1WAMANGI 13 - Bibilia Kui Mdedie fo Kimochi

Mwikimbi asesa wuindi ipfo Betheli

¹ Kyasia, kukacha mndu o Ruwa kiidi kya Yuda kui idedo lya Mndumii, kashika Betheli. Nao Yeroboamu nawehoṟoki rasionyi kundu napfamiṟe uvumba.

² Kyasia mndu cho kakapa kitohio kya rasio lilya, kui idedo lya Mndumii kahamba, “Iyo rasio, rasio, Mndumii nahamba, ‘Ambuya mana nechifeo kiidi kya mba ya Dawidi, rina lyake nyi Yosia, nao nechisingia wakohanyi wa handu ha huye, wekepfamiṟa uvumba handu hapfo na huye, na mafuo ha wandu hechikoṟo hasenekie piu.’”

³ Kawuta kichano mkonu fulya fulya, kehamba, “Iki nkyo kichano Mndumii ahamba, ‘Ambuya kitaṟa kedasia kechipaṟika na ifu lii huye yakyo lyechipusuka.’”

⁴ Mangi Yeroboamu kekiicho madedo ha mndu o Ruwa chandu alecha na ikapa kitohio kya rasio lya Betheli, Mangi kalesha owoko loke alya rasionyi, kahamba, “Mbadenyi mnducho.” Kyasia owoko lulya awehoṟoe lukadumbuka, aleidime luwihiṟa sepfo.

⁵ Kudi rasio likapaṟika na ifu alya kitaṟenyi kedasia likapusuka chandu kichano kilya mndu o Ruwa alekihamba kui idedo la Mndumii.

⁶ Mangi kahaluo, kawia mndu ulya o Ruwa, “Terewa Mndumii-Ruwa opfo, unjiterewie, kundu njiwihiṟio owoko loko.” Mndu ulya o Ruwa katerewa Mndumii-Ruwa, owoko lo Mangi lukawihiṟo lukawa chandu luwei kuwoka.

⁷ Mangi kawia mndu o Ruwa, “Kucheiye na kanyi koko usie moo, njikuinenge wueri.”

⁸ Mndu o Ruwa kawia Mangi, “Ma kowenjiinenga kyenga kya mba yapfo, njechiida na iyo pfo, ma ilya kando ang'u mṟinga handu hapfo pfo;

⁹ Kipfa nyi wudo njilewawaso kui idedo lya Mndumii, kehamba, ‘Kulalye kindo kyose ma kulanyo mṟinga ma kulawuye na omongo lulya kulehenda nalo.’”

¹⁰ Kyasia kahenda kundu koke kui omongo lungi, alewuya na omongo lulya alecha nalo Betheli pfo.

Mwikimbi mku o Betheli

¹¹ Kyasia kuwewode mwikimbi umu mku awekekaa kiidi kya Betheli, wana wake wakamhendia wakambia orio idedo lilewuto nyi mndu o Ruwa mkonu fulya kiidi kya Betheli, na madedo alewia Mangi, na iho wakahaongoya ndeawo.

¹² Ndeawo kawawesa, “Nahenda na omongo luhya?” Na wana wake wakamloṟa omongo lulya.

¹³ Kawia wana wake, “Njiteseheṟienyi nzoi.” Wakateseheṟa nzoi, kaidoya.

¹⁴ Kaosha mndu o Ruwa, kamkoya adamie wanda ya ikidi kambesa, “Ngesa iyo nyi mndu ulya o Ruwa alecha iwuka Yuda?” Kambia, “Nyi inyi.”

¹⁵ Kambia “Kucheye na kanyi koko, ulye kelya.”

¹⁶ Nao kambia, “Njechiidima iwuya kimu na iyo pfo, na iida na iyo ma ilya kelya ma inyo mṟinga na iyo handu-ha-pfo.

¹⁷ Kipfa njimbie kudo kui rina lya Mndumii, kulalye kando, kulanyo mṟinga handu ho, ma kulawuye na omongo lulya kulechea.”

¹⁸ Nao kambia, “Ma inyi na mwikimbi cha iyo, na malaika kanjiwia kui idedo lya Mndumii, kehamba, mbihiṟe hamu na iyo kanyi kopfo, nalye kelya, nanyo mṟinga.” Kyaindi nalehamba wongo.

¹⁹ Kyasia mndu ulya kawuya kimu nao, kalya kelya, kanyo mṟinga kanyi koke.

²⁰ Kukawa kiheri wawedamie mesenyi idedo lya Mndumii likachea mwikimbi ulya alembihiṟa.

²¹ Kafihiṟia mndu ulya o Ruwa alewuka kiidi kya Yuda, kehamba, “Mndumii nahamba adi, ‘Kipfa kya ifunja iwawaso lya Mndumii, kulakunde iwada wuwawaso wo Mndumii-Ruwa opfo.

²² Kowuya, kolya kando na inyo mṟinga na inyi njilekuwia, Kulalye kando, ma kulanyo mṟinga. Mnying'a fopfo fochiida na ṟungunyi lya wandie wapfo-pfo.’”

²³ Wekimarisa ilya na inyo mṟinga, mwikimbi ulya alembihiṟa kateseheṟia nzoi.

²⁴ Amemaa ihenda muiso fukamkooya omongonyi fukambaha. Mnying'a foke fukakumbo omongonyi, na nzoi iya ikahoṟoka hafui na fo; na muiso naawo ikahoṟoka hafui na mnying'a fulya.

²⁵ Kyasia wandu wekiida wakawona mnying'a fufukumbe omongonyi, na muiso fuhoṟoki kufui nafo, wakahenda wakawuta mbonyi kiidi kya mṟi fulya, mwikimbi ulya mku awekekaa.

²⁶ Na mwikimbi ulya alembihiṟa kekiicho mbonyi, kahamba, “Nyi mndu ulya o Ruwa aletehiya idedo lya Mndumii, ko ikyo Mndumii kamkumbuhanyitsa na muiso, mwiso fukamtafuotafuo, fukombaha, chando idedo lya Mndumii alewembia.

²⁷ Kawia wana wake, ‘Njiteseheṟienyi nzoi.’” Wakateseheṟa.

²⁸ Kahenda, kawona mnying'a fulya fukumbe omongonyi, na nzoi na muiso tsihoṟoki kufui na mnying'a. Muiso fulelya mnying'a ma ipaaya nzoi iya-pfo.

²⁹ Nahong'u mwikimbi ulya mku kaira mnying'a fo mndu ulya o Ruwa, kamhekia huya nzoi yake, kambihiṟa; mwikimbi ulya mkuu kahenda mṟinyi koke, kapfa kilio, kiidima kamṟika.

³⁰ Kawika mnying'a fulya kiidi kya ṟungu lyake amonyi; wakamlilia, wechihamba! “Wui, manowama.”

³¹ Kekimaa imṟika, kawia wana wake, kechihamba, “Ngapfa inyi, mochinjiṟika kunu ṟungunyi lya mndu chu o Ruwa, muwike mafuo hako mbai ya mafuo hake.

³² Kipfa idedo lyo alefihiṟia huya rasio kiidi kya Betheli, kui idedo lya Mndumii, na kya mba tsose tsa handu ha huye tsii kiidi kya mṟi ya Samaria, nyi kya lohi tsechiinukia.”

³³ Numa ya isho shose Yeroboamu aleda njia tsake njiwicho pfo, kahaluo wandu alewakunda wawe makohanyi wa maruwa ha wongo.

³⁴ Orio msa alekukundia kamshimbuo, nawe mkohanyi o handu ha huye. Kindoki kikawa wunyamaṟi ko mba ya Yeroboamu, mṟasa ikanyamaṟika na ifunjika oshangunyi lo wuyana.