1WAMANGI 18 - Bibilia Kui Mdedie fo Kimochi

Elia akoyana na mangi na waikimbi wa Baali

¹ Mfiri ifoi yekiida, idedo lya Mndumii likachea Elia, kiidi kya maka fo kaṟaṟu lyehamba, “Henda ukuloṟe ko Ahabu na inyi njechiende mvuo orukenyi.”

² Kyasia Elia kahenda kundu nakuloṟe ko Ahabu. Na njaa iwei njiwawo mnu kiidi kya Samaria.

³ Ahabu kalaha Obadia, awekehoṟokia mba yake, (na Obadia chu naweowoe mnu Mndumii.

⁴ Kikawa kiheri, Yezebeli aweiwaha waikimbi wa Mndumii, Obadia naleduo waikimbi ihana 100 kawaṟika makumi hatanu opangenyi, kawalela na kando na mṟinga).

⁵ Ahabu kawia Obadia, “Ida orukenyi sokenyi tsa mṟinga tsose, na shimeda shose, kofia lochiwona maṟa luinenge frasi na mchungu. Kundu lulawone lochiarisio shuma shi wanda.”

⁶ Kyasia wakahawana oruka, kundu waidime iida kiidi kya oruka lose, Ahabu kahenda ora lumu omonyi na Obadia kaida ora lungi amonyi.

⁷ Kiheri Obadia awei njienyi kudi, kakumbuhana na Elia; kamanya, kaho wanda na kyamu, kadeda, “Ngesa, nyi iyo mndumii oko Elia?”

⁸ Elia kamhaluo, “Nyi inyi henda uwie Mndumii opfo, ‘Ambuya Elia naipfo.’”

⁹ Obadia nao kamhaluo, “Nkiki ngadeko, mṟasa unjiwike kiidi kya mawoko ha Ahabu najiwahe?

¹⁰ So Mndumii, Ruwa opfo ai na moo, kuwode mkambo fo wandu ma wumangi Mndumii oko alaleduma wandu wakushihe pfo, na kiheri walehamba, ‘Aipfo-pfo, kawalisiṟa nyamu mkambo na wumangi wulya ke wakuwona pfo.

¹¹ Na iyo wulalu nohamba, henda uwie Mndumii opfo, Elia naipfo!’”

¹² Kipfa kechiwa, ili njechikure kopfo, mumuyo fo Mndumii fochikuduo uhende kundu njilakuichi, na inyi ili njechihenda iwia, Ahabu, nao nalakuwone, nechinjiwaha, indi inyi mṟundi opfo njiowoye Mndumii wokia uwanake woko.

¹³ Ngesa, Mndumii alemewio chandu njilewuta kiheri Yezebeli alewaha waikimbi wa Mndumii? Chandu njileṟika waikikumbi wa Mndumii wandu makumi hatanu 50 ko makumi hatanu 50 kiidi kya opanga, ngawalela na kando na mṟinga?

¹⁴ Na iyo wulalu nohamba, “Henda wia Mndumii opfo, ambuya Elia naipfo? Nechinjiwaha.”

¹⁵ Nalyo Elia kahamba, “So Mndumii menyi matorito ai na moo, ichu njekehoṟoka oshangunyi loke, nyi kya lohi njechikuloṟa ko Ahabu inu.”

¹⁶ Kyasia, Obadia kahenda nawone Ahabu kamwongoya, nao Ahabu kahenda iambia Elia.

¹⁷ Ahabu kekiwona Elia, Ahabu kambia, “Ngesa, nyi iyo mtuuṟi o Waisraeli?

¹⁸ Nao kamhaluo, ‘Chi inyi njiletuuṟa Waisraeli pfo, indi nyi iyo na mba ya ndeo, kipfa mleda mlaosha mawawaso ha Mndumii mkaosha Mabaali.

¹⁹ Kyasia, wulalu, dika wandu usanyie Waisraeli wose alya fumvuhu lya Karmeli, na waikimbi walya wa Baali mahana hana na makumi hatanu 450, na waikimbi walya wa Asheri mahana hana 400 walya wekedamia ilya na Yezebeli.’”

²⁰ Kyasia, Ahabu kadika wandu ko wana wa Israeli wose, kasanyia waikimbi handu hamu alya fumvuhu lya Karmeli.

²¹ Elia kasembelia wandu wose kahamba, “Mochihingahinga kiidi kya mahio hanu hawi mtane indi? Mndumii kokoya nyio Ruwa, mwoshenyi, kyaindi kokoya Baali nyio Ruwa, kyasia mwosheni o.” Wandu walya walamhaluo ma kidedo.

²² Naalyo Elia kawawia, “Inyi njimonyi nyio njitsuhae, inyi njimonyi njii mwikimbi o Mndumii, kyaindi waikimbi wa Baali nyi wandu mahana hana na makumi hatanu 450.

²³ Ko ikyo endenyi mmbe tsiwi; wo wakusambuṟie mmbe imu, waishinje na imanyamanya waiwike huya ngu, walaatse modo na ifuṟika wanda ya ngutso. Inyi njiteseheṟa iyo ya kawi, na iwika huya ngu, njilechiatsa modo na iṟika shia ngu.

²⁴ Nyo muterewe kui rina lya ruwa onu, na inyi njiterewe kui rina lya Mndumii, na Ruwa ulya echihaluo koiende modo, nawe nyio Ruwa.” Wandu wose wakahaluo wakahamba, “Ikyo nyi kidedo.”

²⁵ Elia kawia waikimbi walya wa Baali, “Sambuṟenyi mmbe imu, muishinje na iimanyamanya, mochiwoka nyo kipfa mufoi, mulahe kui rina lya ruwa onu, ma mulaṟoṟowishe modo wanda ya ngu.”

²⁶ Wakaambia mmbe ya wakaisungusia, iya waleinengo, wakalaha rina lya Baali wokia ngamenyi mṟasa mfiri fo saa nyanya wechihamba, “Hoi Baali, luadanyie.” Kyaindi kuwewode kidedo pfo, ma mohaluo pfo. Wakaitola tola huya kitaṟa kilya kidesia wawekisaye.

²⁷ Kiheri kya mfiri fo saa tsiṟandaṟu Elia kawataluo, kechihamba, “Mlahenyi ko ṟu lying'anyi kipfa icho nyi ruwa, kofia naideda, ang'u napfuṟukana ang'u nahenda kyaṟo, ang'u kofia nalee, kiwaṟi naamtso.”

²⁸ Wakafahia, wakakuwehaweha na shoshu na shiwembe chandu kii mbuka tsawo samu ikasoka nawo.

²⁹ Kiheri kya mfiri fo saa nyanya wakaterewa kyaindi ote lohi kilafume kindo, kuwewode ṟu, ma mohaluo ma moambuya-pfo.

³⁰ Naalyo Elia kawia wandu “Njisembelienyi.” Wandu wose wakatikiria. Kasungusia kitaṟa kedasia kya Mndumii kiwefunjikie.

³¹ Elia kaduo maho ikumi na hawi, kui itala lya wana wa Yakobo ulya alewonekio nyi Mndumii kawio rina lyapfo lyechiwa Israeli.

³² Nao kawika kitaṟa kedasia ko maho ho ko rina lya Mndumii, kasuma mfongo, cha ihenda wanda njayo tsiwi, katengetia kitaṟa kilya.

³³ Kiidima, kasanyia ngu kateseheṟa mmbe ya kechiipaṟapaṟa sheenga sheenga kahekia huya ngu. Kahamba, “Ichuṟenyi mṟinga mapipenyi hana, muletsie huya kiano kemaya modonyi kii huya ngu.”

³⁴ Kahamba, “Wikenyi lya kawi” wakawika lya kawi. Kahamba, “Wikenyi lya kaṟaṟu,” wakawika lya kaṟaṟu.

³⁵ Mringa fulya fukatengetia kitaṟa kilya fukaichuṟa mfongo fulya.

³⁶ Kekishikia kiukanyi kiheri kya kidaso kya kiukanyi, mwikimbi Elia kasembelia, kahamba, “Iyo Mndumii-Ruwa o Abrahamu, na o Isaki na o Israeli, na kimanyike na pata, ke iyo nyio Ruwa kiidi kya Israeli, na ke inyi nyi mṟundi opfo, na ke ngawuta shose kui idedo lyapfo.

³⁷ Unjiicho hoi Mndumii unjiicho, kundu wandu wa wamanye ke iyo nyi Mndumii-Ruwa, na ke iyo noemmbeṟutsa mrima yawo wakuwuuye.”

³⁸ Oweṟe modo fo Mndumii fukasoka fuwuka ruwehu fukarumatsa kidaso kilya kemaya modonyi, na ngu, na maho, na kiluli, fukakomba mṟinga fulya fuwei kiidi kya mfongo.

³⁹ Wandu wose wekiwona chandu kyawa, wakaoloka wanda na kyamu wakahamba, “Mndumii nyio Ruwa, Mndumii nyi Ruwa.”

⁴⁰ Elia kawawia, “Wadenyi waikimbi wa Baali, nalakie ma umu.” Wakawawada, na Elia kawaduo mṟasa kimeda kya Kishoni kawawaahia pfo.

Mtsitsionyi ha wuumu wo oruka

⁴¹ Nao Elia kawia Ahabu, “Wulalu kure ulye, unyo, kipfa kuwode ṟu lya mvuo ifoi.”

⁴² Kyasia Ahabu kakure kundu nalye na inyo. Na Elia kado mṟasa alya owerilu lo fumvu lya Karumeli; kahongoma keindia, mṟasa kyaamu kikakoya ndi.

⁴³ Kyasia kawia mṟundi oke, “Kedo wulalu uambuye ora lo ipalyipalyi,” Kado, kaambuya, na ihamba, “Kuwode kindo pfo.” Nao kambia, “Henda ka-mfungade.”

⁴⁴ Kekishika ka mfungade kahamba, “Ambuya ipuchi lyado lyiwuka ipalyipalyinyi, nalyo li litutu cha owoko lo mndu.” Kadeda, “Henda uwie Ahabu, nakuṟeheṟe nasoke mvuo ilambadie kunu.”

⁴⁵ Kioweṟe kitutu ipfo ruwehu kukaiwuo kipfa kya mapuchi na otanu, mvuo ing'anyi ikakapa. Ahabu kadoya igari kahenda Yezreeli.

⁴⁶ Owoko lo Mndumii lukakaa huya Elia, kakuwanza tse kawikia mteeṟa kechiosha Ahabu mṟasa Yezreeli.