ Kyamba-le, wanawama, njilakundi mude mulamanya ke wandeyadu nyi wawei shi ya-puchi lilya wose, wakaida ipfo ipalyipalyinyi wose.

² Wakashika ipatisyo Mose ipfo shi ya puchi lilya na ipfo mṟingenyi wose.

³ Nawo wose wawekeri ilya kando kamu kawei Mumuyo.

⁴ Wawenyo wose na mnyo se fumu fuwei Mumuyo cha kipfa wawekekunyoya kiwukye ngaṟahambenyi ya Mumuyo iweitumanyi nawo. Nayo ngaṟahamba iya nyiyo Kristo.

⁵ Kya indi kyawo wafoi walechihiana na Ruwapfo, wakahutso wanda kulya nuka.

⁶ Ishi nyi shilewa sha mbetesa yadu kundu so lulawe welanga shiwicho chando wo wawelangie.

⁷ Ma mulawe weindya maruwa hengi chando kuwewode kowo kii-kiṟehye kyawo kehamba, mkambo fo wandu fukadamya fochilya na inyo kidima wakakure wahende ishina.

⁸ Manya lulawe wemeluka chando kowo kuweipfo wemelukye wadi wakaoloka oweṟe lo mkonu fumu wandu washikye shiku makumi hawi na shiṟaṟu.

⁹ Manya lulataanye Mndumii chando kowo kuweipfo wawemtaanye wakakombetso nyi njoka.

¹⁰ Manya mulakuinung'unu chando kowo kuweipfo walekuinung'unu wakarumatso nyi morumatsa.

¹¹ Ishi shilesanzyo iwutika ipfo kowo kui mbetesa indi shiishiṟehye kipfa kya wuikimbi womwikimba nyo mui-washitsye maheri hamandie.

¹² Nkyo kimaduma msa mohamba ke nyi ahoṟoki nakuṟise nalawone echiho.

¹³ Kiweipfo kihesho kilemhoya kilawei kya kiwandupfo. Na Ruwa ai mhendeli alechimda muhesho kidye mng'ang'ana fonu, kya indi handu hamu na kihesho kilya kawika-ho na mongo fowukia, kundu muidime ikutirisia.

¹⁴ Nkyo kimwitike, nyo wakunde wako, mudiche wuindi woindya maruwa ha wongo.

¹⁵ Ngadeda nanyo mui wandu waichi, keheshenyi ikyo njideda.

¹⁶ Kirahu kilya kya ona luikionyisha chi kulusanzye samu ya Kristo? A mkate fulya luifufunya chi fulusanzye mbihu fo Kristo?

¹⁷ Kyamba mkate nyi fo fumu, naso lufoi li mbihu fumu, kyamba so lose luihawyo mkate fulya fumu.

¹⁸ Keringenyi Israeli iya iwiie kui ifeo lya nyama. Walya wailya shidaso shilya chi walungana na rasio iya?

¹⁹ Alewo nyi ki njihamba? Ke nyi kidaso kiwe kindo ko? Ang'u mfano fuwe kindo ko?

²⁰ Chi wudopfo. Kya shilya wekeshidasa nyi waishidasya wasatan manya chi Ruwapfo. Kya indi inyi njilakundi muwe wa kita kimu na wasatan.

²¹ Moidima isanza inyo kirahu kya Mndumii na kya wasatanyipfo. Moidima isanza kidembo kya mesenyi ya Mndumii na kya mesenyi ya wasatanyipfo.

²² Ang'u nokunda ipfulutsa Mndumii nyashi? Nyi loidima imwota o ko?

Shose shiendie Ruwa Kirumi

²³ Shindo shose njikuwodie kyasho momu, kya indi chi shose shanjiwiia kya wuchapfo. Shindo shose njikuwodie kyasho momu kya indi chi shose shapfunga mbapfo.

²⁴ Ma mndu nalawone kechipfula kilya kichihianyi nao amonyi, kya indi napfule kichihianyi na odoe.

²⁵ Shose shekekumbo ipfo mchangalenyi yekumba nyama mukulie da kulawode mowesa kundu kuwukie mochiringa ngo tsa mrimenyi.

²⁶ Kyamba wanda ii menyi oyo nyio Mndumii sanza na mena foyo.

²⁷ Mndu o walya walaidikye kamlaha nanyo mukakunda ihenda-pfo kulienyi orio kindo wamuwikya mulechiwesa kundo kuwukye mochiringa ngo tsa mrimenyi.

²⁸ Indi kokoya mndu ahenda imbia, “Nyama ii nyi nyama nyidase” ma mulailye nyi kimaduma kya ichu mosenda na kimaduma kya ngo tsa mrimenyi.

²⁹ Ngoo tsa mrima ngatsihamba chi tsa fopfo iyopfo, kya indi nyi tsa fo ulya ungi. A nyi kitewe mkuachie foko fuhendekapo nyi ngoo tsa mrima fo mndu ungi?

³⁰ Kokoya ngakulia ohawi loko njechiana nyi ki njihenderumo kipfa kya kindo njikiadapfuma?

³¹ Kyasia-ng'u ili muilya ang'u muinyo ang'u muiwuta kindo ma kida ma kida shiwutenyi shose shewikya Ruwa kiṟumi.

³² Mukae-ho mulawiie wandu tewe ma Wayuda ma Wagriki na wa siṟi ya Ruwa.

³³ Chando nao inyi nyekechihiana na wose kya shindo shose njilaipfula kilya kinchihiṟye inyi indi kilya kichihiṟye walya wafoi kundu wahende ikiṟo.