1YOHANE 5 - Bibilia Kui Mdedie fo Kimochi

¹ Orio mndu ose aidikya ke Yesu ai Kristo nyi alefeo nyi Ruwa. Na orio ose ili akundi ichu momfee awa mokunda na ichu alemfeo nyio.

² Hando lokuwutya-ho imanya ke lukundi wana wa Ruwa, nyi iliindi lukundi Ruwa lochiwuta shilya aluwawasye.

³ Kipfa ikunda Ruwa lii-pfo ipfo kundo luihendelya mawawaso hake. Na mawawaso hake hai malemeripfo.

⁴ Kyamba orio kii-kifee kipaṟikye ko Ruwa kikeri iwinza wuyana-wu. Na kiwinza kilya kyechiwinza nakyo wuyana-wu nyi mwidikye fodu.

⁵ Mmbinzi mowinza wuyana-wu nyi-wu, shila nyi ichu aidikye ke Yesu ai Mana o Ruwa?

Wuṟingishi kya Kristo

⁶ Yesu Kristo nyio ichu alecha kui mṟinga fo wupatiso woke na kui samu ya opfu loke. Chi alecha kui mṟinga tupupfo, kya indi kui mṟinga na kui samu. Na Mumuyo alewa-moṟingishya, kyamba Mumuyo nyi akeri kii-lohi kilya.

⁷ Waṟingishi wai-ho nyi waṟaṟu.

⁸ Nyi Mumuyo na mṟinga na samu. Na iwa waṟaṟu waidikyanyi.

⁹ Kokoya lokeambya kiṟingishyo kya wandu, kiṟingishyo kya Ruwa nyi king'anyi. Kiṟingishyo kya Ruwa nyi kilya aleṟingishya kya Manoke.

¹⁰ Moidikya Mana o Ruwa o akuwode na kiṟingishyo kilya kii nao. Mndu ada alaidikya Ruwa o amaa imtana mowongo, kyamba alaweidikya kiṟingishyo kilya Ruwa alemṟingishya kya Manoke.

¹¹ Na kiṟingishyo kilya kikeri kii-le, ke Ruwa ameluenenga moo fulunganyi, nafo nyifo moo fukukerye ipfo ko Manoke.

¹² Ichu ose akuwode na Mana o Ruwa nyio awode moo fu. Ichu alakuwode na Mana o Ruwa ai na moo-fupfo.

Moo fo mlungana

¹³ Ishi ngamṟehya nyo kundu muwute-ho imanya ke muwode moo fulunganyi, nyo muidikye rina lya Mana o Ruwa.

¹⁴ Na wulalutsu lukuwodye nawo ipfo oshangunyi lo Ruwa nyi wukeri wu-le, ke kokoya luimterewa kisumhanye wuchili woke nyi ailuicho.

¹⁵ Na kokooya luichi ke nyi ailuicho kya kilya luimterewa nyi lowuta-ho imanya ke shiterewo shilya lulemterewa nyi lushiwode.

¹⁶ Ili mndu awona manomae echinyamaṟa wunyamaṟi wulaende-opfu namterewie ko Ruwa. Kuwode wunyamaṟi wuende opfu, kyawo ngahamba naterewepfo.

¹⁷ Orio wufuṟunji nyi wunyamari. Na kwifo wunyamaṟi wuladuo mndu opfunyi.

¹⁸ Luichi ke oṟyo amfee nyi Ruwa awuta wunyamaṟipfo. Kya indi ichu amfee nyi Ruwa akuringa amonyi, na mbicho aimpayapfo.

¹⁹ Luichi ke so lupaṟikye ko Ruwa na wuyana wose wuu-wulaṟe nyi mbicho.

²⁰ Luichi ke Mana-chu o Ruwa amecha kaluinenga wuṟango kundu lochimanya ichu ai menyi-kii-lohi. Naso lui-wasanze na ichu menyi-kii-lohi lui-wasanze na Manoke Yesu Kristo. Nyio Ruwa menyi kii-lohi na moo fo mlungana.

²¹ Wana, kuṟisenyi na maruwa ha wongo.