1WAMANGI 20 - Bibilia Kui Mdedie fo Kimochi

Shida kiidi kya Ashuru na Israeli

¹ Ben-Hadadi Mangi o Ashuru kasanyia wandu wa mbahanyi wose, kataramo nyi waangi wengi makumi haṟaṟu na hawi 32 hamu na frasi na magari hekuruo. Kahendia mṟi fo Samaria kafutengetia kafukapa.

² Kiidima, kaduma ndumi mṟinyi fo Mangi Ahabu Mangi o Israeli kambia, “Mangi Ben-Hadadi nahamba adi,

³ Fesa na sahabu yapfo yose nyi yako, waka wapfo wecha na wana wapfo, nyi wako.”

⁴ Mangi o Israeli kahaluo, “Mndumii oko Mangi, chandu ohamba na kikicha inyi nyi opfo, na shose njiwode na shapfo.”

⁵ Nduma wandu walya wakawuya se na ko Ahabu, wakambia, “Mangi Ben-Hadadi nahamba adi, ‘Njilekudumia ndumi unjiinenge sahabu, fesa, waka wapfo kimu na wana wapfo.

⁶ Wulalu, ngama kiheri cha iki, njechiduma waṟundi wako wache isoṟasoṟa mba yapfo ya wumangi na mba tsa waṟundi wapfo, waduo orio kindo kiwode kiira.’”

⁷ Naalyo Ahabu Mangi o Israeli alelaha wasongoru wose wa oruka, kawawia, “Wulalu, lanye ambuyenyi chandu mndu chu akundi ilulisa wukiwa! Nadika ndumi ke nakundi waka wako, wana wako, sahabu na fesa tsako. Inyi njilemlehiapfo!”

⁸ Wameku na wandu wose wakambia, “Ulasaṟe ma kulaidikie.”

⁹ Kyasia Ahabu kawia wandu walya wa Ben-Hadadi, “Wienyi kudi mndumii oko Mangi, ‘Shilya alenjiwia ili mbooko njechishiinutsia, kyaindi ishi sha kawi ngaidikiana nao ma ntapfo.’” Walya wadume wakahenda wakashitsia Mangi Ben-Hadadi mbonyi.

¹⁰ Ben-Hadadi kadikia Ahabu ndumi ii, “Maruwa hako hanjiwaahie kuleshe, ngakulia nyamu, kokoya ipfo Samaria kochitsuhaa pfo kiluli nnde imu, ko orio owayo lo wandu wako chando wafoi.”

¹¹ Mangi Ahabu o Israeli kahaluo, “Wienyi Mangi Ben-Hadadi ke mndu o shida ngohoda nekekushela shida ikamesia, chi shida ilemekapa pfo.”

¹² Ben-Hadadi naleambia ndumi ya Ahabu kiheri awedamie ihemenyi kechinyo na inango hamu na wamangi walya wengi wemtarama. Koikyo kateseheṟa wandu wa mbahanyi kiwedionyi kundu wakape mṟi.

¹³ Kiheri naakyo, mwikimbi umu kahendia Ahabu Mangi o Israeli kambia, “Mndumii-Ruwa nahamba adi, ‘Uwonyi mfoeṟa fo wanduwa wa mbahanyi? Inu kudi njechiwawika mawokonyi hapfo, nalyo ochimanya ke inyi nyi Mndumii-Ruwa.’”

¹⁴ Na Ahabu kawesa, “Naacho monjitarama?” Mwikimbi kahamba, “Mndumii-Ruwa nahamba adi; ‘Nochitaramo nyi wanake wo weṟundia ichekeṟo lyi wanda ya wanene wa kidembo king'anyi.’ Mangi kawesa, ‘Naacho echiwoka ngapano?’ Mwikimbi kamhaluo, ‘Nyi iyo?’”

¹⁵ Kyasia, Mangi Ahabu kaambuya wanake waṟundi ichekeṟo lya kidembo king'anyi itala lyawo nyi wandu mahana hawi makumi haṟaṟu na wawi 232. Kiidima, kaambuya ichekeṟo lya Israeli, wandu wa mbahanyi shiku mfungade (7,000).

¹⁶ Kyasia, kiheri kya saa sita mfiri, Ben-Hadadi na wamangi walya wengi wemiikanyia, wai mahemenyi kowo wekinyo na inango, ngapano ikawoka.

¹⁷ Wanake walya weṟundia wanene wa kidembo king'anyi, wakasonguo. Kiheri kyo, Ben-Hadadi nawedumie waskari welaaya, wakamnenga mbonyi ke kuwewode kituṟu kya wandu walecha wawuka Samaria.

¹⁸ Ben-Hadadi kawawia, “Wawadenyi wai na moo. Ma kokoya wacha ko shida ang'u ofoṟo.”

¹⁹ Kyasia, wanake wa mṟinyi na wachili wa shihongo, na mbahanyi nduma yawo.

²⁰ Wakawaha orio mndu umu mndu okoke, Washami wakadicha, na Israeli wakawaosha wechiwakapa, Ben-Hadadi Mangi o Shamu kakia adoye frasinyi, hamu na wengi wawedooye frasinyi.

²¹ Mangi o Israeli kahenda kakapa frasi na magari, kakapa Washami owicho mnu.

²² Mwikimbi ulya kachea Mangi o Israeli kambia, “Henda, nokusaye ukuṟise na uambuye chandu ochiwika, kipfa Mangi o Washamu nakuteseheṟa ikuchea maka fuicha.”

Waaramu wacha ikapana se na wandu wa Israeli

²³ Nohong'u waṟundi wa Mangi o Washamu wakambia, “Ruwa owo nyi Ruwa o mafumvu; nkyo kimarete mulawinga, kyaindi lukapane nawo rendewelenyi lochiwawinga.

²⁴ Uwute kudi, wutaho wamangi, orio umu nawuke handu ai, nowike ho wandu wai ngohoda wa shida handu hawo.

²⁵ Kiidima uitale wandu wa mbahanyi, cha walya waledeka, frasi ko frasi, igari ko igari, naso lochikapana nawo handu ha rendewele, na lochiwawinga ma wakawika kuda.” Kaadanyia madedo hawo kawika ado.

²⁶ Kyasia, maka fuleituma, Ben-Hadadi kaitala Washami, kado mṟasa Afeki kundu. Nakapane na Israeli.

²⁷ Wana wa Israeli nawo wakaitalo wakainengo shelya wakahenda shidenyi; wana wa Israeli wakawawedia wai machekeṟo hawi cha mapoo hawi ha mburu; kyasia Washami wakaichuṟa oruka.

²⁸ Mndu ulya o Ruwa kachea Mangi o Israeli, kambia, “Mndumii nahamba adi; kipfa Washami wahamba, ‘Mndumii nyi Ruwa o mafumvu ma chi Ruwa o rendewelepfo, kyasia njechiwika mamiingi fu fo wandu wafoi wadi owokonyi lopfo nanyo mochimanya ke inyi nyio Mndumii.’”

²⁹ Wakaweda wechiambuyana mfiri mfungade. Kikashika mfiri fo mfungade shida ikawoka, wana wa Israeli wakakapa kiidi kya Washami mkonu fumu wandu shiku ihana (100,000).

³⁰ Walya waletsuhaa wakadicha mṟasa mṟinyi; na omombo lukaolokia wandu weletsuhaa shiku makumi hawi na mfungade (27,000). Ben-Hadadi kadichia mṟinyi, kiṟihenyi kya mba.

³¹ Waṟundi wake wakambia, “Ambuya so luicho ke Wamangi wa mba ya Israeli nyi wamangi wawode isaṟia; hoi luṟae makunyia shitsinyi na shiwoho mdonyi, luhendie Mangi o Israeli. ‘Kofia nechikuda na moo.’”

³² Kyasia, wakakupfunga makunyia shitsinyi na shiwoho mdonyi, wakachea Mangi o Israeli wakahamba, “Isinga lyapfo Ben-Hadadi nahamba, ‘Moo foko fude kulafurumatse.’ Kahamba, ‘Ngesa nai na moo mṟasa wulalu? Ichu nyi mano wama.’”

³³ Wandu walya wakawada mahio hang'anyi kya idedolyo na makusaṟo hang'anyi wakahamba, “Manomayo Ben-Hadadi,” Nao kahamba, “Kyasia hendenyi mumeende.” Naalyo Ben-Hadadi kamchea kamdosia igarinyi.

³⁴ Ben-Hadadi kambia, “Mṟi iya wande oko alesoka ndeo njechiiwihiṟa, na iyo nochikuwikia tumo ipfo Dameski, chandu ndeako aleiwika ipfo Samaria.” Ahabu kahamba, “Inyi njechikuda ko maidikiano ha,” wakaidikiana, kamda.

Mwikimbi asesa Ahabu

³⁵ Kyasia, mndu umu o wana wa waikimbi kawia odoe kui idedo lya Mndumii, “Njikapa, ngakuterewa.” Nalakunde imkapa.

³⁶ Nao kambia, “Kipfa kulaadanyia ṟu lya Mndumii, ambuya, ili ochiwuka koko mwiso fochikuwaha.” Kudi kechiwuka koke, mwiso fukambona fukambaha.

³⁷ Naalyo kawona mndu ungi kambia, “Njikapa ngakuterewa.” Mndu ulya kamkapa kambika kifaṟe.

³⁸ Mwikimbi ulya kahenda kaweda Mangi njienyi, kakuilacha kashikia meso na kitambaa.

³⁹ Mangi kekiida, kalaha Mangi, kahamba, “Isinga lyapfo liwei kiidi kya ngapano, mndu umu kanjihalukia kanjiendie mndu, kanjiwia, ‘Ringa mndu chu, kadeka nochimanya, moo fopfo fochiwa handu hake, ang'u nochiwuta kilo 35 tsa fesa.’”

⁴⁰ Wulalu kiheri mṟundi opfo aweiwuta wuliwe na wuliwe mndu ulya kahenda. “Mangi o Israeli kambia, ‘Nyi wudi kechiwa muanduye fopfo, nokuanduya kumonyi.’”

⁴¹ Kakambiṟa iwuta kitambaa kilya mesonyi hake, Mangi o Israeli kamanya ke nyi umu o waikimbi.

⁴² Kambia, “Mndumii nahamba adi, ‘Kipfa omlekia nawuke mawokonyi hapfo mndu njiwehambie narumatso piu, moo fopfo fochikaa handu ha moo foke, na wandu wapfo handu ha wandu wake.’”

⁴³ Mangi o Israeli kahenda kanyi koke na mrima mlemeri, aichuo nyashi, kahenda kanyi koke Samaria.