1YOHANE 3 - Bibilia Kui Mdedie fo Kimochi

¹ Ambuyenyi kunda lya Ruwa chando ling'anyi, likaluenenga lusendo wana wa Ruwa, na lui wana. Nkyo kimaduma wuyana wu wulalumanya so, kipfa wulalemanya Ruwa.

² Nyo mui wakunde wako, lukeri wana wa Ruwa wulalu. Indi mbika lochikaa nayo ilemewonekye-pfo. Luichi ke iliindi Kristo echicha nyi lochifanana nao, kyamba nyi lochimbona mbuka yake yose.

³ Na orio ose akuwode nao kui owedi-lu nyi aikuilisha amonyi naile chando Kristo amwili weṟu.

⁴ Orio mowuta wunyamaṟi nyi afunja iwawaso lya Ruwa, na wunyamaṟi nyiwo wufurunji.

⁵ Nanyo muichi ke Kristo nalecha kundu nawute-ho manyamaṟo hadu, na wunyamaṟi wukeri naopfo.

⁶ Orio ose mokaa nao Kristo ekewuta kya wunyamaṟipfo. Orio mokinyamaṟa ma alemembone manyale-pfo manya immanyapfo.

⁷ Wana, wako, mulahendedetso nyi mndu. Mokiwuta wusumhanyi nyio asumhanyi arianyi na Kristo menyi asumhanyi.

⁸ Mokiwuta wunyamaṟi apaṟikye ko Satana, kyamba Satana akeri monyamaṟa wokia mawokyonyi. Kiletewa Mana o Ruwa kacha wuyana nyi kundu nafunje iṟunda lya Satana.

⁹ Orio ose alefeo nyi Ruwa awuta wunyamaṟipfo kyamba mbeu yake ikaa nao. Nao alaidima inyamaṟa nyi kipfa nyi amfee nyi Ruwa.

¹⁰ Nyihondo komanyika na pata iwa wai wana wa Ruwa na iwa wai wana wa Satana, orio mndu ose ada alawa mowuta wusumhanyi apaṟikye ko Ruwapfo ang'u alakundi manomae.

Kundanenyi

¹¹ Kyamba ndumi-ii momwicho wuka mawokyonyi nyi ikeri ii-le: Lukaundane luwenyi na wenyi!

¹² Lulawe cha Kain awei o ichu mbicho kahenda iwaha manomae. Na kitewe alembaha nyiki ngesa? Nyi kipfa mawuto hake halewichuo indi halya ha manomae ho hawei mecha.

¹³ Wanawawama, ma mulaṟihio ili wuyana-wu womsuo.

¹⁴ So luichi ke lomsama alya hai-haitoṟye nyi opfu, lomhenda kusamya haitoṟye m moo kyamba so lukundi wanawawama wadu. Mndu ada alawa mowakunda o akaa opfunyi.

¹⁵ Orio Mndu ose mosuo manomae nyi akeri mbahi mowaha wandu. Nanyo muichi ke orio mbahi ose awode moo fo mlungana fochikaa naopfo.

¹⁶ Hando lulekuwutya-ho imanya ikunda, nyi ili o Kristo alereka moo foke kimaduma kyaduso. Naso Kiluwaṟi lureke moo yadu hando ha wanawawama wadu.

¹⁷ Indi kokoya kwipfo awode shichoṟe shewanza moo fo wuyana-wu nao kaambuya manomae ashiwuṟye nao kampfungya ngoo, nyi wuda ikunda Ruwa lyekaa nao ngesa?

¹⁸ Wana wako, lulakundane kui dedo ma kui olimi, kya indi lukundane kui mawuto na kui kii-lohi.

Mkusiriye fo lohi oshangunyi lo Ruwa

¹⁹ Na hondo lochikuwutya-ho imanya ke lukeri wandu wa kii-lohi. Na ipfo oshangunyi lo Ruwa nyi lochikarishya-ho ngoo tsadu.

²⁰ Kipfa kokoya ngoo yadu yalusesa, luichi Ruwa ang'anye ngoo tsadu kemanya shindo shose.

²¹ Wakunde wako, kokoya ngoo ilalusesa lui na wulalutsu oshangunyi lo Ruwa.

²² Na kokoya luimterewa kindo lochikiambya ipfo koke, kipfa luihendelya mawawaso hake na iwuta shilya shichihianyi nao.

²³ Na iwawaso lyake nyi lii-le ke luidikye rina lya Manoke Yesu Kristo luwekundana luwenyi na wenyi chando o ameluwawasya.

²⁴ Na mokihendelya mawawaso ha Ruwa nyi aka amlunge na Ruwa, nao Ruwa alunganyi nao. Na kilya kyalutarama imanya ke luiwalunge na Ruwa nyi mumuyo fu Ruwa ameluenengya.