1WAMANGI 14 - Bibilia Kui Mdedie fo Kimochi

Opfu lo mana o Yeroboamu

¹ Mandi ho, Abiya mana o Yeroboamu kaluo.

² Yeroboamu kawia mka oke, “Kure, hoi nokuilache, walakumanye ke iyo nyi mka o Yeroboamu, uhende mṟifo Shilo, kuipfo mndu elaho Ahiya mwikimbi alededa kyako ke njechiwa Mangi njiitoṟie wandu wa.

³ Duo mkate ikumi na keki na nungu ya wuki umhendie nao nechikuwia manake odu nechiwa ada.”

⁴ Mka ulya o Yeroboamu nalewuta adi, nalekure kahenda Shilo kashika kanyi ko Ahiya. Ahiya aleidima iwonapfo, kipfa nawempfu meso kipfa kya wuku.

⁵ Mndumii kawia Ahiya, “Ambuya mka o Yeroboamu nakeri icha nakuwese mbonyi tsa mana oke; kipfa naluo, wuliwe na wuliwe umbie, kipfa ili akeri iida na mba nechikuhaluo ke nyi mka o mndu ma chi o Yeroboamupfo.”

⁶ Kyasia Ahiya kekiicho mtiṟi fo madende hake, kekiida mongonyi, kahamba, “Kucheye, mka o Yeroboamu nki ili okuhaluo ungi kipfa njimdume kopfo iyo uwode madedo malemeṟi.

⁷ Henda wia Yereboamu, Mndumii-Ruwa o Israeli, nahamba adi, ‘Kipfa njilekuichika kiidi kya wandu, ngakuhaluo uwe mnene o wandu wako Israeli,

⁸ ngapaṟatsana wumangi wuwuke mbenyi ya Dawidi, ngakuinenga iyo, kyaindi iyo ulefanana na mṟundi oko Dawidi alewada mawawaso hako, kanjiosha na mrima foke fose, nalawute kindo kyose shile shilya shi shicha oshangunyi loko.

⁹ Kyaindi iyo nyi odeko kota wose walekusongoya, nulesungusia maruwa hengi, na sanamu tsesalaṟa unjisuiṟe na injikumba mhongo.

¹⁰ Ambuya njechiende mawicho kiidi kya mba ya Yeroboamu, na inyi njechiṟumatsa orio msoṟo o Yeroboamu, mpfungo na ulya alempfunge kiidi kya Israeli. Na inyi njechirumatsa wandu waletsuhaa wa mba ya Yereboamu cha mndu akoṟa mbosha mṟasa wasie piu.

¹¹ Ichu mopfa o Yeroboamu mṟinyi shite shechimlya; mopfiia mademenyi ndehe tsa ruwehu tsechimlya; nyi Mndumii adeda ado.’”

¹² Ahiya kawia mka o Yeroboamu, kyasia kure, nowuye na kanyi kopfo, na madende hapfo ilyi hechichuma mṟi manake onu nechipfa.

¹³ Na Waisraeli wose wechimlilia na imṟika, kipfa nyio kimumu o Yeroboamu echiida na ṟungunyi, kipfa kulewoneka kindo kicha, kichihiṟie Mndumii, Ruwa o Israeli, kanyi ko Yeroboamu.

¹⁴ Ngoseṟa Mndumii nechiira Mangi o Israeli echinyamaṟa mba ya Yeroboamu wokia inu.

¹⁵ Kipfa wokia inu Mndumii nechikapa Israeli cha natsi yekesingitso mṟingenyi. Nao nechikuṟuo Israeli kiidi kya orukalu lucha, aleinenga wandeawo, iwaṟahanyitsa kuleshe, mataya na meda fo Efrate, kipfa walesungusia handu heindia maruwa ha wongo, wechisuiṟa Mndumii.

¹⁶ Nao nechilekana na Israeli kipfa kya madeko ha Yeroboamu, aledetsa naho Israeli.

¹⁷ Kyasia mka o Yeroboamu kakure, kakuhendia, kashika Tirza; kekishika mongonyi fo mba, manake ulya kapfa.

¹⁸ Israeli wose wakamṟika wakamlilia chandu idedo lya Mndumii alededa kui dumbu lya mṟundi oke na mwikimbi Ahiya.

Opfu lo Yeroboamu

¹⁹ Mawuto hengi ha Mangi Yeroboamu, na chandu alekapana shida, na chandu aleitoṟia, ishi shose shishiṟehie kitapunyi kya Mbonyi tsa Maheri tsa Wamangi wa Israeli.

²⁰ Yeroboamu nalechilia ko ohendo lo maka makumi hawi na iwi 22, kapfa na mana oke o Nadabu kawa Mangi handu hake.

Mangi Rehoboamu o Yuda

²¹ Na Rehoboamu mana o Solomoni kaitoṟia Yuda. Rehoboamu nalewoka iwada wumangi amarisie maka makumi hana na fumu 41, kaitoṟia maka ikumi na mfungade 17 ipfo Yerusalemu, mṟi fuweifusambuṟe nyi Mndumii kidi kya shishari shose sha Israeli, kundu nawike rina lyake ipfo. Na rina lya mae nawekelaho nyi Naama Mwamoni.

²² Kyasia Yuda kawuta shiwichuṟie mnu mesonyi ha Mndumii, wakaendie Ruwa nyashi ko madeko hawo haleida halya ha wandeawo.

²³ Kipfa iwa walewewika handu ha huye, na ngo, na handu heindia maruwa ha wongo, huye ya orio kifumvu kileshe, na wanda ya ikidi liwode maṟa mawishi.

²⁴ Kuwewode wasoṟo wameluki wawei matsenge kiidi kya oruka, wakawuta shiteṟefutsie cha wandu wa mkambo walya Mndumii alewafuna oshangunyi lo wana wa Israeli.

²⁵ Kikashika ili maka fo katanu fo Mangi Rehoboamu, Shishaki Mangi ya Misri kado, kachea Yerusalemu.

²⁶ Kaduo shisa sha mba ya Mndumii, na shisha sha mba ya Mangi; kaduo shose. Kaweduo na ngawo tsose tsa sahabu tsilya Solomoni awesungusie.

²⁷ Rehoboamu kasungusia tsa malama handu hatso, kadambikia wanene wa waṟingi, wawekeringa mongo fo mba ya Mangi.

²⁸ Kikawa orio mandi Mangi aida na mba ya Mndumii waringi wo weketsiduo pfo; wakawetsiwihiṟa kiidi kya kiṟiha kya waringi.

²⁹ Na mbonyi tsa Rehoboamu tsiletsuhaa, na shose alewuta, shileṟehio kiidi kya kitapu kya maheri sha wamangi wa Yuda.

³⁰ Kuwewode shida kiidi kya Rehoboamu na Yeroboamu mkonu yose.

³¹ Rehoboamu kapfa na wawandie, kaweṟiko kimu na wawandie mṟinyi fo Dawidi. Rina lya mae nakelaho Naama, Mwamoni. Na mana oke Abiya kaitoṟia handu hake.