1WAMANGI 21 - Bibilia Kui Mdedie fo Kimochi

Mbonyi tsa kihamba kya Nabothi

¹ Kikashika nduma ya isho, Nabothi Myezereeli nawewode Mdemi foke fo msabibu kiidi kya Yezreeli, kufui na mba ya wumangi ya Mangi Ahabu o Samaria.

² Ahabu kadeda na Nabothi kambia, “Njiinenga dema lyo lyapfo lya msabibu njilyihaluo lya mboha, kipfa lii kufui na mba yako, na inyi njechikuinenga dema lingi lya msabibu licha ngoseṟa, ang'u kokunda njikunenge fesa tsihianyi na wuhuru wo dema lyo.”

³ Nabothi kawia Ahabu, “Ruwa naitse kuleshe, inyi njikuinenge kyoṟa kya wandee wako ote kechiwapfo.”

⁴ Kyasia Ahabu kahenda kanyi koke, ai na mrima mlemeri, aichuo nyashi, kipfa kya idedo lilya Nabothi Myezreli alemmbia ke “Njechikuinenga kyoṟa kya wandee wako pfo.” Kalaa kitaṟenyi kyake kahalutsa kyaamu kyake kaleha ilya.

⁵ Kyaindi, Yezebeli mka oke kamhendia kambesa, “Kitewe nyi ki mrima fopfo fusokio nyi fowa, ulakunde manya ilya?”

⁶ Kamhaluo, “Kipfa ngadeda na Nabothi Myezreeli, ngambia, ‘Unjinenge dema lyapfo lya msabibu kui fesa ang'u kokunda, njikunenge dema lyingi lya msabibu handu ha ilyo kyaindi o kaleha,’ kanjiwia, ‘Njechikuinenga idema li lyako la msabibu pfo.’”

⁷ Yezebeli mka oke kambia, “Wulalu iyo noitoṟie wamangi wa Israeli? Kure nolye kelya, mrima fopfo fuchihiyo, inyi njechikuinenga dema lya msabibu lya Nabothi Myezreeli.”

⁸ Kyasia, mka ulya Yezebeli kaṟehia paruo ko rina lya Ahabu, katsiwikia mhuri yake, kaduma paruo tsilya ko wameku na ko wandu wawode pfinya wawei kiidi kya mṟi foke wawei kufui na Nabothi.

⁹ Naleṟehia paruo tsilya kahamba, “Kapenyi iranda wandu wakuotoe, muwike Nabothi oshangunyi lo wandu,

¹⁰ Muambuye wandu wawi wai masembo kundu wamdedie kyama na iṟingishia kya wongo ke nuleruma Ruwa na Mangi, kiidima mumduo nja, mumkape na maho kundu napfe.”

¹¹ Wandu walya wameku na walya wawode pfinya kulya mṟinyi foke wakawuta chandu Yezebeli alewawia, chandu kiwei kiṟehie kiidi kya paruo tsilya alewadikia.

¹² Wakakapa iranda wandu wakuotoe, wakawika Nabothi oshangunyi lo wandu.

¹³ Na wandu wo wawi wai masembo, wakaida na mba wakadamia oshangunyi loke. Masembo halya hakaṟingishia Nabothi oshangunyi lo wandu, hakahamba, “Nabothi naleruma Ruwa na Mangi.” Naalyo wakamduo nja ya mṟi wakamkapa na maho itane apfa.

¹⁴ Wakadaya Yezebeli mbonyi wehamba, “Nabothi nakapo ko maho nao amepfa.”

¹⁵ Yezebeli kekiicho ke Nabothi nakapo na maho nao ampfa, Yezebeli kawia Ahabu, “Kure nohende iwada dema lilya lya msabibu lya Nabothi Myezreeli, aleleha ikuinenga kui fesa, kipfa Nabothi ai na moo sepfo, napfie.”

¹⁶ Ahabu kekiicho ke Nabothi napfie, kakure, nasoke nahende iwada idema lilya lya msabibu lya Nabothi Myezeeli, liwe kyoṟa kyake.

Mwikimbi Elia adedia Ahabu

¹⁷ Idedo lya Mndumii likachea Elia Mtishbi, lyehamba,

¹⁸ “Kure nosoke, okoyane na Ahabu Mangi o Israeli, ekekaa Samaria. Nakeri demenyi lya msabibu lya Nabothi, nasokie napfo naliwade.”

¹⁹ Ummbie kochihamba, “Mndumii nahamba adi, ‘Ngesa nolewaha kundu uoṟe?’” Na iyo nochimbia kudi: “Mndumii nahamba adi, ‘Handu halya shite shilekombia samu ya Nabothi, shite shechikomba samu yapfo.’”

²⁰ Ahabu, kawia Elia, “Ngesa nonjiwadase, iyo mkituwa oko?” Kambia, “Ngakuwada kipfa nolekuhaluo mbucha kundu uwute mawicho oshangunyi lo Mndumii.

²¹ Ambuya njechiende mawicho huye yapfo, na inyi njekurumatsa piu, njechiwaha orio msoṟo o Ahabu, wokia mpfungo na alampfunge o Israeli.

²² Kiidima, njihaluo mba yapfo cha mba ya Yeroboamu mana o Nebati, cha mba ya Baashi mana o Ahiya, kipfa kya wuwicho wopfo ulenjisuiṟa nalyo mṟasa konjidosa nyashi, kodetsa Waisraeli.

²³ Ngoseṟa Mndumii nalededa mbonyi tsa Yezebeli kehamba, “Shite shechimlya kiidi kya kiwanja kya Yezreeli.

²⁴ Mndu o mba ya Ahabu apfia mṟinyi, shite shechimlya na icho mopfia demenyi ndehe tsa ruwehu tsechimlya.”

²⁵ Kyaindi kuwode mndu cha Ahabu, alekukumba nawute mawicho oshangunyi lo Mndumii aitiko nyi mka oke Yezebeli pfo.

²⁶ Kawichuṟa mnu, kaindia sanamu kui mbuka tsa Waamori walya Mndumii alewafuna oshangunyi lo wana wa Israeli).

²⁷ Ahabu kekiicho madedo ho, karanduo nguo tsake, kaṟaa makunyia mbihunyi foke kakuotoya, kapfa makunyienyi kahenda sa kyomboho.

²⁸ Idedo lya Mndumii likachea Elia Mtsishbi, lyehamba,

²⁹ “Uwonyi chandu Ahabu akunyiiṟa oshangunyi loko? Kipfa akunyiiṟa adi, njechiende mawicho halya mbeteseheṟie kiheri kyake pfo, indi nyi kiidi kya mana oke njechiende mawicho halya hose kiidi kya mba yake.”