1WATESALONYIKYE 2 - Bibilia Kui Mdedie fo Kimochi

¹ Kipfa mwichi wuwenyi, wanawawama, ke lulekuidya ipfo konu kya wulyapfo.

² Indi ili luwemewawiṟo na ituro ipfo Filipi chando muichi lukawekukahaṟa na Ruwa chu odu luwehenda ihamba ipfo konu ndumi ya sia ya okiio na ngapano ing'anyi.

³ Wuikimbi wu wodu wuwekuwode manya na wudetsi na wulembipfo, ma mtambo iweihopfo.

⁴ Kya indi chando lulekundo nyi Ruwa naludambikye ndumi ya sia ya okiio nyi wudo luideda, chi kundu luwe lochichiana na wandu indi na Ruwa ichu ametunga ngoo tsadu.

⁵ Kipfa lulekupaya-ho na idedo lya ikulopa na wandu ma indipfo, ikyo mwichi, manya na iitsa-ho mweke fo wuehi, Ruwa ai mongochi.

⁶ Manya lulelalakya kiṟumi kiwukye wandunyipfo, ma kya konu ma kya ko wengipfo.

⁷ Luwerie pfinya yekaa-ho na mkoromu cha wasu wa kristo indi lulemba wahoneri ipfo kiidi kyanu cha ili mka mwongo aikunjia shikoku shake ndenyi.

⁸ So na wudo luwewodo m macha kyanu lukawekunda imwenenga chi ndumi ya sia ya okiio tupupfo indi na mrima ii menyi; nyi wudo mulemba wakunde wadu.

⁹ Kekumbuonyi-ng'u-wo ngatara tsadu na wawina, wanawawama. Luweiṟunda kio na mfiri, kundu lulawewona lochirohya ma umu onu iliindi luwemwongoya ndumi ya sia ya okiio iya ya Ruwa.

¹⁰ Nyo na Ruwa mui wangochi ke mkae iya luwemkaya nyo mui waidiki iwei ya wuhendeli na wuhoṟotsu na wusalari.

¹¹ Na mwichi chando luleikimba orio umu onu.

¹² Na imkarisha nyo na imtutuma cha mndu wande ekewutya mana, kundu muchumie mchumie isumhanye Ruwa ichu alemulahya nyo wumangi wulya woke na wuitoṟi.

¹³ Nakyo nyi kimaduma na so lotsinda lochiana Ruwa cha kipfa dedo lyo lya Ruwa momambya moicho kodu muleliwada chi cha dedo lya wandupfo kya indi chando likeri kya lohi cha dedo lya Ruwa. Nalyo likuwode nanyo mui waidiki lyechiṟunda.

¹⁴ Kipfa nanyo, wanawawama, momba waoshi wa siṟi tsa Ruwa tsiwodo nyi Kristo Yesu tsii ipfo Yudaya ili momeliso wukiwa wumu natso nyi washari wanu wenyi chando wo waleliso nyi Wayuda.

¹⁵ Nawo nyi wo walewaha Mndumii Yesu na waikimbi walya wakawelufuna naso. Wo waindya Ruwapfo, wawode tumbe na wandu wose.

¹⁶ Wechiluima yongoya mkambo ya wandu mbonyi kundu wahende ikiṟo. Kyawa kido kyeichuṟa manyamaṟo hawo kiheri kyose. Indi nyashi iya ya mainutsyonyi ilemcha huyawo.

Macha hehenda Tesalonyikye

¹⁷ Indi so, wanawawama, ili luwei waletse nanyo cha wangoeda kya oweṟe lumu kui oshangu chi kui ngoo lulekambiṟa kambi iwona oshangu lonu na macha hang'anyi.

¹⁸ Nkyo kitewe luwekundi icha na konu, inyi Paulo limu na lyakawi, indi Satana kaluima.

¹⁹ Kipfa nyi wu ai owedo lodu na sia na oṟo nchope ya kiṟumi ipfo sumhana na Mndumii odu Yesu mandi echikuloṟa kokoya chila nanyo.

²⁰ Kyamba nyo mui wuitoṟi wodu na sia.