1WATESALONYIKYE 3 - Bibilia Kui Mdedie fo Kimochi

¹ Nkyo ili lulawekiidima itsuwa luledumbuo ke luhende ideo ipfo Atene luwenyi.

² Lukaaweduma Timoteo manowama odu mṟundi o Ruwa mopfuṟukanya ndumi ya Kristo kundu nambanze nyo nawemkarishia wuidiki.

³ Kulawone kochiwoneka afafaa shiwirenyi ishi. Kipfa nyo muwenyi muichi ke luiwawike kya ikyo.

⁴ Kyamba na mandi luwei konu lulesonguo imbia ke nyi kiluwari ituro. Na wudo kilemba chando muichi.

⁵ Nkyo kitewe na inyi njilekiidima itsuwa ngamdumya kya imanya wuidiki wu wonu, kulako mtewi ulya amemtewa na mawina hadu hakawewa ha wulya.

⁶ Na wulalu ili Timoteo amcha kodu ewuka konu kaweluchihiṟa eluongoya wuidiki wulya wonu na kikunda kilya na mkumbuye mcha muwode fo ilukumbuo so kiheri kyose, mui na macha heluwona so chando na so luwodo nyi hanu.

⁷ Nkyo kileenenga ipfo mkoromunyi na kiwirenyi kyadu kyose lomekarishyo kyanu kui wuidiki wu wonu, wanawawama.

⁸ Luitsinda na moo wulalu iliindi nyo muhoṟoki mukuwode na Mndumii.

⁹ Kipfa mwaano nyi mki loidima itaa Ruwa kipfa kyanu sia yo yose luichihio yanu sumhana na Ruwa chu odu.

¹⁰ Lukaeri iterewa kio na mfiri lochiwika matu matu kundu luwone oshangu lonu na imarisa wuidiki wu wonu hando wowuṟa-se mwengeṟia.

¹¹ Nao Ruwa amonyi, Ndeyadu na Mndumii odu Yesu naluhoṟotsie njia yadu yeshika konu.

¹² Na Mndumii namwengeṟye kikunda kyekundana muwenyi na wenyi na ikunda wose nakifeṟe mnu kimu na kilya so lumkundi na kyo.

¹³ Kundu ngoo tsanu tsihende ikanzo tsikae nlalutsu tsii na wuele sumhana na Ruwa Wande odu, matika Mndumii odu Yesu echiwoneka handu hamu na waele wake wose.