1 WAKORINTO 1 - Bibilia Kui Mdedie fo Kimochi

¹ Inyi Paulo njii msu o Kristo Yesu njiimsambuṟe njido kui kyama kya Ruwa, so na Sostene manowama.

² Loiṟikiṟa siṟi ya Ruwa ikeri ipfo Korinto luweiṟikiṟa iwa wai-waheṟemtse kui Kristo Yesu, wai wa kikale wasambuṟe wo na wengi wose welaha rina lya Mndumii odu Yesu Kristo orio handu ha kowo na kodu.

³ Wutonga wukae nanyo na ofoṟo shiwukye ko Ruwa Wande odu na ko Mndumii Yesu Kristo.

Mboṟa tsa Ruwa

⁴ Njiiana Ruwa oko kitsitsi kimaduma kyanu kipfa kya osaṟio lo Ruwa mui-waenenge ipfo kundo mukuwode na Kristo Yesu.

⁵ Kyamba musuṟie kya orio kindo mukuwode nao kiwe kya orio idedo kiwewa kya orio mtambahalukye.

⁶ Kikatanyika kui kiṟingishyo kehamba Kristo ili kilembanzyo kido ipfo konu.

⁷ Nakyo kikaenenga mulatiyo nyi kisumbo ma kida ma kida mukakaa mochiwedya ikuloṟa lya Mndumii odu Yesu Kristo.

⁸ Nao nyio echiwa momkapya owanzo itane masiiyonyi mulawonyo tewe mkonu fulya fo Mndumii odu Yesu Kristo.

⁹ Ruwa ai mhendeli, nao nyio amemlahya kilunganyonyi kyelungana na Manoke Yesu Kristo Mndumii odu.

Ilekana kiidi kya Waidiki

¹⁰ Indi ngamututuma lanye wanawawama kui rina lya Mndumii odu Yesu Kristo ke muwe mochideda kimu mose, ipfo konu kulakae-pfo ndutsano kya indi mukae-ho mui-waṟeheṟye mhie fumu na mdumbuye fumu.

¹¹ Kyamba njii-mmanyishye nyi walya wai wa mba ya Kloe kyanu wanawawama wako, ke ipfo konu kuipfo wuṟingi.

¹² Indi hando ngahongya-ho na ha-le; ke orio mndu o konu ekehamba kiwungi, umu, inyi njii o Paulo, na ungi, inyi njii o Apolo, na ungi, inyi njii o Kefa na ungi, inyi njii o Kristo.

¹³ Alae! Kristo nyi ahawukanyi? Paulo nyi ambambye msalabenyi kimaduma kyanu? Ang'u nyi muiwapatisie rina lya Paulo ko?

¹⁴ Njiiana Ruwa kipfa ndapatisye mndu ipfo konu shile Krispo na Gayo.

¹⁵ Kulashike ihamba ke momepatisyo rina lyako inyi.

¹⁶ Indi ipatisa njilempatisase na wa mba ya Stefano. Ngoseṟa ya iwo njiichi kokoya njipatisye mndu ungipfo.

¹⁷ Kyamba Kristo alanjitanye msu nyi kundu njipatise, kya indi nyi kundu njiongwo ndumi ya sia yo okiio. Nalyo lilawe kui madedo ha wuṟango kundu msalaba fo Kristo fulahendewiro.

Kristo nyi pfinya na wuṟango wo Ruwa

¹⁸ Kyamba ndumi ya msalaba ikerye iwo wehenda deka wutambashi, kya indi kyadu so wehenda kiṟo ikulukerye finya ya Ruwa.

¹⁹ Kyamba kii-kiṟehye kii-le; Njechirumatsa wuṟango wo iwo wai waṟango na ikombetsa wulaanyi wo iwo welaya shindo.

²⁰ Mndu mṟango nyi ku aya? Mndu mlaanyi o shitapu nyi ku aya? Mndu mwiichi motambahanya njo-pfundo tsa mandi ha nyi ku-aya?

²¹ Cha kipfa ipfo kundo wuyana wu wulawemanya Ruwa kui wuṟango wowo nyi kuwewode wuṟango wo Ruwa kikachihiana na Ruwa ikiṟa waidiki kui mwongoye fusolongi.

²² Cha kipfa Wayuda wekewesa shichano na Wagriki waipfula wuṟango.

²³ Kya indi so luionguo Kristo ambambie msalabe-hu. Lyo lyaenenga Wayuda wekapa tuulya likawia wa mkambo mhenu wutondo.

²⁴ Kya indi iwo wai-walahe ma wai Wayuda ma wai Wagriki kowo Kristo aiwawiia pfinya ya Ruwa na wuṟango wo Ruwa.

²⁵ Kipfa kilya kii kya wutondo kichee ko Ruwa kyo ki na wuṟango wukaida wo wandu na kilya kii kya wufafa kirianyi na Ruwa kyo kii na pfinya ikaida ya wandu.

²⁶ Keambuyenyi ndaho yanu, wanawawama wako, nyi kuwode waṟango wa kiwandu wafoipfo ma wenyi pfinya ma wai wasongoru.

²⁷ Kya indi shilya shii-shitane sha wutondo nyi wuyana wu nyisho Ruwa ameshisambuṟa shesonusha waṟango, na shilya shifafa sha iya wuyana nyi sho Ruwa alesanga nahutsye nasho shilya shiapfinya sonu.

²⁸ Na shilya shilawei na kiṟumi kunu wuyana na shilya siwei shipiṟe nyisho Ruwa kashisanga shilawei kindo kundu nahaluo shilya shii kindo maai.

²⁹ Kikahendeka kido kundu kulakae-ho mndu ai nyama echikushela ipfo sumuhana na Ruwa.

³⁰ Na ipfo koke kwenyi kimaenyi kyanu kikeri ili mui Kristo-hu Yesu, nyio amelutaanyo nyi Ruwa wuṟango na wuhoṟotsu na wuiilisho na oletso.

³¹ Kihendeke chandu kii-kiṟehye ke; Mokushela nakushele kui Mndumii.