1WATESALONYIKYE 1 - Bibilia Kui Mdedie fo Kimochi

¹ So Paulo na Silwano na Timoteo loiṟikiṟa siṟi ya ko Watesalonyikye iinjiwike kui Ruwa wande na Mndumii Yesu Kristo wutonga na ofoṟo shikae nanyo.

Ohendo na Mwidikye fo Watesalonyikye

² Luiwikya Ruwa mwaano mfiri yose kimaduma kyanu lochimsenda shiterewonyi shadu.

³ Lulatsia itamuo oshangunyi lo Ruwa odu Wande kyando kya wuidiki wonu na mawina ha kikunda na ikukarishia lya owedo lyewedya Mndumii odu Yesu Kristo.

⁴ Aka-wo wanawawama wakunde nyi Ruwa, chi luichi ke muiwasambuṟe!

⁵ Ili ndumi yo yadu ya sia ya okiio ilawembiia nyo kui dedo liyenyi indi na kui pfinya na kui Mumuyo Mwele na kui wutichi wose. Nanyo mwichi chando lulekukaya konu kipfa kyanu.

⁶ Mukamekuwakisha naso na Mndumii mombada dedo lilya kituryonyi muwewodo nyi sia ya Mumuyo Mwele.

⁷ Ikyo kilemtana nyo msendo fo ko waidikye wose wa ipfo Makedonyia na wa ipfo Akaya.

⁸ Kyamba ipfo konu dedo lya Mndumii lilembuka-ho likaweichio necha chi alya Makedonyia na Akaya tupupfo, kya indi wuidiki wonu woikuwada na Ruwa wukawemanyika hando hose kilakilukoya-se ideda kya ikyo.

⁹ Kipfa wekehamba wa wenyi kyadu njia lulemwitso nayo ipfo konu nyi nki, na chando mulemhalukya Ruwa momlehana na mfano iya muwe mochipfuṟukanya Ruwa menyi-moo ai o lohi.

¹⁰ Na iwedya Mana oke ichu alemṟutsa wapfunyi nache awuka ipfo ruwehu, nyio Yesu moluringa nyashi iya ikeri icha.