1WATESALONYIKYE 4 - Bibilia Kui Mdedie fo Kimochi

¹ Iki kyamsia, wanawawama, luimterewa na imwikimba kui Mndumii Yesu kundu muitike ichumia mochihenda mbele chando muleambya kiwewukye kodu kiimtutumya mchumie ichihianyi na Ruwa, nanyo na muichumia mudo.

² Nanyo muichi mawawaso lulemwenenga na mweke fo Mndumii Yesu nyi maki.

³ Kipfa kilya Ruwa akundi nyi wuilishi wonu, mudiche wuṟuhui.

⁴ Orio mndu onu namanye ikuwonya iṟahembe lyake kui wuilishi na wuindi.

⁵ Lilawe lya kya nyashi ya waaka.

⁶ Cha kya mkambo ya kihenu ilaichi Ruwa. Ma mndu nalawone echieera manomae mbuchenyi ma imlemba, kipfa Mndumii ai mdeheli modehelya kya ishi shose chando lulemsonguo imbia na iṟingishia.

⁷ Kyamba Ruwa alelulahia ngafupfo kya indi kawelulaha kui wuilishi.

⁸ Nkyo kimaduma mndu aleha iki aileha mndu o wandupfo indi Ruwa chu alemwinenga nyo Mumuyo oke mwele.

⁹ Indi kilya mulawuṟie muhende iṟehio kyakyo nyi kikundana, cha kipfa nyo muwenyi mui wapfunde nyi Ruwa kya ikundana muwenyi na wenyi.

¹⁰ Mukawewutya ikyo na wanawawama wose wakeri ifo Makedonyia kose. Indi lomtutuma muwike-ho mwengeṟia.

¹¹ Muwe mowinya-ho kiṟumi kyanu mochipfirilia na ipfuṟukanya shilya shanu na iṟunda na mawoko hanu hamenyi, chando lulembawasya.

¹² Kundu muchumie ohendo lulawa idedyo nyi walya wai ora lo nja mulawuṟie mweke fowo hando.

Mndumii nyi akeri icha

¹³ Nyo wanawawama, lokunda imdeya mulaichi kii kiteṟye kya walya walemaa iinutsopfo, kundu mulakae mochikuinadia cha walya wengi walawode kyekuwedya.

¹⁴ Kipfa kokoya lokusirya ke Yesu alempfa kaweṟuka, na wudo Ruwa echiduo walya wai wainutsye njia imu nao iisume nyi Yesu.

¹⁵ Na iki lurie imbia lombia kii kidedo kya Mndumii nakyo kikeri kiile, ke so ili lochikoyo luitsuhaa lui na moo kiheri kilya kya iwuya lya Mndumii, manya lochisongoṟyo wai wainutsiepfo.

¹⁶ Kipfa matika halya koichio iwawaso lyeamtsa ṟu lya msu mwele mchili na ombe lo Ruwa lochideda, Mndumii kachesoka ruwehu, oweṟe na lulya wapfie wa Kristo wechiṟuka wasonguo.

¹⁷ Ikyo kilemba naso ili lui-se na moo luitsuhaa lochidao handu hamu na walya lui mapuchinyi lushike kumbuhanana na Mndumii ipfo mumuyohu. Na wudo lochikaa lui hamu na Mndumii maheri hose.

¹⁸ Wihiṟianenyi moo nyo muwenyi na wenyi mochiongoyana oloho lu.