1WAMANGI 15 - Bibilia Kui Mdedie fo Kimochi

Mangi Abiya o Yuda

¹ Maka fo ikumi na nyanya fo Mangi Yeroboamu mana o Nebathi, Abiya nalewoka iwada wumangi kiidi kya Yuda.

² Naleitoṟia maka iṟaṟu akeri ipfo Yerusalemu. Rina lya mae nyi Maka, mana o waka o Absalomu.

³ Kaosha njonyamaṟo tsose tsa ndee, aletsiwuta numa yake, mrima foke fulewada wuhendelyi oshangunyi lo Mndumii, Ruwa oke cha mrima fo sahuye Dawidi pfo.

⁴ Kyaindi kipfa kya Dawidi, Mndumii, Ruwa oke, kamneenga taa ipfo Yerusalemu, naire mana oke numa yake, na iwanza Yerusalemu.

⁵ Kipfa Dawidi nalewuta shisumhanyi oshangunyi lo Mndumii ma aledeko kiidi kya shilya alewawasio, mfiri yose ya moo foke pfo, shile na kiidi kya mbonyi iya ya Uria, Mhiti.

⁶ Kuwewode shida kiidi kya Rehoboamu na Yeroboamu, kiheri kyose kya moo foke.

⁷ Na mbonyi tsose tsa Abiya tsitsuhae, na shose alewuta, ngesa shi shiṟehie kiidi kya kitapu kya maheri kya wamangi wa Yuda? Kuwewode shida kiidi kya Abiya na Yeroboamu.

⁸ Abiya kapfa wakamṟika mṟinyi fo Dawidi. Asa ai mana oke kawada wumangi handu hake.

Asa Mangi o Yuda

⁹ Maka fo makumi hawi ha wuitoṟi wo Yeroboamu Mangi o Israeli, Asa kawoka wuitoṟi kiidi kya Yuda.

¹⁰ Kaitoṟia maka makumi hana 40 ipfo Yerusalemu, rina lya mae nyi Maaka, mana o waka o Absalomu.

¹¹ Kyasia Asa kawuta shisumhanyi oshangunyi lo Ruwa, chandu ndee Dawidi alewuta.

¹² Kafuna matsenge halya kiidi kya oruka, kawefunja sanamu tsilya wandee wawewikie.

¹³ Ma Maaka mae kamsoka kiṟumi kya mkamangi, kipfa alesungusia sanamu na iindia. Kyasia Asa kadumbuo sanamu iya kairumatsa kiidi kya kimeda kya Kidroni.

¹⁴ Indi handu ha huye halepaayo-pfo, mrima fo Asa fuwei fusumhanyi mfiri yose ya moo foke.

¹⁵ Kaende shihiya shilya ndee aleshishimbuo na shilya aleshishimbuo amonyi mṟasambenyi ya Mndumii, fesa, na sahabu na shihiya.

¹⁶ Kuwewode shida kiidi kya Asa na Baasha Mangi o Israeli mfiri yawo yose.

¹⁷ Kyasia Baasha kakaa kihadi na Yuda, kasungusia mṟi Rama kundu mndu ose alawuke kiidi kya mṟifo na ihenda ko Asa Mangi ya Yuda.

¹⁸ Naalyo Asa kaduo fesa tsose na sahabu iya iletsuhaa kiidi kya kisa kya mba ya Mndumii, kisa kya mba ya Mangi, katsiwika mawokonyi ha waṟundi wake. Asa Mangi kawaduma ko Ben-Hadadi, mana o Tabrimoni, mana o Hezoni, Mangi o Shamu, awekekaa Dameski, kahamba,

¹⁹ “Loidikiana inyi na iyo, na ndee oko na ndeo, ambuya nakuendie shindo sha nga fesa na sahabu, kyasia henda, uwute maidikiano hapfo na Baasha Mangi ya Israeli, kundu nanjiwuke nanjileheṟe.”

²⁰ Ben-Hadadi kaadanyia Mangi Asa kaduma wanene wa mbahanyi huya mṟi yose ya Israeli, kakapa Iyoni, na Dani na Abel-Beth-maka na Kinerothi yose, na oruka lose lo Naftali.

²¹ Baasha kekiicho mbonyi yo kada alakiwike se Rama, kahenda kakaa Tirza.

²² Naalyo Mangi Asa kaduma mbonyi ko Yuda kulalekio mndu; nawo wakaduo maho halya ha Rama na mashidi hayo, halya Baasha aweiwika naho; Mangi Asa kawika na shindo shi Geba na Benjamini na Mispa.

²³ Na mbonyi tsose tsiletsuhaa, tsa Asa na pfinya tsake, na shose alewuta, mṟi aleiwika, ngesa shileṟehiyo kiidi kya kitapu-kya-maheri sha wamangi wa Yuda? Kyaindi kekikuo kawado nyi ndaṟe ya madende.

²⁴ Asa kapfa kaṟiko kimu na wawandie mṟinyi fo Dawidi. Na Yehoshafati kaitoṟia handu hake.

Nadabu, mangi o Israeli

²⁵ Nadabu mana o Yeroboamu nalewoka iitoṟia huya Israeli maka fo kawi fo Asa Mangi ya Yuda, kaitoṟia maka iwi.

²⁶ Kawuta mawicho mesonyi ha Mndumii, kaosha njia tsa ndee, deko lyake likadekesha Waisraeli wose.

²⁷ Kyasia Baasha o Ahiya o mba ya Isakari kaṟiinga, Baasha kakapa Nahabu ipfo Gibeothi kufui na Wafilisti; kipfa Nadabu na Israeli wose waweitengetia Gibeothi.

²⁸ Maka fo kaṟaṟu fo Mangi Asa o Yuda, Baasha kawaha Nadabu kaitoṟia handu hake.

²⁹ Kekiwada wumangi kakapa mba yose ya Yeroboamu. Aledea moo ma mndu umupfo, kihianyi na idedo lya Mndumii alededa kui dumbu lya mṟundi oke Ahiya, Mshiloni.

³⁰ Kipfa kya madeko ha Yeroboamu aledeko, na kui madeko-ho kadetsa naho Israeli; kipfa kya isuiṟa Mndumii kui mawuto mawicho, nalesuiṟa Mndumii-Ruwa o Israeli na impfulutsa nyashi.

³¹ Kyasia mbonyi tsose tsa Nadabu tsiletsuhaa, na shose alewuta, ngesa tsileṟehiyo kiidi kya kitapu-kya maheri sha wamangi wo Israeli?

³² Kuwewode shida kiidi kya Asha na Baasha Mangi o Israeli mfiri yawo yose.

Baasha, mangi o Israeli

³³ Kiidi kya maka fo kaṟaṟu fo Mangi Asa o Yuda, Baasha mana o Ahiya nalewoka iitoṟia Israeli yose ipfo Tirza, kaitoṟia maka makumi hana na iina 44.

³⁴ Kawuta mawicho oshangunyi lo Mndumii, kaosha njia ya Yeroboamu, njiwicho kadetsa Israeli.