1WATESALONYIKYE 5 - Bibilia Kui Mdedie fo Kimochi

¹ Indi kya maheri halya na mwaanya iya muwuṟye muhende iṟehyopfo.

² Kipfa nyo muwenyi mwichi na kamu ke mkonu fo Mndumii, cha mwiwi o kio nyi wudo fochicha.

³ Mandi waihamba, ofoṟo na owanzo, na hondo orumatso lowatumukya pereseng'u cha okoṟa lohoya mka ai mnene, walaidima idicha.

⁴ Indi nyo, wanawawama, mukeri meemenyi fochimwenengya mkonu fulya fumtumukye cha mwiwipfo.

⁵ Kipfa nyo mui wana wa sa mose na wana wa mfiri. Lui wa kio manya wa meemapfo.

⁶ Kikamba kido manya lulahombye cha walya wengi, kya indi lulae dembo lochikuotoya.

⁷ Walya welaa wekelaa ili koila na walya wekunanza wekenango ili kio.

⁸ Indi so ili lui wa mfiri lukuotoye luṟeee na kiringa mdo nakyonyiowedo loiweda okiṟo.

⁹ Kipfa Ruwa aleluteseheṟya nyashipfo kya indi kundu lukuwade na okiio kui Mndumii odu Yesu Kristo.

¹⁰ Nyio amelupfia kundu so ma lui-ho ma lulee lutsinde moonyi hamu nao.

¹¹ Mukarishane na ikyo muwe mochikuheluana mndu na odoya chando muweiwuta.

Madedo ha ifurumia na shiiṟikiṟo

¹² Indi lomterewa, wanawawama, ke manyenyi iwa waimuwinya nyo na iwukaya kui Mndumii na imtutuma.

¹³ Muwaindye kya woeṟa na iwakunda kimaduma kya iṟunda lyo lyawo. Mwololyane muwenyi na wenyi.

¹⁴ Indi lomwitika nyo, wanawawama, ke mututume walakaa kambenyi, mukahaṟe wenyi mrima mfafa, walya walawode muwatarame shilya wahuṟi, muwikye wandu wose tirisi.

¹⁵ Muambuye-ho kundu na mndu nalawone echitaya ungi kiwicho alembutya na kiwicho kyake o aimbutya, indi mutambahanye kiheri kyose iwutiana kilya kii kicha, muwe mokiwutya na wengi wose.

¹⁶ Chihionyi kiheri kyose.

¹⁷ Muwe mochiterewa mulatsie.

¹⁸ Muwike-ho mwaano kya shindo shose. Kyamba nyi iki Ruwa akundi kiwiko nyo kui Yesu Kristo.

¹⁹ Mulaime Mumuyo.

²⁰ Mulamine wuikimbi.

²¹ Indi muheshe shose, musale kii kicha.

²² Mudiche kilya kii kiwicho kya orio mbaṟi yose.

²³ Nao Ruwa menyi ofoṟo amonyi namuilishe wuilishi wuchie wose. Na mumuyo fonu fuawukie na mrima na mbihu ilawade pari ikae mbedienyi yewedya iwuya lya Mndumii odu Yesu Kristo.

²⁴ Alulaha nyio mhendeli, nao echiwuta.

²⁵ Wanawawama, ke luterewyenyi.

²⁶ Muiṟikiṟie wanawawama wose kui ihekyana momu lilya yele.

²⁷ Ngamtutumya kui Mndumii ke paruo ii isomyo wanawawama wose.

²⁸ Wutonga wo Mndumii odu Yesu Kristo wukae nanyo.