1WAMANGI 22 - Bibilia Kui Mdedie fo Kimochi

Mwikimbi, Mikaya awawasa Ahabu

¹ Wakakukaya maka iṟaṟu kulawode shida kiidi kya Shamu na Israeli.

² Maka fo kaṟaṟu fo Yehoshafati Mangi o Yuda, kasoka ihenda sahia Mangi o Israeli.

³ Mangi o Israeli kawia waṟundi wake, “Ngesa muichi ke Ramoth-Gileadi nyi yadu? Naso lutsie sau lulaiduo iwuka owokonyi lo Mangi o Shamu?”

⁴ Kawia Yehoshafati, “Ngesa ochihenda na inyi lukape Ramoth-Gileadi?” Yehoshafati kawia Mangi o Israeli, “Inyi nyi kimu na iyo wandu wako ni cha wandu wapfo, frasi tsako nyi cha frasi tsapfo.”

⁵ Yehoshafati kawia Mangi o Israeli, “Ngakuterewa wesa idedo ko Mndumii kuwoka lulamehenda shidenyi.”

⁶ Naalyo Mangi o Israeli kasanyia handu hamu waikimbi cha wandu mahana hana 400. Kawawesa, “Ngesa njihende Ramoth-Gileadi njikapane shida ang'u njide?” Wakambia, “Do kipfa Mndumii nawikie Ramoth-Gileadi owokonyi lo Mangi.”

⁷ Kyaindi, Yehoshafati kahamba, “Ngesa iya kuwode se-ho mwikimbi o Mndumii, kundu lumbese o?”

⁸ Mangi o Israeli kawia Yehoshafati, “Kuwode mndu umu luwechiidima iwesa ko Mndumii kui dumbu lyake, elaho Mikaya mana o Imla, indi njimsuo kipfa ekenjiikimbia mecha-pfo. Shile mawicho tupu.” Yehoshafati kambia, “Ote Mangi nalehamba adi,

⁹ Naalyo Mangi o Israeli, kalaha mchili kambia, ‘Henda tapa noende Mikaya mana o Imla.’”

¹⁰ Kyasia, Mangi o Israeli na Yehoshafati Mangi o Yuda wawekedamia orio mndu loṟikenyi loke lo wuitoṟi waṟee maṟao hawo ha wumangi, wai kichuminyi kya Samaria, na waikimbi wose wakawuta wuikimbi oshangunyi lowo.

¹¹ Na Zedekia mana o Kenaana katsana membe tsa menya kahamba, “Mndumii nahamba adi, ‘Nochitsindika natso Washami, mṟasa wanyamaṟike.’”

¹² Na waikimbi wose wakahamba kudo kui wuikimbi, wechihamba, “Do na Ramothi-Gileadi, kipfa Mndumii nawawikie owokonyi lo Mangi.”

¹³ Na ulya alehenda ilaha Mikaya, kambia, “Ambuya wulalu, madedo ha waikimbi kui dumbu limu, mhambie fumu wawia Mangi madedo mecha, idedo lyapfo ngakuterewa, liwe cha limu lya waikimbi wo, udede mecha.”

¹⁴ Mikaya kahaluo, “So Ruwa ai na moo, idedo lilya Mndumii echinjiwia, nalyo njechihamba.”

¹⁵ Kiheri alecha ko Mangi, Mangi kambesa, “Ngesa Mikaya, luhende Romathi-Gileadi ikapana shida ang'u lude?” Kamhaluo “Do, uiṟimiṟe kipfa Mndumii naluwikie owokonyi lo Mangi.”

¹⁶ Mangi kambesa, “Njikulisiṟe nyamu kenga ulahambe idedo shile lii lya lohi kui rina lya Mndumii?”

¹⁷ Kahamba, “Njilewona Waisraeli wose waṟahanyikie mafumvuhu cha machondi halawode mlisi.” Mndumii kahamba, “Iwa wawode menyipfo, na wawuye orio umu kanyi koke ko ofoṟo.”

¹⁸ Mangi o Israeli kawia Yehoshafati, “Ngesa ngakuwia ke ekenjiikimba mecha-pfo shile mawicho tupu?”

¹⁹ Mikaya kahamba, “Ichong'u idedo lya Mndumii, ndewona Mndumii adamie loṟikehu loke lo wuitoṟi na mamiingi fo ruwehu wahoṟoki ora loke lo kulyo na kumoso.

²⁰ Mndumii kahamba, ‘Nyiu echilemba Ahabu, kundu nado na Ramothi-Gileadi naoloke?’ Ichu kahamba wulyiwe na ichu wulyiwe.

²¹ Kukacha mumuyo kahoṟoka oshangunyi lo Mndumii kahamba, ‘Inyi njechimlemba.’

²² Mndumii kambia, ‘Kuda?’” Kahamba, “Njechikure njiwe mumuyo o wongo dumbunyi lya waikimbi wake wose kahamba, ‘Nochimlemba, na iwinga, kure uwute kudo.’

²³ Kyasia, ambuya Mndumii nawika mumuyo fo wongo, dumbunyi lya waikimbi wa wapfo wose, nao Mndumii nadeda mawicho hakuchee huyapfo.”

²⁴ Naalyo Zedekia, mana o Kenaana, kakapa Mikaya okofi lo manda, kambesa, “Mumuyo o Mndumii nawuka ada koko kudi nadede na iyo?”

²⁵ Mikaya kahamba, “Ambuya nochiwona mkonu fulya ochiida na kiṟihenyi kya kya mba kundu noowe.”

²⁶ Mangi o Israeli kahamba, “Duonyi Mikaya mumbihiṟe ko Amoni mnene o mṟi na ko Yoashi mana o Mangi;

²⁷ muhambe, Mangi nahamba adi, ‘Wikenyi mndu-chu mmbenyi ya wapfungo, nainengo kelya kya wukiwa, na mṟinga fo wukiwa, mṟasa njiwuye ko ofoṟo.’”

²⁸ Mikaya kahamba, “Kokoya ochiwuya na ofoṟo Mndumii adeda na inyi-pfo, kahamba, ‘Adanyienyi nyo wandu wose.’”

Opfu lo Ahabu

²⁹ Nahong'u Mangi o Israeli na Yehoshafati Mangi o Yuda wakado mṟasa Ramoth-Galeadi.

³⁰ Mangi o Israeli kawia Yehoshafati, “Njikualacha njihende shidenyi, kyaindi iyo urae maṟao hapfo.” Mangi o Israeli kakualacha kaanga shidenyi.

³¹ Mangi o Shamu nawewawasie wanene wa magari hake makumi haṟaṟu na hawi 32 kechihamba, “Mlakapane na mtutu ma ang'anyi shile Mangi o Israeli amonyi.”

³² Kiheri wanene wa magari wawona Yehoshafati, wakahamba, “Icho nyi Mangi o Israeli.” Wakahaluka wakapane nao, nao Yehoshafati kafahia-ke, “Chi inyi pfo.”

³³ Kiheri wanene wa magari wechiwona ke chio Mangi o Israeli-pfo, wakahalukia nduma walamwoshe.

³⁴ Mndu umu kakuruo uda kamṟunga, kakapa Mangi o Israeli mfi fukaida handu helungia shipfungo sha menya, kawia ulya moduo igari lyake, “Halutsa owoko lopfo nonjiduo unjiwute iya shidenyi kipfa ngafaṟo mnu.”

³⁵ Ngapano ikawa njiwawo mkonu fulya, Mangi kawanzio igarinyi lyake, kiṟunduma kya Washami, kishika kiukanyi kapfa, na samu ifoi ikasoka alya kitaṟenyi ikasokia igarinyi.

³⁶ Kukakapo iranda kiidi kya mamiingi fo ngapano, mnengeṟi fukundi iolokia, lyehamba, “Orio mndu nahende mṟinyi koke, na orio mndu demenyi koke.”

³⁷ Nyi wudong'u Mangi kapfa, kadao Samaria wakaṟika Mangi ipfo Samaria.

³⁸ Wakasanjia igari kufui na nduwa ya Samaria, na shite shikakomba samu yake, (hondo wameluki wekesambia), kirianyi na idedo lya Mndumii alelideda.

³⁹ Na mbonyi tsose tsa Ahabu tsiletsuhaa na shose aleshiwuta, na mba ya membe alewika, na mṟi yose aleiwika, ngesa shileṟehiyo kiidi kya kitapu kya maheri ha wamangi wa Israeli?

⁴⁰ Kyasia Ahabu kapfa, na Ahazi mana oke kaitoṟia handu hake.

Yehoshafati mangi o Yuda

⁴¹ Yehoshafati mana o Asa nalewoka iitoṟia huya Yuda kiidi kya maka fo kana fo wuitoṟi wo Ahabu Mangi o Israeli.

⁴² Yehoshafati nawei mndu amaiye maka makumi haṟaṟu na itanu 35 nalyo alewoka iwada wumangi, kaitoṟia maka makumi hawi na itanu 25 ipfo Yerusalemu. Na rina lya mae nyi awekelaho Azuba mana o waka o Shilhi.

⁴³ Kaosha ohendo lo ndee Asa, ma aleing'uṟu pfo, kawuta shichihianyi na Mndumii. Kyaindi handu ha huye halepaayopfo, wandu wakawewuta shidaso shemaya modoni na ipfaamiṟa uvumba handu ha huye.

⁴⁴ Yehoshafati kashiha ofoṟo na Mangi o Israeli.

⁴⁵ Na mbonyi tsose tsa Yehoshafati tsiletsuhaa, na wuwinzi alewuloṟa na chandu alekapana na shida, ngesa shileṟehiyo kiidi kya kitapu kya Maheri kya wamangi wa Yuda.

⁴⁶ Ngoseṟa, matsenge haletsuhaa, Maheri ha Asa wandie, kawawuta orukenyi.

⁴⁷ Ma kuwewode Mangi kiidi kya Edomu pfo, mtarami nyio awei Mangi Yehoshafati kasungusia merikebu tsa Tarshishi tsihende Ofiri iende sahabu, kyaindi tsilehenda pfo, kipfa merikebu tsilefunjika ipfo Esion Geberi.

⁴⁸ Kyaindi mtarami awemsambuṟe nyi Mangi o Yuda, nyio aweichilia pfo.

⁴⁹ Naalyo Ahazia mana o Ahabu kawia Yehoshafati, “Waṟundi wako wahende na waṟundi wapfo merikebunyi.” Indi Yehoshafati nalakunde.

⁵⁰ Kyasia Yehoshafati kapfa, kaṟiko kimu na wawandie mṟinyi fo Dawidi ndee, na Yehoramu kaitoṟia handu hake.

Ahazia mangi o Israeli

⁵¹ Ahazia mana o Ahabu nalewoka iitoṟia huya Israeli ipfo Samaria kiidi kya maka fo ikumi na mfungade fo Yehoshafati Mangi o Yuda, kaitoṟia maka iwi huya Israeli.

⁵² Kawuta mawicho oshangunyi lo Mndumii, kaosha njia ya ndee na ya mae, na njia ya Yeroboamu mana o Nebati, ichu aledekesha Israeli.

⁵³ Kaṟundia Baali, kamwindia, kapfulutsa Mndumii-Ruwa o Israeli nyashi, kui ofano lo mbonyi tsose tsilewuto nyi ndee.