1WAMANGI 7 - Bibilia Kui Mdedie fo Kimochi

Kanyi ko Solomoni

¹ Kyasia Solomoni kawika mba yake amonyi, ilemduo maka 13 imarisa iṟunda lyo.

² Kiidima kawika mba ilelaho, “Mmba ya ngeṟa ya Lebanoni.” Wuleshe woyo nyi wuwei meta (44), wulandari woyo meta (22), na wuleshe wohenda huye meta (13:5) iwei njiwike kiidi kya njotasa tsiṟaṟu tsa ngo tsa meresi, ngo-tso, tsilewadia mriti ya meresi ko ora lo huye.

³ Orio otasa luwewode ngo (15), Kyasia tsose kotsisanza tsiwei ngo (45). Shiṟiha shilewiko huya ngo tso, kashiwikia makai ha mbau tsa meresi.

⁴ Kuwewode njotasa tsiṟaṟu tsa matiṟisha haambuyanyi.

⁵ Mongo yose iwei ya mchuruwuo, na shiwango-wango sha matiṟisha nawo shiwei sha mchuruwuo da!

⁶ Kawewika se handu ha osehu kui ngo, wuleshe wuwei meta (22) na wulandari meta (13:5). Ora lo kusonguo lo mba yo kuwode keshikia sa kitutu.

⁷ Alya osehu kasungusia handu hewika loṟika lo wuitoṟi kundu naidime idumbuo mondu, naanduye wandu, (nyiho aleluhaluo mengenyi yake). Handu ho kawika na mashidi ha meresi wokia wanda itane oshika kai.

⁸ Na mba yake yekaa iwei ingi ora lo numa ya menge ifananyi na itso tsingi. Kawewikia mana o Farao sa awemwalika mba ifananyi na iya ya Osehu.

⁹ Mba tsi tsose tsiwei tsa maho ha wuhuru, maho hetsana ha wuhuru na hengi hedumbuo na msemeno, kyamba na kyanja, wokia otende itane maho ha huye na ha kose itane osa lung'anyi.

¹⁰ Na otende luwei lo maho ha wuhuru wunganyi maho ho hang'anyi hawei ha meta (3:5) na hengi hawei meta (4).

¹¹ Na huye kuwewode maho ha wuhuru, maho hetsana, chando kiwaṟi na meresi naawo.

¹² Kiṟiha kya Mangi, kiṟiha kya mba ya Hekalu, na kiṟiha kya osehu kya Hekalu, shiwewode njomombo tsitsihekie njotasa tsa mriti ya mbau tsa meresi orio mbanga tsiṟaṟu tsa maho matsane.

Iṟunda lya Hiramu

¹³ Mangi Solomoni kaduma wandu wahende ilaha Hiramu iwuka Tiro.

¹⁴ Nao nawei mana o mka mkusu o kishari kya Naftali, na ndee nawei mndu o Tiro mtsanyi o aṟeṟa; nawemwinenge wulaanyi na wuṟango wo, maṟunda hose ha aṟeṟa. Kashika ko Mangi Solomoni, kamṟundia maṟunda hake hose.

Ngo tsiwi tsa aṟeṟa tsa Hekalu

¹⁵ Kawesungusia ngo tsiwi tsa aṟeṟa, meta 8 ko ido huye orio imu, na mtengetio fo meta 5:5 itengetia ngotso.

¹⁶ Kawewika na oṟo tsiwi tsa aṟeṟa; njisalaṟe, tsewika owerihu lo ngo tsilya oṟo imu meta 2:25 na meta 2:25 ihenda huye.

¹⁷ Kuwewode na ndusu njioke maṟaushi cha iṟunda lesuka mshe; shose shiwei shechopa oṟo tsilya tsa aṟeṟa; njisalaṟe, tsewika huya ngo tsilya.

¹⁸ Kawesungusia na ofano lo ndunda tsa mkomamanga, katsipfungia wotengetia oṟo tsilya tsi huye ya ngo ngamba tsiwi.

¹⁹ Oṟo tso tsiwei huya ngo kiṟihenyi, tsiwei tsa iṟunda lya wuaria wung'anyi. Wuleshe wotso ihenda huye meta 1:8.

²⁰ Kukowada oṟo huya ngo tsiwi, kufui na mbiṟi iwei mbai ya ndusu njioke maṟaushi, kukowada mkomamanga 200 hakakaa ora lu na ora lu lo huye ya orio iya ya kawi.

²¹ Hiramu kahoṟotsa ngo kiidi kya mba ya hekalu, kahoṟotsa ngo ora lo kulyo kailaha rina nyi Yakini (nechiwanza), kahoṟotsa na ora lo kumoso, kalaha rina ni Boazi (kui na pfinya).

²² Ngo tso tsikachopo kui ofano lo shiwaṟo shelaho yungiyungi. Na wudo iṟunda lya ngo lyikamarisika.

Ipipa lya aṟeṟa

²³ Kyasia Hiramu kasungusia ipipa lying'anyi lya mṟinga, wulandari wolyo nyi meta 4:5 wuka ora lu itane ora lungi, na ido huye meta 2:2, na itengeta ora lo kyanja lose nyi meta 13:5.

²⁴ Na wanda ya okowa lo tsindenyi lo ipipa lyo, kuweikusungusie ofano lo shitumo shing'anyi sheṟingichia ipipa lyo, shikawiko ngamba tsiwi, orio imu iwei meta 13:5 shitumosho shilewiko mandi halya ipipa liweṟundio.

²⁵ Ipipa lyo likahekio huye ya sanamu tsa mapung'a ha mmbe 12, haṟaṟu hakaambuya mtsudu, haṟaṟu ora lo kyukanyi, haṟaṟu, nuka, haṟaṟu ora lo ngamenyi. Mapung'a ho hawemawike woambuya nja na ko nduma kukawa kyamba.

²⁶ Kiṟiṟima kya ipipa lyo kiweshikie sentimeta 7:5 liwefanani na kikombe kya kiwaṟo kelaho “Yungiyungi,” Ipipa leidima iwada mṟinga lita (40,000).

Magari ha aṟeṟa

²⁷ Hiramu kasungusia magari 10 ha aṟeṟa, orio igari wuleshe wolyo nyi meta imu na robo tsiṟaṟu, meta 1:8 wulandari, meta 1:8 ihenda huye.

²⁸ Magari ho haweimasungusie kuile:- Kuwewode mriti ya menya iwewodanyi na shiatso. Huye ya mriti yo iwewodo nyi shiatso.

²⁹ Kuwewode na sanamu tsa miiso, mapung'a na shiumbe shiwode makungo. Sanamu tso tsa miiso na mapung'a tsiwei tsishikie na ialio nguwo njicha njioke necha.

³⁰ Kiidima, orio igari liwewode shidenga shii sha aṟeṟa. Mbai tso tsiina tsa magari kuwewode shindo shewada sha aṟeṟa kipfa kya itangi ling'anyi. Kufui na orio kewada kuweikuchope na shiwaṟo sheoka.

³¹ Mongo fo igari fuwei handu hakuirie huye cha nusu meta. Ko ora lo kyanja mongo fuwei mṟehe, na mriti iwei cha kipala, manya chi ya mbiṟi pfo.

³² Na shidenga sho shiina shiwei wanda ya mriti yo; menya tsa makidi hawi tsetengeta shidenga sho shiwelunganyi na mbikie fo igari lyenyi, wuleshe wo henda huye lo shidenga sho wuwei robo tsiṟaṟu tsa meta.

³³ Ofano lo shidenga sho nyi cha sha magari hekuruo, na menya tsa makidi hawi, oṟo tsalyo, menya tseala, na shitela shalyo, isho shose shiwei shesalaṟa.

³⁴ Wanda ya orio igari kuwewode menya tsiina tseala ipfo mbarinyi tsiwodanyi na igari.

³⁵ Huye ya orio igari kuwewode kihowo kiwei cha oṟo robo meta ihenda huye; na shindo shewada na mriti iwei ora lo huye ikawadana na igari lilienyi.

³⁶ Na orio handu kulewoneka kuwode mwanya kiidi kya mriti ya orio igari, Hiramu kasungusia mṟeho ya mando hawode makungo, miiso na mashidi hafananyi na makangachi, kaṟingichia na oṟo tso.

³⁷ Njofano tso tsose ikumi tsa magari tsiwefananyi, tsiwode wuleshe, na umbo lilyalilya.

³⁸ Hiramu kawesungusia mapongo ikumi ha aṟeṟa, limu ko orio igari. Orio ipongo liwewode wulandari wo meta 1:8 liwode wuidimi wowika mṟinga lita 880.

³⁹ Kawika magari hatanu ora lo nuka lo mba, na hatanu ora lo mtsudu lo mba; na ipipa lilya kaliwika ora lo nuka ya ngamenyi lo mba.

Shihia sha Hekalu

⁴⁰ Kyasia Hiramu kasungusia nungu na makumbi. Kamarisa iṟunda lilya alewawasio nyi Mangi Solomoni chandu awekundi kirianyi na mba ya Mndumii-Ruwa.

⁴¹ Ngo tsiwi, mboṟiko tsiwi tsing'anyi naletsiwika huya ngo, na ndusu njioke maṟaushi tseshikia oṟo tsiwi,

⁴² Ofano lo makomamanga 400 kipfa kya itso njioke maraushi tsiwi, ngamba tsiwi tsa makomamanga ko orio oṟo ndusu njioke maṟaushi kundu ishela oṟo tsilya tsiwi tsiwika huya ngo.

⁴³ Ngoseṟa, nalesungusia magari ikumi, na shewada ikumi kiidi kya magari ho;

⁴⁴ Na ipipa lilya limu na sanamu tsa mapung'a ikumi na hawi wanda ya ipipa lyo.

⁴⁵ Na shinungu shilya, na makumbi na mapongo, isho shose shiwei kiidi kya mba ya Mndumii-Ruwa shikeri shindo Hiramu aleshiṟundia Mangi Solomoni shiwei sha aṟeṟa njisanje mnu.

⁴⁶ Shindo sho shose Mangi naleshiṟundia rendewelenyi lya Yordani ora lo teri ya shinungu kiidi kya Sukothi na Serathani.

⁴⁷ Solomoni alehesha ulemeri wo shindo shi shose pfo kipfa shiwefoi shikaeṟa, na kipfa wulemeri wo aṟeṟa wulalemanyika.

⁴⁸ Solomoni kasungusia shihia shose shiwei sha mba ya Mndumii-Ruwa, kitaṟa kedasia kya sahabu, mesa ya sahabu kipfa kya mkate yewika oshangunyi lo Ruwa.

⁴⁹ Shinaṟa sha taa sha sahabu njicha shilewiko osehu lo handu haele mnu, shitanu ora lo nuka, na shitanu ora mtsudu, shiwaṟo, taa, mhado, shose shii sha sahabu.

⁵⁰ Shikommbe, makasi hedumbuo ndusu tsa mshumaa, mboṟiko, shipalu shewikia ubani, mdiko yeduo modo, shose sha sahabu njicha, cherenyee tsa mongo ya ora lo kyamba. Handu halya haele mnu, na cherinyee tsa mongo ya handu ha wuindi ha hekalu, cherenyee tsose tsiwei tsa sahabu.

⁵¹ Kyasia Solomoni kamarisa iṟunda lyose lya mba ya Mndumii-Ruwa. Kiidima Solomoni kaende shihia shose shilya ndee Dawidi aweshiwikie wuele nasho nyi fesa, sahabu na shihia shose, kashiwika kiidi kya kisa kya mba ya Mndumii-Ruwa.