1WAMANGI 8 - Bibilia Kui Mdedie fo Kimochi

Isanduku lya mkundana lyaendo Hekalunyi

¹ Kyasia Mangi Solomoni kasanza wanene wa wandu wa Israeli, na shishari na wasongoru wawo kundu wawute isanduku lya Mkundana lya Mndumii-Ruwa liwuke mṟinyi fo Dawidi fui Sioni.

² Wandu wa Israeli wakakusanza handu hamu ko Mangi Solomoni kiheri kya mkonu mnene fo meri fo Ethanimu fui meri fo mfungade.

³ Wasongoru wa wandu wa Israeli wakacha, Wakohanyi na Walewi wakaira isanduku lilya.

⁴ Wakasamiṟa isanduku lya Mndumii na shihia shose na ihema lilya lya chila na shihia shiele shose.

⁵ Mangi Solomoni na wandu wose wa Israeli, wakakusanza osehu lo ya isanduku lyo wakawuta shidaso ko Mndumii-Ruwa, shiwei nyi mmbe na machondi halechiwa itala.

⁶ Kyasia wakohanyi wakaende isanduku lya mkundana lya Mndumii-Ruwa, wakaliwika handu halyo kiidi kya mba ya Mndumii-Ruwa alya handu haele ngoseṟa wanda ya makungo ha kerubimu.

⁷ Kipfa makungo ha makerubimu hawekualie huya isanduku lyo-ko-ikyo makerubimu wakashikia isanduku hamu na ngo tsalyo.

⁸ Ngo tsiweinjileshe tsikawewono kui ora lumu ui handu haleshe kyaindi tsilewa iwono kui nja pfo, ngo tso tsiiho na inu.

⁹ Kiidi kya isanduku lyo la mkundana kuwei-pfo kindo-pfo shile nyi maho halya ha wuwawaso halya Mose aleambia kulya Horebu, alya handu Mndumii alewika mkundana foke na wandu wa Israeli wawuka orukenyi lo Misri.

¹⁰ Kiheri wakohanyi walewuka handu haele, ipuchi likaichuṟa mba ya Mndumii.

¹¹ Kikatewa wakohanyi walaidime iṟunda kipfa kya ipuchi, kipfa wuitoṟi wo Mndumii wuleichuṟa mba iya ya Mndumii.

¹² Solomoni kahamba “Mndumii nalewika mnengeṟi nginehu, kyaindi kahamba nechikaa kiidi kya mema rambatanyi.

¹³ Nyi kya lohi ngakuwikia mba yekaa. Kochiwa kopfo mlungana.”

Muongoe fo Solomoni

¹⁴ Kyasia Mangi kahalukia wandu, kawikia ona mamiingi fo Israeli, mamiingi fo fuhoṟoki

¹⁵ kahamba, “Mndumii naṟumisho, Ruwa o Israeli, ichu aleinutsia kui owoko loke shose elewia Dawidi ndeako kehamba,

¹⁶ ‘Wokia kiheri kilya inyi njileende wandu wako Israeli wuka Misri, inyi njilesambuṟa mṟi fose kiidi kya Israeli handu njewika mba yelaho kui rina lyako pfo, indi njilesambuṟa Dawidi naitoṟie wandu wako Israeli.’

¹⁷ Wulalu kiwei mrimenyi fo Dawidi ndeako iwika mba ya rina lya Mndumii-Ruwa o Israeli.

¹⁸ Indi Mndumii kawia Dawidi ndeako, ‘Chandu ukusirie iwuta na kiwei kicha da iwika mba yelaho kui rina lyako iki kii mrimenyi fopfo,

¹⁹ Ma kudo iyo ochiidima injiwikia mba pfo, indi mana opfo nyio echinjiwikia mba yelaho kui rina lyako.’

²⁰ Wulalu Mndumii nainutsia kyasa kyake ahambie kipfa inyi nyi njii handu ha Dawidi ndeako, na idamia njeitoṟia Israeli, chandu Mndumii alewika kyasa, ngawika mba kui rina lya Mndumii ai Ruwa o Israeli.

²¹ Ngawika handu ha kyanya hewika isanduku lya mkundana, kii nyi mkundana fo Mndumii fuwei kiidi kya Mndumii na handu wawei waku wadu mandi halya alewawuta Misri.”

Kiterewo kya Solomoni

²² Kyasia Solomoni kahoṟoka sumuhana na rasio ya Mndumii hamu na mamiingi fo Israeli, kalesha mawoko hake ruwehu,

²³ Kahamba, “Hoi Mndumii-Ruwa o Israeli, kulawode Ruwa cha iyo, huye ruwehu ang'u orukenyi, ekekumbuo shasa na iloṟa ikunda lyake ko shisinga shake walya wemuosha kui mrima yawo yose.

²⁴ Ichu aleṟundia kisinga kyake Dawidi ndeako chando alembia na imṟingishia, ee da, chandu kulededa na dumbu lyapfo kumonyi na iinutsia kui owoko lopfo mkonu fu fo inu.

²⁵ Na wulalu lyo Mndumii-Ruwa o Israeli, keinutsia kilya kulewia Dawidi ndeako kisinga kyapfo kochimmbia, ‘Kochikaa kuwade mndu echidamia loṟikehu echiitoṟia Israeli, shile mana opfo ichu mochumia kui wuhoṟotsu, na iosha wuwawaso woko.’

²⁶ Na wulalu, iyo Ruwa o Israeli, kewanza madedo hapfo chandu ulededa na Dawidi kisinga kyapfo ai ndeako.

²⁷ “Ale wai, Ruwa nechiidima ikaa orukenyi? Ambuya ruwehu yechikushika pfo ma ruwehu ya ruwehu yechiidima ikushika pfo kechiwa iki mba i njilewika?

²⁸ Keadanyia kiterewo kya mṟundi opfo na shiano shake, hoi Mndumii-Ruwa oko, uicho kiterewo na kifuhiyo kya mṟundi opfo mkonu fu fo inu.

²⁹ Meso hapfo kio na mfiri haambuye mba ii chandu ulehamba, ‘Rina lyako likae iya,’ handu iyo ochiadanyia shiterewo sha isinga lyapfo lyechiterewa iya.

³⁰ Adanyia shiterewo shako inyi mṟundi opfo na sha wandu wapfo Israeli ili mandi wechiterewa, wahalukie handu ha uicho shiterewo kui kulya ruwehu, komeicho noluhoṟie.

³¹ “Mndu kadekio manomae nao kaendo na rasionyi kopfo nalyisiṟo nyamu, nao kalya nyamu,

³² Uicho ui ruwehu, nodumbuo kyake, naawo uwemwaanduya hamu na wose. Icho okoya owingo nomhoṟuo kihianyi na madeko hake, na icho alawode tewe nomlekie kochimiichika kya wusumhanyi woke.

³³ ‘Kokoya wandu wapfo Israeli walemo shidenyi kipfa kya wakituwa, kipfa kya wunyamaṟi wowo wakunyamaṟie iyo, wakaterewa mhoṟie wechikunyiiṟa kiidi kya mba.

³⁴ Naho uwaicho ukeri ruwehu, uhoṟie wandu wapfo Israeli wunyamaṟi wowo, kiidima uwawihiṟe na orukenyi ulewawasia wasahu wawo.’

³⁵ “Mvuo ilakape kipfa kya wunyamaṟi wakaterewa sumuhana na handu ha na ihamba rina lyapfo, wakada wunyamaṟi ili owadedia.

³⁶ Hoi uicho ui ipfo ruwehu, uhoṟie njonyamaṟo tsa waṟundi wapfo, wandu wapfo Israeli, kunu kochiwalosha iosha njia njihoṟotsu, nolekie mvuo inose oruka lu uleinenga wandu wapfo luwe kyoṟa kyawo.

³⁷ “Kokoya kuwode njaa orukenyi, ang'u ndaṟe ya makokoi, ang'u mbaṟi fung'anyi, ang'u ohonjo, ang'u wandu wapfo wakatengetio nyi wakituwa ora lose lo mṟi fose, kokoya kuwode ngapo yose ang'u ndaṟe yose,

³⁸ hoi uicho shiterewo sho shose shechiterewo na wandu wapfo, Israeli, ang'u shechiterewo na mndu ose ulya ang'u wandu wose wa Israeli, orio mndu kamanya mhanda fui kiidi kya mrima foke, kakuterewa kechileshia mba i mawoko hake.

³⁹ Kyasia uadanyie ipfo kopfo ruwehu, nohooṟie na ilekia, uwewawutia orio mndu chandu kimbaṟi (kipfa nyi iyo kumonyi uichi mahio ha mrima ya wandu wose)

⁴⁰ kundu wakuindie wose kiheri wai na iyo kiidi kya oruka uleinenga wasahuyawo.

⁴¹ Na wudo, kiheri mhenu alai umu o wa Israeli kacha awuka oruka lo wuhenu kuleshe kipfa kya rina lyapfo.

⁴² (Kipfa wandu wa mkambo ingi wechiicho kiṟumi kyapfo na pfinya na wuitoṟi wopfo), mndu cho kacha katerewa kiidi kya mba i

⁴³ hoi na hoi umuadanyie ipfo kopfo ruwehu, umtarame shose mhenu cho akuterewa, kundu wandu wose wai kunu orukenyi wamanye rina lyapfo na ikuowuo, na wana wa Israeli naawo, wamanye ke mba ii njilewika injisende kui rina lyapfo.

⁴⁴ “Wandu wakahenda shidenyi ikapana na wakituwa wawo, kui ora lose ochiwaduma, nawo wakaterewa Mndumii kiidi kya mṟi fu kulefusambuṟa na mba ii njilewika kui rina lyapfo.

⁴⁵ Uicho shiterewo shawo na shieṟeṟo shawo, na iwanza ikunda lyapfo nowainenge wuwinzi.

⁴⁶ “Kokoya wakudekio kipfa kulawode mndu alakedeko na iyo koicho nyashi, kowadambika ko wakituwa wakadao wapfungo orukenyi lo kuleshe ang'u hafui.

⁴⁷ Wakakumbuo mrimenyi yawo ipfo kiidi kya oruka lulewaduo wapfungo, wakadumbuya na ikueṟeṟia ipfo orukenyi waledao wupfungonyi wechihamba, ‘Lonyamaṟa, lukahenda mpuria na iwuta sha mkika.’

⁴⁸ Wakadumbuya lohi ko makusaṟo hawo, na mrima yawo kiidi kya oruka lo wakituwa wawo walewaduo wapfungo, wakaterewa kya oruka lowo lulya kuleinenga wandeawo, mṟi fulya kulefusambuṟa, na mba ii njilewika kui rina lyapfo.

⁴⁹ Kewaicho kukeri ipfo ruwehu handu okekaa, kiterewo na kieṟeṟo kyawo na iwanza ikunda lyapfo kowo nowainenge wuwinzi.

⁵⁰ Nohoṟie wandu wapfo walenyamaṟa na shilya shose walehenda kihadi na wuwawaso wopfo; kewainenge isaṟia iwo walewaduo wapfungo kundu wawasaṟie.

⁵¹ Kipfa nyi wandu wapfo, wa kyoṟa kyapfo, iwo ulewadosa wuka Misri, kiidi kya matuuro na wusinga.

⁵² “Uambuye kiterewo kya mṟundi opfo na wandu wapfo, Israeli, uwaadanyie orio wamekuterewa.

⁵³ Kipfa nyi ulewaletsana na wandu wa mba ingi orukenyi kundu wawe wapfo wa kyooṟa kyapfo, chandu uleonguo mbonyi tsi kiheri kya Mose, mṟundi opfo, kiheri kilya ulewawuta Misri, hoi Mndumii-Ruwa.”

Kiterewo kya ifurumia

⁵⁴ Kyasia, Solomoni kekimaa iterewa na ieṟeṟia Mndumii-Ruwa, kakure alya rasionyi lya Mndumii-Ruwa handu awepfirie ndi airie mawoko hake huye.

⁵⁵ Kahoṟoka kiidima kawikia Waisraeli ona walya wose wawesanzieho, kechihamba kui ṟu ling'anyi.

⁵⁶ “Naṟumisho Mndumii-Ruwa chu awonyia wandu wake Israeli, isia moo chandu kyasa kyake kii. Nainutsia shasa shake shose shicha aleshiwika kiheri kya mṟundi oke Mose.

⁵⁷ Mndumii-Ruwa, Ruwa odu, nakae naso, chandu awei na wandeadu, loterewa nalalude, ma nalalukumbe.

⁵⁸ O naembeṟutse mrima yadu koke, kundu luoshe njia tsake lochiwada mawawaso hake, wusongoru woke na chandu ahambie kya wucha chandu alewia wandeadu.

⁵⁹ Kyasia, madedo ha hako hai kiterewo kyako oshangunyi lo Mndumii-Ruwa, lukae hafui, na Mndumii-Ruwa, Ruwa odu, mfiri na kio, nao natarame mṟundi oke, na wandu wake Israeli, kundu waiṟimiṟe kiidi kya shilya wahuṟi orio mkonu.

⁶⁰ Wandu wa mkambo yose wuyanenyi wechimanya ke Mndumii-Ruwa nyio Ruwa kulawode se ungi.

⁶¹ Nalyo muwe wahendeli ko Mndumii-Ruwa, Ruwa odu mochiosha shiloshio shake na iindiya mawawaso hake hose cha inu.”

Ishimbuyo lya hekalu

⁶² Kyasia Mangi Solomoni na Waisraeli wose wawei kimu nao wakadasia Mndumii-Ruwa.

⁶³ Solomoni kainenga Ruwa shidaso sha ofoṟo mmbe (22,000) na machondi (120,000). Nyi wudo Mangi na wandu wake waleshimbuo mba ya Mndumii-Ruwa.

⁶⁴ Mkonu naafo, Mangi kashimbuo ora lo makidi hawi ha osa kuwei kusonguo ko mba ya Mndumii-Ruwa, kipfa nyiho handu alewutia kidaso kemaya modonyi, na kya mso na mafuda ha kiano kya ofoṟo; kipfa kitaṟa kilya kya aṟeṟa kileidima iwada mwano ii yose pfo.

⁶⁵ Na Solomoni ko mfiri 14 kawika mfuho kimu na Waisraeli wose, nawo wakacha kuwuka kichumi kya Hamathi, mṟasa meda fo Misri.

⁶⁶ Kiidi kya mfiri fo 8, Solomoni kasama wandu, nawo wakalangia Mangi ona, wakahenda kowo wechikapa ngululu na ichihiyo kipfa kya wucha Mndumii-Ruwa alewuloṟa ko Dawidi mṟundi oke, na wandu wake Israeli.