1WAMANGI 6 - Bibilia Kui Mdedie fo Kimochi

Solomoni awika Hekalu

¹ Solomoni nalewoka iwika mba ya Mndumii-Ruwa maka fo 480 wokia Waisraeli wawuka Misri. Nyi maka fo kaana (4) wokia Solomoni alewada wumangi kiidi kya Israeli meri fo Zifu fui meri fo kawi (kui itala lya meri ya Israeli.

² Mmba ya Solomoni alewika kipfa kya Mndumii-Ruwa wuleshe woyo wuwei nyi meta (27) wulandari meta (9) na ko huye nyi meta (13:5).

³ Kawewika na kiṟiha ipfo mmbenyi wulandari wokyo meta (4:5) wokia ora lumu lo mba mṟasa ora lungi. Na kosoka ipfo osehu lo mba luwei meta (99).

⁴ Kawewika na matiṟisha malandari kyamba na masise kyanja.

⁵ Kawewika na ngo katengetia kose, kundu tsiwanze omombo lo nja; kawewika na shiṟiha sha mbai orio ora lo mba.

⁶ Shiṟiha sha wanda, kiidi kya isho shileengeṟio-ho shiwei sha wulandari wo meta (2:25) na gorofa ileituma iwewode wulandari wo meta (2:75), na gorofa ya huye piu iwewode wulandari wo meta (3). Gorofa-tso tsiweidanyi kui wulandari, kipfa Solomoni nalenyiṟa nyiṟa omombo lo nja itengeta mba, kundu mriti yewanza mba ilawadane na omombo.

⁷ Kiheri mbayo iwewiko kuleichio ṟu lya kiria, ang'u lya menya pfo, kipfa ilewiko kui maho hawei maṟeheṟe wokia ipfo kundu halesumo na iendo.

⁸ Kichumi keida ora lo wanda lo mba-yo kileengeṟo

⁹ Nyi wudong'u Solomoni alewika mba iya, ikamarisika. Kai lya mba iya nawewikie mriti na mbau tsa mashidi ha meresi.

¹⁰ Kotengeta kya ora lo kyanja nawewikie shiṟiha orio gorofa, wuleshe wohenda huye nyi meta (2:25), shiwei shilunge na mba kui mriti iya ya meresi.

¹¹ Idedo lya Ruwa likachea Solomoni lyehamba,

¹² “Kirianyi na mba ii ukeri iwika, koosha mawawaso hako na iwada madedo hako, nyi kya lohi njechikuwutia mbonyi tsilya njilewikia ndeo Dawidi kyasa.

¹³ Inyi njechikaa kiidi kya wana wa Israeli, na njechilekana nawo ma indi-pfo.”

¹⁴ Ko ikyo Solomoni kamarisa mba iya awei iwika.

Hekalu lyashelo kyamba

¹⁵ Ora lo kyamba lo omombo naleṟinda kui mbau tsa meresi, wokia wanda itane okoya mriti ya kai, na wanda kaala mbau tsa msedi.

¹⁶ Kiṟiha kya kyamba kelaho handu haele mnu, kilewiko ora lo nduma lo mba, kiwei kiwike na mbau tsa meresi wokia wanda itane kai, na wuleshe wokyo nyi meta (9).

¹⁷ Mmba iya iwei kusonguo ko handu halya haele mnu, iwei wuleshe wo meta (18).

¹⁸ Mbau tsa meresi tsiwei njiale omombohu lo mba ko kyamba, tsikaṟehoṟeho ofano lo ikidi lya mbuyu na shiwaṟo shiwaṟie. Orio kichengo kiwe kishikie na mbau tsa meresi ma kuwode iho lilewono pfo.

¹⁹ Makidi hawi ha mba ya Solomoni naweṟeheṟie kiṟiha kya kyanya handu hewika sanduku lya mkundana lya Mndumii-Ruwa.

²⁰ Kiṟiha kyo kiwei meta (9) ko wuleshe na wulandari, meta (9) wuleshe, meta (9) ihenda huye, kiwei kichope ko sahabu njicha. Ee da, kawesungusia rasio kui mbau tsa meresi.

²¹ Solomoni kaichopa ko sahabu njicha ora lo kyamba lo mba na kusonguo ko kiṟiha kya kyamba kawika ho mshe ya sahabu, wokia ora lu itane ora lu lo kawi, kaichopa ko sahabu.

²² Mmba yose naleichopa ko sahabu, na rasio lyose liwei kiidi kya kiṟiha kya kyamba.

²³ Kiidima kawesungusia ko mbau tsa msinefu, ofano lo makerubi hawi, wawode makungo, orio umu (meta 4:5) wuleshe wo henda huye, kawawika kiṟihenyi kya kiidi.

²⁴ Orio ikungo liwewode wuleshe wo meta (2:25) ko ikyo wuleshe wo njunju imu ukoye njunju ingi meta (4:5).

²⁵ Ofano lo kawi lo kerubi luwei meta (4:5) ko wuleshe; njofano tsi tsiwi, tsiwewode wuleshe wulya wulya na umbo lilyalilya.

²⁶ Wuleshe wo ichu umu nyi meta (4:5) na o kawi nawudo.

²⁷ Njofano tso tsiwei mbaṟimbaṟi, tsitambaṟuye makungo; ikungo limu likakoya omombo lumu, na ikungo lingi omombo lo kawi, halya hengi hakakoyana makidi hawi ha kiṟiha.

²⁸ Njofano tso tsa makerubi katsichopo na sahabu.

²⁹ Njomombo tsa orio kiṟiha katsichopa wopacha mṟeho ya shiumbe shiwode makungo, makangachi na maṟeho ha shiwaṟo shiwaṟie.

³⁰ Kashia sahabu shiṟiha sha kyamba na sha kyanja.

³¹ Kundu naidime iida na kiṟihenyi kya kiidi, nalesungusia mongo ko mbau tsa msinefu shiwangowango na shieko sha mongo njora tsitanu.

³² Kiidi kya mongo yo iwi ya mashidi ha msinefu, kawika mṟeho fo shiumbe shiwode makungo, makangachi na shiwaṟo shiwaṟie, kachopa mṟeho yo ko sahabu.

³³ Na wudo kawesungusia mongo foida na kiṟihenyi kya kuwoka. Shiwangowango sha mongo shiwei sha mashidi ha msinefu.

³⁴ Kukawada se mongo iwi ya msedi; mongo yeshinga na iṟuhuo mongo fumu fuidime iṟuhuo kawi.

³⁵ Kachopa mongo yo kui ofano lo ṟeha makerubi, na makangachi na shiwaṟo shiwaṟa, kaichopa necha mṟehoyo ko sahabu.

³⁶ Kyasia, kasungusia kiṟiha kimu kyamba, osehu lo hekalu, kikiṟingichie nyi njomombo tsitsihekie mriti ya mashidi ha meresi orio mbanga tsiṟaṟu tsa maho hetsana.

³⁷ Kyasia, meri fo kawi meri fo Zifu maka fo kana, otende lo mba lukamarisika.

³⁸ Maka fo ikumi na limu meri folaho Buli, meri fo nyanya, iṟunda lyewika mba likamarisika. Iṟunda li lileduo maka mfungade (7).