1WAMANGI 19 - Bibilia Kui Mdedie fo Kimochi

Elia fumvuhu lya Horebu

¹ Mangi Ahabu kaongoya mka oke Yezebeli, mbonyi tso tsose chandu Elia alewuta na chandu alewaha waikimbi walya wa Baali ko Oshu.

² Yezebeli kaduma ndumi ko Elia kambia, “Maruwa hanjiwahie kuleshe, ngakulia nyamu, kukashika ngama kiheri cha iki nochifanana na waikimbi wa Baali chandu ulewawutia.”

³ Elia kadichia mṟi nyi fo Beer-Sheba orukenyi lo Yuda, kadapfo mṟundi oke,

⁴ Nao kachumia ohendo lo mfiri puti kaafukia nuka ya msanga. Kyasia kashika handu kadamia wanda ya ikidi lya mretemu. Kalanga opfu kahamba, “Kyashika, njiidima se-pfo. Hoi Mndumii-Ruwa, kunjiwutie moo foko. Inyi njii mcha kota wandie wako-pfo.”

⁵ Nahong'u Elia kakaa wanda ya ikidi lyo kawado nyi mado. Oweṟe cha ilyi, msu o Ruwa kacha, kampaaya kambia, “Kure nolye.”

⁶ Elia kekiambuo kawona mkate mkahaṟe fui huya okaa, na selela ya mṟinga hafui na mdo foke. Kalya, kanyo kapfa se.

⁷ Msu o Ruwa kacha lya kawi, kampaaya kambia, “Kure nolye, shile wudo kyaṟo ki kechiwa kyuumu kopfo.”

⁸ Elia kakure, kalya, kanyo. Kiidima kachumia ohendo lo mkonu makumi hana 40, kio na mfiri, mṟasa Horebu, fumvu lya Ruwa.

⁹ Ipfo, kashika handu hawode opanga, kakaa-pfo, kudi idedo lya Mndumii-Ruwa likamchea, “Elia nkiki uiwuta iya?”

¹⁰ Nao kahaluo, “Njikuichuo owicho na wunyenyi wo Mndumii-Ruwa, Ruwa menyi matorito, kipfa wandu wa Israeli wafunja kyasa kyapfo, wakawunduo shitaṟa shilya shapfo shedasia, wakawewaha waikimbi walya wapfo kui oshu, nyi inyi njimonyi tupu njiletsuhaa, na inyi wainjiṟinjawia wanjiwahe!”

¹¹ Mndumii-Ruwa kambia, “Henda nohoṟoke fumvuhu, oshangunyi loko inyi Mndumii-Ruwa.” Kyasia Mndumii kaida kui otanu sa luapfinya lukawunduo ngaṟahamba tsa maho na ing'alawuo mafumvu. Kyaindi Mndumii awei kiidi kya otanu lulya-pfo. Otanu lukaida kukawada kiding'ashi. Kyaindi Mndumii awei kiidi kya kiding'ashi pfo.

¹² Kiding'ashi kikaida, kukawada modo. Kyaindi Mndumii awei kiidi kya modofo pfo. Modo fomeida kukaichio ṟu litutu, lihoo.

¹³ Kyasia, Elia kekiicho ṟu lyo, kashikia kyamu kyake na ikonya lyake, kakure kahenda ihoṟoka oo mongonyi fo opanga. Ai ho kaicho ṟu, “Elia nkiki uiwuta iya?”

¹⁴ Nao kahaluo, “Njikuichuo owicho na wunyenyi wo Mndumii-Ruwa, Ruwa menyi matorito, kipfa wandu wa Israeli wafunja kyasa kyapfo, wakawewunduo shitaṟa shilya shapfo shedasia, wakawewaha waikimbi walya wapfo kui oshu, nyi inyi njimonyi tupu njiletsuhaa, ma inyi wainjiṟinjiwia wanjiwahe.”

¹⁵ Mndumii-Ruwa kambia, “Wuya noide njia iya ya nuka ya msanga mṟasa Damasko. Koshika pfo noshimbuo Hazaeli nawe Mangi o Aramu.

¹⁶ Na Yehu, mana o Naishi, mshimbuo nawe Mangi o Israeli, Elisha, mana Shafati, o Abeli-mehola, nochimshimbuo nawe mwikimbi handu hapfo.

¹⁷ Ulya echikia oshu lo Hazaeli, Yehu nechimbaha, na ichu echikia oshu lo Yehu, Elisha nechimbaha.

¹⁸ Kyaindi njechida wandu shiku mfungade (7,000) wai na moo orukenyi lo Israeli, walalemehonerie Baali ma ikomba sanamu yake.”

Elisha alaho nawe mwikimbi

¹⁹ Elia kakure, kakoya Elisha, mana o Shafati, kedema. Handu ho kuwewode mmbe tsiwetsipfunge tsiwi tsiwi ngamba ikumi na tsiwi, na okamba lulya lumu luwei na Elisha luwei numa ya tsose. Kyasia Elia kawuta ikonya lyake kamkumbia.

²⁰ Kudi, Elisha kada mmbe tsilya tsake, kaosha Elia wodicha kambia, “Njiinenga momu njihende ko wande na wama njisamane nawo kiidima njiche njikuoshe.” Elia kamhaluo, “Henda! Ngamekuima?”

²¹ Kyasia, Elisha kada Elia, kawuya mmbe tsilya tsake kashinja mmbe tso kakoṟa kui mashidi halya hepfungiṟana helaho nira, kahaluo ngu kainenga wandu wakalya. Kyasia kakure, kaosha Elia kawa mṟundi oke.