1YOHANE 2 - Bibilia Kui Mdedie fo Kimochi

¹ Shiwana shako, ngamṟehia isho kundu mulahende iwuta wunyamaṟi hando. Na kokoya kwipfo mndu anyamaṟa hando, luwode mombele ipfo ko Wande, nyio Yesu Kristo asumuhanyi.

² Nao Kristo menyi akeri njoko iinjiwike kya manyamaṟo hadu, indi chi kya njonyamaṟo tsandu tupupfo, na kya wunyamaṟi-wu wo wuyana wose.

³ Na hando lokuwutya-ho imanya ke lomemmanya o nyi ili luihendelya mawawaso ha Ruwa.

⁴ Mndu kahamba, “Njimwichi,” na mawawaso halya hake alahahendelye, nyi ai mowongo, na kilya kii-lohi kikeri naopfo.

⁵ Indi Mokihendelya dedo lyake lohi, ipfo koke ikunda Ruwa lyamshika yawukya. Lyo lyaluenenga imanya ke lohi lukulungye nao.

⁶ Mokihamba ke akaa ai msanze nao kimbaṟi nawe mohendekya mhendekye fumu na fulya a monyi awefuhendekye.

Iwawaso lyihya

⁷ Nyo muiwakunde, iwawaso ili ngamṟehya chi lihyapfo, kya indi nyi iwawaso lilya lya kacha muweliwode mawokyonyi. Iwawaso li lya kacha lyo idedo-li momeliicho.

⁸ Ma kudo, iwawaso li ngamṟehya likeri lihya, lyo lii lohi ipfo ko Kristo na konyu, da kyamba meema-fu fuisia; na sa-ii ya kii-lohi yamewoka iwaa.

⁹ Mokihamba ke nyi ipfo senyi ai, nao awa mosuo manomae o akeri meemenyi.

¹⁰ Mokikunda manomae awa mokaapfo senyi, na kilahutsa kilarianyi nao.

¹¹ Indi mokisuo manomae akeri meemenyi, na ipfo meenyi ahendekye alamanya hando akuhendya, kipfa meema-fu fuwahie meso hake.

¹² Njikeri imṟehya nyo mui wana kipfa mui wahoṟye manyamaṟo kui rina lyake.

¹³ Njikeri iṟehya nyo mui wandee wa wandu kipfa muichi ichu ai o mawokyonyi. Njikeri imṟehya nyo mui wanake kipfa mombinza ichu mbicho.

¹⁴ Ngamṟehya nyo mui wana kipfa muichi Wande. Ngamṟehya nyo, mui wandee wa wandu ipfa muichi ichu ai o mawookyonyi. Ngamṟehya nyo mui wanake, kipfa mui na pfinya na idedo lya Ruwa likaananyo mukamaa winza mbicho.

¹⁵ Ma mulakunde wuyana-wu ma ishi shikeri nawo. Ichu akundi wuyana wu, ikunda lyekunda Wande lii naopfo.

¹⁶ Kyamba ishi shose shii sha wuyana shikeri shidi, nyi lango tsa nyamenyi na lango tsa meso na useṟeṟi wo moo. Nasho shiwukye ipfo ko Wandepfo, indi nyi ipfo wuyana.

¹⁷ Indi wuyana-wu wochisia na lango tsawo daa. Indi ichu awa mowuta iki Ruwa akundi o echikaa mlungana.

Mkituwa o Kristo

¹⁸ Wana, saa ifurumi iipfo. Iki muleicho ke iimakristo echicha. Na wulalu komba wafoi wai mai makristo. Nyihondo lokuwutyaho imanya ke saa ifurumi iipfo.

¹⁹ Nyi wammbuka kambenyi lyadu, kya indi walawepaṟikye kodu. Kyamba kima wawepaṟikye kodu wawechikaa naso. Indi kilehendeka kido kundu washike imanyika na pata ke chi wose wapaṟikye kimu nasopfo.

²⁰ Nanyo mshimbuo nyi fonu ifu fuwukye ko ichu ai mwele mukaṟanguo mui waichi mose.

²¹ Chi ngamṟehya cha ili mulaichi kilya kii-lohipfo, kya indi nyi kipfa mukiichi na kipfa orio kii-wongo kilapaṟikye ko kilya kii-lohi.

²² Nyi o ku ai mowongo chila ichu ai mokana Yesu ai Kristo? Nao nyio iima-kristo-chu mokana Wande na Mana.

²³ Orio ose mokana Mana ma akuwode na Wandepfo. Mokihamba Mana nyio na Wande akuwode nao.

²⁴ Lilya mulemwicho lya mawokyonyi likae nanyo. Lilya momeliicho lya mawokyonyi likakaa nanyo nyi mochikaa na Mana na Wande.

²⁵ Na kiteṟyo kilya ameluteṟya o, kyo kiiteṟyo-ho moo fo mlungana.

²⁶ Isho ngamaa imṟehya kya walya warie imlahutsa.

²⁷ Nanyo, mshimbuo-fu momwambya fuwukye ipfo koke mfo fookaa nanyo. Nanyo muwuṟye mndu mompfundapfo. Kya indi chando mshimbuo foke fuimlosha kya shose nafo fui lohi fulai wongo, na chando fulemlosha nyo kaenyi nafo.

²⁸ Na wulalu, wana, kaenyi mukuwode na Mndumii kundu mandi echiwoneka, lukae-ho na wulalutsu lulahutsyo sonu nyio ipfo machee hake.

²⁹ Mukamanya ke o ai menyi wusumhanyi, kuwutyenyi-ho imanya ke orio ose awa momanyisha wusumuhanyi wu kui iwuta lyake, o amefeo nyio.