1WAMANGI 4 - Bibilia Kui Mdedie fo Kimochi

Wanjama wa Solomoni

¹ Solomoni kawa Mangi o oruka lo Israeli,

² na iwa nyi wandu wawei wasongoru wanda yake. Azaria mana o Sadoki mkohanyi,

³ Elihorefu na Ahiya, wana wa Shausha wawei waṟehi; Yehoshafati mana o Ahihudi nawei mowika ngumbuo kipfa nawekeṟehia orio kindo kyawutika;

⁴ na Benaya mana o Yehoyada nawei mohoṟokia wandu wa shida; na Sadoki na Abiathari wawei wakohanyi;

⁵ na Azaria mana o Nathani nawei mchili mnene o huye; na Zabudi mana o Nathari nawei mkohanyi mbuya ya Mangi.

⁶ Ahishari nawei moambuya mba ya Mangi na Adoniramu kawa mohoṟokia weṟunda maṟunda malemeri.

⁷ Solomoni nawewode wachili ikumi na wawi kiidi kya Israeli yose, iṟunda lyawo nyi iende kando ko Mangi na wandu wa mba yake; orio umu nawewode meri fumu foende kando.

⁸ Na iha nyi marina hawo: Ben-huri nalehoṟokia kipaṟo kya fumvunyi lya Efraimu.

⁹ Ben-dekeri nalehoṟokia mṟi fo Makasi, na Shaalbimu Bethshemeshi na Elon-Beth-hanani.

¹⁰ Ben-Hesedi nalehoṟokia mṟi fo Arubothi, na tumo yafo na oruka lose lo Heferi.

¹¹ Ben-Abinadabu mii o Tafathi, Tafathi mana o waka o Solomoni nalehoṟokia oruka lose lo Nafathi-dori.

¹² Baana mana o Ahihudi, nalehoṟokia mṟi ya Taanaki, Megido na ora lose lo Beth-sheane ii kufui na mṟi fo Zarethi, ora lo nuka lo mṟi fo Jezreeli, na kuwuka Beth-sheani mṟasa mṟi ya Abel - mehola, na ielewetsa mṟi fo Yokmeamu.

¹³ Ben-geberi, nalehoṟokia mṟi fo Ramoth-gileadi handu hamu na shihongo sha Gileadi sa shiwei wanda ya wuchili wo Yairi, mana o Manase, kawehoṟokiase oruka lo Argobu fukeri Bashari; yose handu hamu iwei mṟi ing'anyi (60) iwenjiṟingichie omombo na iwiko ndingo tsa aṟeṟa mongonyi.

¹⁴ Ahinadabu, mana o Ido, kahoṟokia kihongo kya Mahanaimu.

¹⁵ Ahimaasi, mii o Besemathi, mana o waka o Solomoni, kahoṟokia ora lo Naftali.

¹⁶ Baana mana o Hushai, kahoṟokia ora lo Asheri Beathothi.

¹⁷ Yehoshafathi mana o Parua, kahoṟokia ora lo Isakari.

¹⁸ Shimei, mana o Ela, kahoṟokia ora lo Benyamini.

¹⁹ Geberi mana o Uri, kahoṟokia ora lo Gileadi, ili kuwoka iweinjiwade nyi Sihoni Mangi o Waamori, na Ogu Mangi ya Bashani. Koda iwa ikumi na wawi, kuwewode mnene umu alehoṟokia oruka lose lo Yuda.

Wuchili wo Solomoni woirimira

²⁰ Kyasia, wandu wa Yuda na Israeli wawefoi cha msanga fo mṟingenyi, wakalya, wakanyo, wakachihiyo.

²¹ Wumangi wo Solomoni wukawokia meda fo Eufrate mṟasa oruka lo Wafilisti, kashika mṟasenyi na Misri. Wandu wose wakaṟundia Mangi, wakataa okamba kiheri kyose kya moo foke.

²² Kelya sa Solomoni awekundi ko mfiri fumu, kiwei madewe mahana haṟaṟu na makumi haṟandaṟu (360) ha mso mmamiri, na madewe mahana mfungade na makumi hawi (720) ha mso tupu.

²³ Mmbe nnoru ikumi (10) na mmbe tselisa makumi hawi (20), machondi ihana (100) handu hamu na sariha, sumbuda, mburu tsa nja na nguku njinoru.

²⁴ Ee naweitoṟie oruka lose lo meda Eufrarte kya ora lo kyukanyi wokia Tifsa mṟasa mṟi fo Gaza, iwei kiidi kya wumangi woke, kawekuwadia ofoṟo na njoruka tsa mṟasenyi.

²⁵ Kiheri kyose kya wuitoṟi woke, wandu wose wa Yuda na wa Israeli wawei kipuo, orio mndu kakaa kanyi koke wanda ya mashidi mecha na madema hake ha msabibu.

²⁶ Solomoni nawewikie matengo shiku makumi hana (40,000) kipfa kya frasi tsekuruo magari hake, na waskari wewikia mteṟa na frasi shiku ikumi na shiwi (12,000).

²⁷ Wandu walya wake ikumi na wawi (12) orio umu alehawio meri foke, kaweduo kando kashike kipfa kya Mangi na walya wa kanyi koke. Orio umu kawona kimshikie.

²⁸ Kamba lya orio mndu kiheri lileshika, kaweduo shayiri na maṟa ha frasi na shuma shilya shewikia mteeṟa.

²⁹ Ruwa kainenga Solomoni wulaanyi na wuṟango wukaingiki; wuṟango woke wukaingika cha msanga fo wambaṟa ya ipalyipalyi fulawode kiheo.

³⁰ Wulaanyi wo Solomoni wuweidie wulaanyi wo wana wose wa ora lo ngamenyi, na wo Misri.

³¹ Naweidie wandu wose kui wulaanyi; kaweidia Ethayi, Mwezrahi, Hermani, na Kalkoli na Darda, wana wa Maholi na kiṟumi kyake kikadungana kiidi kya mkambo na mṟasenyi.

³² Kaṟehia mfanano, shiku shiṟaṟu (3,000) na shiimbo shake kiku kimu na shitanu (1,005).

³³ Kadeda mbonyi tsa mashidi wokia mashidi ha Lebanoni, mṟasa husopo, (hai cha maolo ha mararii hekedo omombonyi, kawadeda mbonyi tsa mando ha ngeṟenyi na ndehe, na mando hawode samu yekechelela na iwika mapoṟe, na kya makunga.

³⁴ Wandu wose waleicho mbonyi tsake tsa wulaanyi na wuṟango woke na wamangi wengi wafoi wakacha imwadanyia.