1WAMANGI 16 - Bibilia Kui Mdedie fo Kimochi

¹ Naalyo idedo la Mndumii likachea Yehu mana o Hanani kya Baasha, lyehamba,

² “Kipfa inyi njilekuira njikuwuta kilulinyi, ngakuwika uwe mnene o wandu wako Israeli, na iyo koosha njia tsa Yeroboamu, kotewa wandu wako Israeli wakanyamaṟa wakanjidosa nyashi kui madeko hawo;

³ Ambuya iwawuta njechiwuta Baasha na Oshari loke, ngoseṟa njechihaluo mba yapfo iwe cha ya Yeroboamu mana o Nebati.

⁴ Mndu o Kyando kimu na Baasha kapfiia mṟinyi nechilio nyi shite, na icho mopfiia mdemenyi, nechilio nyi shilehe sha ruwehu.”

⁵ Kyasia mbonyi tsose tsa Baasha tsiletsuhaa na chandu alewuta, na pfyinya tsake, Shileṟehiyo kiidi kya kitapu-kya-maheri ha wamangi wa Israeli.

⁶ Baasha kapfa na wawandie, kaṟiko Tirza na Ela mana oke kaitoṟia handu hake.

⁷ Ngoseṟa, idedo likachea mwikimbi Yehu mana o Hanani kya Baasha, na kya mba yake, kipfa kya mawicho alewuta oshangunyi lo Mndumii, kechimpfulutsa nyashi kui maṟunda ha mawoko hake, ko ifanana na mba ya Yeroboamu kipfa naleinyamaṟa.

Ela, mangi o Israeli

⁸ Kiidi kya maka fo makumi hawi na iṟandaṟu 26 ya Asa Mangi ya Yuda, Ela mana o Baasha nalewooka itoṟia Israeli ipfo Tirza, kaitoṟia maka iwi.

⁹ Mṟundi oke Zimri mnene o kyenga kya mbahanyi kya magari hekekuruyo, kamṟiingia, kiheri awei Tirza kenyo mṟasa kanango kanyi ko Asa, awei mnene o mba ipfo Tirza.

¹⁰ Zimri kaida na mba kamkapa, kambaha, kiidi kya maka fo makumi hawi na mfungade 27 fo Mangi Asa o Yuda, kaitoṟia handu hake.

¹¹ Ambuya kiheri alewoka iitoṟia kadamia loṟikehu lowuitoṟi, kawaha wandu wa mba ya Baasha, alamde na moo mana o kisoṟo ma umu, wa oshari loke, ma mbuya tsake.

¹² Nyi wudo Zimri alenyamaṟa mba yose ya Baasha chandu idedo lya Mndumii lyilehambo kya Baasha kui dumbu lya mwikimbi Yehu.

¹³ Kipfa madeko ha Baasha, na madeko ha Ela mana oke walehawuta wakadekesha Israeli, wakadosa Mndumii-Ruwa o Israeli nyashi kui mawuto hawo mawicho.

¹⁴ Mawuto hose ha Ela haletsuhaa, na shose aleṟunda, ngesa haleṟehiyo kiidi kya kitapu kya maheri kya wamangi wa Israeli.

Zimri, mangi o Israeli

¹⁵ Maka fo makumi hawi na mfungade fo Asa Mangi ya Yuda, Zimri kaitoṟia mfiri mfungade ipfo Tirza. Kyasia wandu nyi wawekureheṟie ikapana na Gibethoni, mṟi fo Wafilisti.

¹⁶ Wandu wo wawekuṟeheṟie wakaicho mbonyi ke Zimri nawode wuṟiingi, ngoseṟa nakapa Mangi, koikyo Israeli wose wakawika Omri, mnene o chekeṟo lya shida, nawe Mangi o Israeli mfiri fulya, kulya maowionyi wawe kuṟeheṟia.

¹⁷ Omri kado awuka Gibethoni, na Israeli wose kimu nao, wakatengetia Tirza.

¹⁸ Zimri kekiwona ke mṟi fodao, kaida na mba ya Mangi injiwike omombo, karumatsa mba ya Mangi kui modo fo huye kapfa,

¹⁹ kipfa kya madeko alewuta, kechiwuta mawuto mawicho oshangunyi lo Mndumii, kechiosha njia tsa Yeroboamu na mawuto hake mawicho hedekesha naho Israeli.

²⁰ Mbonyi tsose tsa Zimri tsiletsuhaa na wuṟingi woke aleṟunda, shishiṟehie kiidi kya kitapu-kya-Maheri kya wamangi wa Israeli?

Omri, mangi o Israeli

²¹ Nahong'u wandu wa Israeli wakaletsano ngamba tsiwi, kenga kya wandu wakaosha Tibni mana o Ginathi, kundu wamhaluo Mangi, kenga kingi kikaosha Omri.

²² Wandu wo waleosha Omṟi wakaidima iwo waleosha Tibni mana o Tinathi, kyasia Tibni kapfa, Omri kaengeṟa iitoṟia.

²³ Kiidi kya maka fo makumi haṟaṟu na fumu 31 fo Asa Mangi o Yuda, Omri nalewoka iwada wuitoṟi kiidi kya Israeli, kaitoṟia maka ikumi na iwi 12. Naleitoṟia ipfo Tirza maka iṟandaṟu.

²⁴ Kiidima kahuṟa kifumvu kya Samaria ko Shemeri wueri wo kilo 70 tsa fesa, kawika mba huya kifumvu kilya, kalaha mṟi fulya alewika, Samaria, kundu naichike rina lilya lya Shemeri, menyi kifumvu kilya.

²⁵ Omri kawuta mawicho oshangunyi lo Mndumii, kota walya wamsongoe.

²⁶ Kawuta mawicho halya Yeroboamu mana o Nebati alewuta hewichuṟa Mndumii-Ruwa, Ruwa o Israeli, katana ahaluo Waisraeli wawute wunyamaṟi wo india maruwa ha wongo, kimu na sanamu tsa maruwa-ho.

²⁷ Mawuto hengi ha Omri na wukahari woke, shose shishiṟehie kiidi kya kitapu-kya-Maheri ha wamangi wa Israeli.

²⁸ Lyefurumia ho Omri kapfa, kaṟiko ipfo Samaria, mana oke elaho Ahabu kaitoṟia handu hake.

Ahabu, mangi o Israeli

²⁹ Kiidi kya maka fo makumi haṟaṟu na nyanya 38 fo wuitoṟi wo Asa Mangi o Yuda, Ahabu mana o Omṟi, kawoka wuitoṟi Israeli. Kaitoṟia Samaria maka makumi hawi na iwi 22.

³⁰ Ahabu kawewuta mawicho oshangunyi lo Mndumii kota wamangi wawemsongoe.

³¹ Ngoseṟa, kudee ma mawicho ha Yeroboamu mana o Nebati, Ahabu chu nalealika Yezebeli mana o waka o Ethbaali, Mangi o Wasidoni; kasingia na iterewa Baali.

³² Kawikia Baali hekalu ipfo Samaria, na kiidi kya hekalu lyo kasungusia handu hedasia.

³³ Kawesungusia na sanamu ya Ashera ruwa o kika. Ahabu nalewuta mawicho hafoi, kasuiṟa Mndumii-Ruwa, Ruwa o Israeli kota wamangi wose wa Israeli wawemsongoe.

³⁴ Kiheri kya wuchili woke, Hieli Mbetheli, nalewika wuhya mṟi fo Yeriko. Kihianyi na idedo lya Mndumii kui dumbu lya Yoshua mana o Nuni, Hieli kapfiio na mana mbee Abiramu kiheri kekapa njotende tsa Yeriko, kapfiio se na mana oke mtutu Segubu kiheri kewika mongo ya mṟi fo Yeriko.