1YOHANE 1 - Bibilia Kui Mdedie fo Kimochi

Idedo lya moo

¹ So nyi lukeri imuṟehya kilya kiweepfo wuka mawookyonyi nyikyo lulekiicho lulekiwona na meso hadu, lulekiambuya na ikiwadawada na mawoko hadu, lyo Ideda lilya likeri moo.

² Na moo-fu fulecha naso lukafuwona. Nyifo luifumṟingishia na imwongoya ke moo-fu nyi fo mlungana, fuwekeri ko Wande fukashika iluwonesyo so.

³ Iki lulekiwona na ikiicho nyi kyo luimwongoya nanyo kundu muwade kita kimu naso. Indi kita-ki kyadu lukiwode na Wande na Manoke Yesu Kristo.

⁴ Na ishi luimṟehya kundu sia-yo yadu iweluke welu.

Ruwa nyi sa

⁵ Na ndumi-ii lulemwicho ipfo ko Yesu luimwongoya nyo nyi ikeri ii-le, ke Ruwa ai sa. Ma meema fui nao manyalepfo.

⁶ Kokoya luhambie ke luwode kita nao, indi luhendekye hando hai meema nyi luihamba wongo na kilya kii lohi luikiwutapfo.

⁷ Indi kokoya luhendekye hando hai sa chando o ai na sa, nyi luwode kita so luwenyi na wenyi. Na samu ya Yesu Kristo Manoke, yalusanja wunyamaṟi wose.

⁸ Kokoya lokehamba ke lulai wanyamaṟi nyi lokulemba luwenyi na kilya kii-lohi kikeri nasopfo.

⁹ Indi lukatocha manyamaṟo hadu o Ruwa ai mhendeli asumhany nechiluhoṟya manyamaṟo-ha na ilusanja hando hose lufanyi.

¹⁰ Kokoya so lokehamba ke lulawenyamaṟye hando, nyi hondo lomtana o Ruwa mowongo na idedo lyake likeri nasopfo.