1YOHANE 4 - Bibilia Kui Mdedie fo Kimochi

¹ Wakunde wako, ma mulaidikye orio mndu mohamba nawode mumuyo mliwe, kya indi mutume mnu kokoya mndu-chu nario nyi Mumuyo fo Ruwa ang'u ote. Kyamba waikimbi na wongo wafoi wamecha kunu wuyana.

² Kimwenengya imanya Mumuyo o Ruwa kiwe kii-le, ke orio Mumuyo ose awa mohamba Yesu Kristo amcha kui nyama nyio apaṟikye ko Ruwa.

³ Na orio mndu alaiṟingishia ke Yesu Kristo alecha kui nyama, ario nyi Mumuyo fo Ruwapfo. Nyio akeri mkituwa o Kristo. Kake nyi mulemwicho nyi echicha. Na wulalu alemmaacha kunu wuyana.

⁴ Nyo, wana, mupaṟikye ko Ruwa mulemmaa iwinza waikimbi. Kipfa ichu akeri nanyo nyi ang'anyi kota ichu ai kunu wuyana mulemmaa iwinza waikimbi-wo wa wongo.

⁵ Walya nyi wapaṟikye kunu wuyana. Nkyo kyatewa wekededa sha kunu-wuyana na wuyana wu wukawaicho.

⁶ So nyi ipfo ko Ruwa lupaṟikye. Mokimanya Ruwa nyi aluicho. Ichu alapaṟikye ko Ruwa ekeluichopfo. Lyo nyilyo lyaluinengya imanya Mumuyo o kii-lohi na mumuyo fo wongo.

Ruwa nyi ikunda

⁷ Wakunde wako, luitike ikundana luwenyi-na-wenyi. Kipfa mkundye fumenyi nyi ipfo ko Ruwa fupaṟikye. Na orio menyi-mkundye amefeo nyi Ruwa na imanya kamanya Ruwa.

⁸ Mndu alawode mkundye aichi Ruwapfo. Kipfa Ruwa nyi ikunda.

⁹ Hando kunda lya Ruwa lyammanyikya-ho na pata ipfo kidi kyadu, nyi ili Ruwa aleduma Mana-chu oke kimumu mfi kunu wuyana kundu luhende iwonyo moo nyio.

¹⁰ Hando mkundye fukukerye-ho chi kodu cha ili so luwekundi Ruwapfo, kya indi nyi koke ili o amelukunda kaduma Manoke kamtana njoko yeoloṟa manyamaṟo hadu.

¹¹ Wakunde wako, na ili Ruwa amelukunda so nyi kiluwaṟi naso lukundane luwenyi na wenyi.

¹² Kuwode mndu alemewona Ruwa ma indipfo. Ilindi lukundanyi luwenyi na wenyi lyo lyaenenga Ruwa akaa naso, na ikunda Ruwa likaawukya ichia kodu.

¹³ Hando lokuwutya-ho imanya ke nyi lokaa nao nao menyi akeri naso nyi ili ameluenenga Mumuyo oke.

¹⁴ Natso lomba wariso lochiṟingishya-ho ke o Wande ameduma Mana kamtana mkiṟi mokiṟa wuyana.

¹⁵ Ipfo kundo mndu awa mohamba ke Yesu ai Mana o Ruwa nyihondo Ruwa ekaa nao nao akeri na Ruwa.

¹⁶ Natso lomemanya mkundye fu Ruwa alukundi nafo lukawefuidikya. Ruwa nyi ikunda motsinda echikaa mkundyenyi-fu nyio awa mokaa na Ruwa na Ruwa awa mokaa nao.

¹⁷ Ikunda-li luliwode lyashika yawukya ipfondo luwode wulalutsu mkonu fo mwanduye, kyamba chando o ai na wudo so lui kunu wuyana.

¹⁸ Wuowu wukukerye mkundyenyipfo, kya indi mkundye fu-mwawutsie mfo fofunya wuowu wose nja, kyamba wuowu wuwode ṟowa. Mndu mowado nyi wuowu aawukye mkundyepfo.

¹⁹ So nyi luwode ikunda, kyamba o Ruwa alesonguo ilukunda.

²⁰ Kokoya kwipfo mohamba, “Njikundi Ruwa”, nao asuo manomae, nyi mndu mowongo. Kipfa mndu ada alakunda manomae awonyo, eidima ikunda Ruwa alambonyi-pfo.

²¹ Nalyo nyi iwawaso luwode liwukye ko Kristo, Mokunda Ruwa nawekunda na manomae.