1WAMANGI 9 - Bibilia Kui Mdedie fo Kimochi

Ruwa achea Solomoni lya kawi

¹ Mangi Solomoni kekimarisa iwika mba ya Mndumii-Ruwa na mba ya Mangi hamu na mba tsose awelangie itsiwika,

² Mndumii-Ruwa kambonekia se, chandu alewonekia kulya Gibeoni.

³ Mndumii-Ruwa kambia, Ngaicho kiterewo kyapfo na kilya ukundi. Ngailisha mba ii ulenjiwikia kundu wandu wako waindie rina lyako iya mlungana. Njechiiringa na iikunda kiheri kyose.

⁴ Na iyo kokoya ochinjiindia na wuhoṟotsu wo mrima na wuhendeli chandu ndeo Dawidi alewuta, koindia wuwawaso woko na iinutsia shilya shose njilekuwawasa, kochiosha mawawaso hako na njia tsako,

⁵ kyasia, njechiwanza loṟika lopfo lo wuitoṟi wo Mangi kiidi kya Israeli mlungana, chandu njilewika kyasa ko ndeo Dawidi njechihamba, “Ochiwuṟa mndu modamia loṟikehu lopfo lo wuitoṟi pfo.”

⁶ Kyaindi iyo ang'u wana wapfo mkahaluka mulanjioshe, mulawade mawawaso hako na shilya njechimloṟa mukada, mukahenda iindiya maruwa hengi na ihahoneria.

⁷ Kyasia njesamiṟa wandu wako Israeli wuka oruka lu njilemuinenga, na mba njileishimbuo kipfa kya rina lyako, njechiikumba kuleshe na inyi, na yechiwa kindo kemino na ipiṟo kiidi kya wandu wa mkambo yose.

⁸ Mba ii yechiwunduka iwe mrapu, orio moidaho nechikangaṟika na isingitsa mdo, na iwesa, “Nkiki kitewe Mndumii-Ruwa alewutia oruka lu na mba ii kudi?”

⁹ Wandu wengi wahaluo, “Nyi kipfa waleda Mndumii-Ruwa, Ruwa owo alewuta wasahuyawo orukenyi lo Misri, wakawadana na maruwa hengi, wakahaindia na ihahoneria, ko ikyo Mndumii-Ruwa nawaendie ngataṟa tsi tsose.”

Solomoni ainenga Hiramu mṟi makumi hawi

¹⁰ Mangi Solomoni nalewika mba tsilya tsiwi; kiidi kya maka 20, mba ya Mndumii-Ruwa na mba ya Mangi.

¹¹ Mangi Solomoni kainenga Hiramu Mangi ya Tiro, mṟi 20, kiidi kya isanga lya Galilaya (Kipfa Hiramu-chu nyi ulya alemdikia mbau tsilya tsa meresi na miberoshi, na sahabu da, chandu awekundi kipfa kya iwika mba.)

¹² Kyaindi Hiramu kekiafukia awuka Tiro na iwona mṟi yo aleinengo nyi Solomoni alechihiyo kyayo pfo.

¹³ Kyasia, kawesa Solomoni, “Manowama, nyi mṟi iha onjiiinenga?” Nyi kyo kitewe mṟi yo yekelaho nyi oruka lo Kabuli mṟasa inu.

¹⁴ Hiramu nawedikie Solomoni sahabu ishikie shilo (3,600).

Maṟunda hengi ha Solomoni

¹⁵ Itsi nyi mbonyi tsirianyi na Mangi Solomoni chandu aleinenga wandu maṟunda malemeri ko iwatukia kundu wawike mba ya Mndumii-Ruwa, mba ya Mangi, omombo lo Milo na lo Yerusalemu, na iwika wuhya mṟi ya Hasoni, Megido na Gerezi.

¹⁶ (Gezeri nyifo mṟi Farao, Mangi ya Misri awefudaye, kafukoṟa na modo na iwaha Wakanaani, weweipfo. Numa mana o Farao kekialiko nyi Solomoni, Mangi ya Misri kainenga mana chu oke mṟi fu fo Gezeri fuwe nyi owoko loke lo nga ya walyi.

¹⁷ Kyasia Solomoni kafuwika wuhya mṟi fu fo Gezeri), na wudo kawika na Beth-horoni ya tsindenyi,

¹⁸ na wudo na mṟi ya Baalathi, na Tamari mṟi fui kundu ko olele orukenyi lo Yuda.

¹⁹ Na mṟi yake yose ya shikumbi, magari hake hekuruo na wedoya frasi wake, na orio kindo awekundi iwika kiidi kya Yerusalemu, Lebanoni ang'u handu hengi kiidi kya wumangi woke.

²⁰ Wandu wengi wose waletsuhaa kiidi kya Waamori, Wahiti, Waperizi, Wahivi na Wayebusi, iwo wose walawei wa mkambo fo Israeli.

²¹ Kimu na oshari lowo iwo walelema irumatso nyi wa Israeli, Solomoni kawadika mhanda fo maṟunda heturo mṟasa inu.

²² Kyaindi kiidi kya, Israeli, Solomoni alehaluo ma umu nawe isinga-pfo, wo nyi wawei waskari, waṟundi wake, wehoṟokia wengi, wanjama wake, wehoṟokia magari hake hekuruo, na wedoya, frasi wake.

²³ Iwa wai wasende nyiwo wawei wanjama waweiwawike weambuya iṟunda lya Solomoni; wandu 550, iwo nyiwo wawehoṟokia wandu weṟunda.

²⁴ Kiidima mana ulya o Farao awemalike nyi Solomoni, kasama mṟi fo Dawidi, kahenda ikaa kiidi kya mba yake amonyi Solomoni awembikie; kiidima Solomoni kawikia Milo omombo.

²⁵ Makamba haṟaṟu orio maka Solomoni nawekewuta shidaso shemaya modonyi, na shidaso sha ofoṟo huya kitaṟa kedesia awewikie Mndumii-Ruwa, kawekoṟa opfamo lo ubani Mndumii-Ruwa kawesaya mba necha.

²⁶ Solomoni kasungusia merikebu tsifoi ipfo Esion - Geberi, kufui na Elothi ii mbai ya ipalyipalyi lya Shamu, orukenyi lo Edomu.

²⁷ Na Mangi Hiramu kaduma wanjama wake hamu na wandu weṟunda mṟingenyi hamu na waṟundi wa Solomoni.

²⁸ Walewada kyaṟo ihenda oruka lo Ofiri, waende-pfo sahabu, wakaendie Mangi Solomoni ishikie kufui shilo (14,000).