1WAMANGI 3 - Bibilia Kui Mdedie fo Kimochi

Solomoni aterewa wulaanyi

¹ Solomoni kawada kishari na Farao Mangi ya Misri, kaalika mana o Farao, kamwende itane mṟinyi fo Dawidi, kamarisa iwika mba yake, na mba ya Mndumii-Ruwa. Kawewika na omombo lotengetia Yerusalemu.

² Mandi ho wandu wawekeshinja kidaso na ikiwika handu ha huye kipfa kulawewode mba injiwike kwi rina lya Mndumii maheriho.

³ Solomoni kakunda Mndumii, kaweosha njotende tsa ndee Dawidi, kawewuta shichihiṟie Ruwa, kyaindi kawewika kidaso handu hakuirie, kawepfamiṟa handu hakuirie.

⁴ Kyasia Mangi kahenda Gibeoni kundu nahende idasa, kipfa nyipfo kuwei kunene. Solomoni kawuta mwano foke fushikie shiku shemaya modonyi.

⁵ Mndumii kachea Solomoni ipfo Gibeoni ndodonyi kio, kambia, “Terewa kindo ukundi njikuneenge.”

⁶ Solomoni kahamba, “Nolewutia isinga lyapfo wande Dawidi osaṟio lung'anyi, chando alekuosha kiidi kya wulohi na wahendeli wose, kui mrima foke fuwei na iyo; kui isaṟia lyapfo komnenga modamia loṟikehu loke lo wuitoṟi chandu kikeri inu.

⁷ Na wulalu hoi Mndumii-Ruwa oko, omenjishimbuo njiwe Mangi handu ha ndeako Dawidi, na inyi njii mana mtutu mnu njilaichi chandu kinjiwaṟi iwuka na iida kiidi kya mkambofu.

⁸ Ambuya, na inyi kisinga kyapfo njii kiidi kya wandu wafoi walechiwa italo ma imanyika washikie itala lida, kipfa nyi wafoi.

⁹ Ko ikyo ngakuterewa unjinenge inyi kisinga kyapfo mrima fo wuidiki na wuṟango wo manya mecha na mawicho njiweidima ianduo na idumbuo chila kiidi kya wandu, kipfa nyiu echiidima isongoya na ianduo kiidi kya wandu, wafoi wadi?”

¹⁰ Idedo li likachihiṟa Mndumii, kipfa Solomoni aleliterewa.

¹¹ Ruwa kambia, “Kipfa oterewa idedo li ma ulakunde moo mleshe, na wusuṟi kipfa kyapfo, ma masaa, ma iwuta moo ya wakituwa wapfo, indi kolanga wuṟango na wulaanyi wohoṟokia wandu;

¹² ambuya njechiwuta chandu oterewa; ngakuinenga mrima fo wuṟango na wulaanyi wulalemewono ko walya wawesonguo na walya wechikuosha wechikukoyapfo.

¹³ Na shilya ulaterewa ngakuinenga, masaa, na wuitoṟi kulawode mofanana na iyo mfiri yose ya moo fopfo.

¹⁴ Komeindia mawawaso hako na injiindia chandu ndeo Dawidi alewuta, njechiengeṟa maka yapfo ifoi.”

¹⁵ Naho Solomoni kakure, ate nyi ndodo. Kahenda Yerusalemu, kahoṟoka sumuhana na isanduku lya mkundana lya Mndumii; kawika kidaso kemaya modonyi, na mwano ya ofoṟo; kasungusia waṟundi wake mfuho.

Solomoni adumbuo mondu fuumu

¹⁶ Nalyo waka wawi wameluki, wakacha na ko Mangi wakahoṟoka oshangunyi loke.

¹⁷ Mka umu kahamba, “Hoi mndumii oko inyi na mka chu lokekaa mmmbenyi imu, inyi njileinengo mana kimu nao.

¹⁸ Komeidaho mfiṟi iṟaṟu ngameinengo mana, nao kaweinengo mana lui kimu mmbenyi imu; kuwewode ungipfo, naso wawi tupu.

¹⁹ Kio mana o mka chu kapfa kipfa nalempfumba na wee.

²⁰ Kakure makidi hawi ha kio, kaonduo mana oko akuleeye mbai yako kiheri inyi njiwesie madonyi, kaende ulya oke ampfu kammbika mbarinyi koko.

²¹ Njekikure ngamenyi njionze mana ate nampfu. Njimṟisaṟisa ngakoya chi mana ulya oko pfo.”

²² Nalyo mka ulya o kawi kahamba, “Chi wudo pfo, mana chu ai na moo nyi oko na icho apfiie nyi opfo. Odoe kahamba chi wudopfo mana ai na moo nyi oko na apfie nyi opfo.” Nyi wudo walededa oshangunyi, lo Mangi.

²³ Nalyo Mangi kahamba, “Ichu nahamba mana ai na moo nyi oko na opfo napfie; na ichu nahamba ote mana ai na moo nyi oko na opfo napfie.”

²⁴ Mangi kahamba “Njiendienyi oshu, wakaendie mangi oshu.

²⁵ Mangi kahamba paṟenyi mana chu ai na moo muinenge orio umu opaṟo lo mana.”

²⁶ Nalyo ulya mana oke ai na moo kawia Mangi kipfa nalewawio nyi moo, “Hoi Mndumii oko, mnenge mana cho ai na moo ma kulambahe.” Kyaindi ulya ungi kahamba, “Nalawe opfo ma oko; napaṟo.”

²⁷ Nalyo Mangi kahaluo kahamba, “Inenga ichu o kuwoka mana cho ai na moo, kipfa nyio mae.”

²⁸ Waisraeli wose wekiicho mbonyi i na chandu aledumbuo mondufu, wakaowuo Mangi; kipfa walewona ke wuṟango wo Ruwa wuwei kiidi kyake kundu naanduye wandu.