1WAMANGI 5 - Bibilia Kui Mdedie fo Kimochi

Solomoni akuṟeheṟa iwika Hekalu

¹ Nalyo Hiramu Mangi o Tiro awei mbuya ya Dawidi, kaicho ke Solomoni naleshimbuyo nawe Mangi handu ha ndeye, kaduma waṟundi koke.

² Solomoni kadika ndumi ko Hiramu kechihamba,

³ “Noichi ke ndeako Dawidi aleidima iwika mba ya Ruwapfo; Kipfa nalekoyana na shiwira tsifoi na shida tsifoi kipfa kya wakituwa wa njoruka tsa mṟasenyi mṟasa Ruwa kamtarama kawinza.

⁴ Kyaindi wulalu Mndumii-Ruwa, Ruwa oko amenjinenga ofoṟo njora tsose, njiwode-se mkituwa ma wukiwapfo.

⁵ Wulalu njikundi iwika mba kui rina lya Mndumii-Ruwa oko, na iki nyi lohi piu kipfa na wudo Mndumii-Ruwa alewia wande kechihamba, ‘Mana opfo ichu echidamia loṟikehu lo wuitoṟi, nyio echinjiwikia mba.

⁶ Wulalu wawasa wandu wapfo wamanye mashidi ha ipfo Lebanoni. Wandu wako wechikusanza na wandu wapfo kiidi kya iṟunda li, na inyi njechiwataa chando iyo ochinjiwia, kipfa noichi ke kuwode wandu kunu koko wawode wuaria wo manya mashidi chanyo Wasidoni-pfo.’”

⁷ Hiramu kachihiyo mnu lilya aleambia ndumi ya Solomoni kahamba, “Mndumii-Ruwa naṟumisho kiheri ki, kipfa aleinenga Dawidi mana awode wulaanyi na wuṟango wochilia mkambo fung'anyi fudi.”

⁸ Kyasia Hiramu kadika ndumi ko Solomoni kehamba, “Ngaambia ndumi yapfo na njechiwuta chandu ukundi kya mashidi ho ha meresi na miberoshi.

⁹ Wandu wako wechiinga matuṟuma wahawute Lebanoni mṟasa ipalyipalyinyi, wahapfunge mhanda kui mhanda hache huya mṟinga kipfa hechiidima isoṟowiapfo mṟasa handu halya ochinjiwia. Hakameshika pfo hechipfunguyo, na iyo uhaambilie. Ko ora lopfo iyo nochinnenga kando kipfa kya wandu wa kanyi koko.”

¹⁰ Kyasia, Hiramu kainenga Solomoni mashidi ha meresi na miboroshi chandu awekundi,

¹¹ na Mangi Solomoni kainenga Hiramu Ngano madewe shiku mahana hawi na makumi hana (240,000), na mafuda mecha madewe mahana hawi (200), orio maka kipfa kya wandu wake.

¹² Mndumii-Ruwa kainenga Solomoni wulaanyi na wuṟango chando alembikia kyasa. Kukawada ofoṟo kiidi kya Hiramu na Solomoni; wakawikiana mkundana wa wawi.

¹³ Mangi Solomoni kasanyia wandu shiku makumi haṟaṟu (30,000) wawode pfinya yeṟunda iṟunda liwanzi.

¹⁴ Kawaduma Lebanoni kui meri kawahawa ngamba tsiṟaṟu, orio kamba wandu shiku ikumi (10,000). Meri fumu wakae Lebanoni, na meri iwi kowo. Adonramu nawe mnene owo.

¹⁵ Solomoni nawewode wandu weduo mhanda shiku makumi mfungade (70,000) wepaṟa maho, shiku makumi nyanya (80,000).

¹⁶ Kukawewada-se-pfo wengi wawei huya maṟunda, shiku shiṟaṟu na mahana haṟaṟu (3,300) iwa wehoṟokia maṟunda necha.

¹⁷ Mangi kawawasa wandu wakasuma maho hang'anyi ha wuhuru, kundu hatsano, hewika otende lo hekalu.

¹⁸ Kyasia nyi kudo waaria wewika mba ya Solomoni na Hiramu na wandu wa mṟi fo Gabeli waleṟeheṟa maho na mbau tsewika mba.